40 Padasem Daytoy, Kailian

Adda maitutop a ganagan a para laeng kadagiti nateng, wenno para laeng kadagiti pagay, ken sabsabali a mula.

Bannawag - - Itoy A Bilang - Ni ZAC B. SARIAN

TI kompania a Yara a masarakan ti kangrunaan nga opisinana idiay Norway ti kadakkelan nga agar-aramid kadagiti kemikal a ganagan iti sangalubongan.

Iti pannakiumanmi iti maysa kadagiti pangulo ti Yara, ni Renelle delos Santos, kinuna a dakkel ti pakaigidiatan dagiti kemikal a ganagan a partuat ti Yara. Kinapudnona, kuna ni Delos Santos a kaykayatda nga awagan dagiti produktoda iti “Premium Plant Nutrition Solutions” a saan ket a “fertilizer” wenno ganagan.

No apay, kinunana a maigidiat kadagiti gagangay a kemikal nga abono, addaan kadagiti babassit nga elemento. dagiti partuatda nga abono. Kas pagarigan, kinuna adda dagiti ganagan a magatgatang nga addaan laeng iti ramen a Nitroheno (N), Phosphorus (P), ken Potassium (K), wenno iti simple a naganna nga NPK. Ita, ti met Urea (46-0-0), 46 porsiento a Nitroheno ti ramenna. Ngem ti Urea a partuat ti Yara, naikkan iti sangkabassit a Zinc. Gapu iti daytoy, dakkel a bentahe ti maipapaayna.

Kas iti eksperimento a naaramid iti uneg ti dua a tawen iti Central Luzon State University (CLSU) iti Nueva Ecija. Naidilig ti

ordinario a Urea iti YaraVera Viking Ship Zn a Urea ng Yara. Ti resulta? Immabot iti 22 a porsiento ti nainayon iti apit a naabonuan iti Urea nga addaan iti Zinc.

Adda met report ti PhilRice a no maited ti kasapulan a Zinc dagiti pagay a mapaspasayakan, manayonan iti sangatonelada nga irik ti maapit iti kada ektaria.

Inadal dagiti eksperto manipud iti Yara dagiti kompleto a kasapulan dagiti nadumaduma a mula tapno makapataudda iti balansiado a pormulasion a maibagay iti kasapulan dagitoy a mula.

Kas koma iti saba. Adda pormulasionda nga aw-awaganda iti YaraMila Hydran a para iti daytoy. Addaan iti ramen a 19% a Nitroheno, 5% a Phosphorus ken 19% a Potassium. Nanayonan daytoy iti sangkabassit a Sulfur, Magnesium, Zinc, ken Boron. No maaramat daytoy a kas ganagan ti mula a saba, nadardaras a dumakkel ken dadakkel ken nadagdagsen dagiti bungana.

Sabali met ti pormulasion a para kadagiti nateng. Maaw-awagan daytoy iti YaraMila Winner. Addaan daytoy iti 15% a Nitroheno, 9% a Phosphorus, 20% a Potassium ken nanayonan iti Manganese, Magnesium, Zinc, ken Boron. Babaen daytoy, naparpardas a dumakkel dagiti nateng, ad-adu ti maapit, ken daddadakkel dagiti bungada.

Mairekrekomendar met kadagiti pagay a mapaspasayakan ti YaraMila Aktibo nga adda nainayon a Sulfur, Magnesium ken Boron iti ramen daytoy a 21% a Nitroheno, 6% a Phosphorus ken 12% a Potassium. Napintas pay a para mais.

Adu pay dagiti sabsabali a pormulasion ti Yara a para kadagiti sabsabali a mula. Ti dakkel a pakaidumaan ti Yara kadagiti ordinario a pormulasion dagiti ganagan, isu ti porma ti Nitroheno. Ti Nitroheno iti ordinario a Triple Katorse (14-14-14) wenno ti maaw-awagan iti “complete” ket adda iti porma nga “ammonium.” Saan a dagus a masepsep dagiti mula ti kastoy a porma ti Nitroheno. Nasken pay nga aglasat iti proseso a “nitrification.” Kas kuna ni Renelle delos Santos, bayat ti panagbalbaliw ti ammonium tapno agbalin a “nitrate,” mabalin a kagudua ti kinasamay ti Nitroheno ti mapukaw idinto a ti Nitroheno iti pormulasion ti Yara, addan iti porma daytoy a “nitrate.” Maaramat a dagus daytoy dagiti mula.

Adda pay maysa a bentahe ti Nitroheno a nitrate. Dina paalsemen ti daga a kas iti araramiden ti Nitroheno nga adda iti porma nga “ammonium.” Ti naalsem a daga, makapadakes kadagiti mula ken iti aglawlaw. No sobra ti kinaalsem ti daga, mabalin nga aglungtot dagiti ramut dagiti mula ket ngarud, saanda a makasepsep iti sustansia nga adda iti daga.

Ita, ammotayon nga adda met gayam pagdudumaan dagiti kemikal a ganagan.—O

Naparpardas met a dumakkel dagiti oil palm a maganaganan iti YaraMila Palmae.

Adda met ganagan a para iti saba, ti YaraMila Hydran.

Iti panagsukisok a naangay iti Central Luzon State University, ti panagaramat iti Urea nga addaan iti Zinc iti pinagayan, yaduna ti maapit iti 22 a porsiento.

Mapasayaat met ti apit a mais babaen ti YaraVita Aktibo nga abono.

Ti met YaraMila Winner ti mairekomendar a ganagan a para kadagiti nateng a kas iti sili.

Napintas met ti Calcium nitrate a produkto ti Yara a pagpasabong iti mangga.

Newspapers in Tagalog

Newspapers from Philippines

© PressReader. All rights reserved.