Ubbog ti Lagip

Bannawag - - Itoy A Bilang - Jobert M. Pacnis

No kastoy gayam a mariknan ti pipikel ken panagragutok dagiti susuop Wenno pannakabembennat dagiti piskel ken ur-urat, awisenna ti panunot A mangtaliaw kadagiti nalikudan a pagteng, paspasamak a nangyuged iti kaimudingan Ken kinaania iti agdama: mabalin a makapaisem, panagbabawi no apay a kasdiay, Ngem ad-adda nga adda a tumpaw, rumimbaw dagiti lagip a kas iti kinapait Ti balang a paria, wenno serpentina, papait wenno ubog ti labig.

Karemkemen no kua ti agsulbod a pait ti sibubukel a kinatao Ngem no apay nga ad-adda latta a patarnawen dagitoy a kinapait, Ayaten a subliasublian, kas iti dalluyon a di maumag nga umagep iti kadaratan Nanamen a kas kaimas ti umas-asuk a kape wenno agburburek a pinapaitan— Pangdengngep iti rusok a rurusoken iti dina mairusok nga angaw Ti mapalpalakpakan a bulbullagaw.

Dagitoy nga agubbog a lagip, pasingkedanda ti kinanormal Mabalin nga isuroda ti dana a taluntonen pay iti nabatbati a panawen, Wenno ikalbitda dagiti masapul nga ilinteg Wenno iladawanda ti kinatulnek laeng ditoy pagud-udaodan— Maitutop a di paidagel kadagiti pait; sisipen ti sam-it iti pait A mangipasngay iti ubbog a mangugas kadagiti agsulbod pay a pait.

Ngem no dagiti agubbog a lagip kas kaimas ti mabulanglang nga ubog ti labig Im-imasek ti manglagip Ti manglagip Kadagiti pait.

Newspapers in Tagalog

Newspapers from Philippines

© PressReader. All rights reserved.