No Adda Sigsigloten, Adda Met Warwaren Kasano ti Ag-Invest iti Stocks?

Bannawag - - Itoy A Bilang - No adda kayatyo a damagen wenno adda komentoyo, ag-PM-kayo ken ni Anna Liza iti www.facebook.com/annalizamgaspar.--Editor Ni ANNA LIZA MADAYAG GASPAR, CPA

No Adda Sigsigloten, Adda Met Warwaren

N(Umuna iti Tallo a Paset) O makapilika kadagiti mayat wenno napintas nga stocks, siguradoak a dumakkel dayta sigsiglotam. Ngem no mairana met a mapatangam dagiti stocks a bumaba ti market value-na ken awan pulos pangnamnamaan a ngumato iti las-ud ti investment timeframe-mo, mabalin met ngarud a maawan ti kakaisuna a sigsiglotam. Kitaentayo man dagitoy dua nga stocks a kas pagarigantayo.

Jollibee ken BPI

Iti ania man a panaganalisar kadagiti stocks, no la ketdi ti trend dagiti presio wenno market values ti pagsasaritaan, ‘hindsight is 20-20’ a kunada. Ti kayatko a sawen, no taliawentayo ti napalabas, maibagatayo ti ‘no koma kastoy ti kinuak, kastoyak koma met itan.’ Isu a daytoy a pananganalisarko iti stock prices ti Jollibee ken BPI, ‘tay kunatayo a ‘take it with a grain of salt’ wenno mabalin a patienyo, mabalin met a saan.

JFC ti simbolo ti Jollibee Foods Corporation ken BPI met ti Bank of the Philippine Islands iti Philippine Stock Exchange. Idi Oktubre 31, 2018, P276.00 ti maysa nga stocks ti Jollibee ken P82.15 met ti BPI. Idi Disiembre 29, 2017, maysa nga aldaw sakbay iti pannakayanak ni Juan Silver nga anakko (isu a matandaanak la unay!), P253.00 (JFC) ken P108.10 (BPI) ti presioda. Kayatna a sawen nga iti las-ud ti sangapulo a bulan, 9.09% (JFC) ti naganar koma ti kuarta a nay-invest ngem daksanggasat no BPI ti nangiy-invest-an iti kakaisuna a sigsiglotentayo, ay, ket bimmaba iti 24% koman dayta a kuarta.

Ngem no ngata ngarud nangrugiak koma a nag-invest iti Jollibee idi karugrugik nga agtrabaho? Idi Enero 2, 2003, P18.50 ti maysa. No gimmatangak koma idi iti 100 a JFC stocks, nagbalin koma a P27,600 ti orihinal a P1,850 nga iny-invest-ko. Dimmakkel iti dandani 14 a beses ti balor ti Jollibee stocks iti las-ud ti dandani 16 a tawen. Idi Enero 2, 2008 (daytoy ti kaunaan a presio ti BPI a nakitak), P61 ti maysa nga stocks ti BPI. No koma met gimmatangak iti 100, nagbalin koma a P8,215 daytoy wenno dimmakkel iti 34.67% laeng iti las-ud ti dandani 11 a tawen. Amang a nagangganar nga investment vehicle ti Jollibee ngem ti BPI no dagitoy a presio laeng ti pagibasarantayo. (Simple daytoy a panangamirisko; diak inraman dagiti dibidendo, stock rights, stock splits, ken buy/sell commission.)

Dagitoy dua nga stocks ti mangipaneknek a ti stocks investment ket maysa a long-term investment. No adda kuarta a planom a sigsiglotan iti 10 a tawen wenno nasursurok man, mabalin a y-invest iti stock market. Ngem no dayta a kuarta ket kasapulam iti kabiitan a panawen, saan ngarud nga iti stocks ti pangikabilam ta baka inton masapulmo dayta a kuarta, baka bassit-usitton dayta.

Dagitoy dua nga ehemplo, ipakitada nga adda risgo ti stock investing. Saan a sigurado a kuarta daytoy. Ngem amin met a banag, adda risgona. Ngem kas impaneknek ti Jollibee, adda met gunggona a magun-od no kasta a nakapilitayo iti mayat wenno napintas nga stocks.

Newspapers in Tagalog

Newspapers from Philippines

© PressReader. All rights reserved.