Ti Gasatmo Ita a Lawas

Bannawag - - Itoy A Bilang -

SAGITTARIUS (Nobiembre 23Disiembre 20). Adda dagiti maiwayatmo nga addang a mangpapuskol iti petakam. Masapul ketdi ti siento porsiento a panangiturong iti imatang iti daytoy ket mabalin a makatulong ti panangalam iti katulongan. Nagasat a numero: 2, 6, 9.

CAPRICORN (Disiembre 21- Enero 19). Iti pannakaamirismo nga adu ti mangnamnama kenka, malintegmo ti natiweng a taray ti luganmo. Manamnama dagiti mayetnag a napipintas a pangngeddeng a mangitunda iti pagtaenganyo kadagiti nalabon a grasia. Nagasat a numero: 3, 4, 7.

AQUARIUS (Enero 20- Pebrero 19). Pudno a nabuntog ti garawmo ngem ad-adayo met iti riro. Ad-adda ngarud a kinatanang ti masapulmo nangruna ket sangsanguem ita ti pakaseknan ti panguartaan ken ti puso. Mabalin ketdi a saankan nga umadayo tapno mapaggiddanmo dagitoy nga asikasuen. Nagasat a numero: 2, 5, 8.

PISCES (Pebrero 20- Marso 20). Pagyamanam ti pammadayaw nga ipaay kenka dagiti estranghero ngem ad-adda koma latta a mamatika iti makuna dagiti asideg kenka. Pudno a makasugat ti kinapudno ngem para met iti ad-adda a yaandur iti daytoy a biag. Nagasat a numero: 3, 4, 7.

ARIES (Marso 21- Abril 20). Agtalekka kadagiti makadkaduam ita a lawas. Makatulongka pay iti problemada babaen ti panagbalinmo a mammagbaga. Akuen ketdi a narimrimat dagiti idea dagitoy maipapan iti negosio wenno pagganaran. Awan ti mapukawmo; ketdi ad-adu ti maalam no imdengam ida iti daytoy a tay-ak. Nagasat a numero: 2, 6, 9.

TAURUS (Abril 21- Mayo 20). Maklaatka iti positibo a resulta ti panangpadasmo iti maysa a gannuat a sigud a kabutengmo a tingitingen. Maamirismo itan nga addaanka kadagiti naisangsangayan a talugading a no usarem ida iti umno, ad-adu pay a yamanem ti sumangbay kenka. Nagasat a numero: 1, 5, 8.

GEMINI (Mayo 21- Hunio 20). Ad-adda nga agirayka a kumadua kadagiti addaan iti kongkreto a plano ngem kadagiti addaan laeng kadagiti nainsabongan ken agkakasam-it a balikas. Ad-adda pay a rumangpayaka no ibinglaymo dagiti positibo a galad wenno talugadingmo. Nagasat a numero: 3, 4, 7.

CANCER (Hunio 21- Hulio 20). Pudno ti kunada a saan a kedngan ti libro iti pisikal a langana. Ngem ti pagilasinan ni suerte ita a lawas, makita iti pisikal a langa nupay saan a kankanayon a namaris. Maam-ammom ita a lawas ti tao nga agbalin a napateg iti biagmo. Nagasat a numero: 2, 6, 8.

LEO (Hulio 21- Agosto 20). Adda met nasayaat a maipaay dagiti bambanag a napidpidut. Ad-adda pay ketdi a naimbag ti gasatmo no masursurom ti agpaltuad wenno agparnuay babaen dagiti adda kenka a kabaelan. Nagasat a numero: 1, 5, 7.

VIRGO (Agosto 21- Septiembre 22). Sukimatem ti amin a posibilidad tapno ad-adda pay a mapatan-aymo ti biagmo. Sakbay a mangirusat iti addang, siguraduem nga umuna nga addaanka iti umdas a kabaelan. Nagasat a numero: 3, 5, 9.

LIBRA (Septiembre 23- Oktubre 22). Mapaksiat ti laladutmo no maamirismo a suerte ti adda iti sidong dagiti patpatgen iti inaldaw a panagbiag; nga adda dagiti agpipinnateg iti biag nga agaaddayo. Kalpasanna, mawanawanam metten dagiti oportunidad a naisangrat a para kenka. Nagasat a numero: 2, 4, 7.

SCORPIO (Oktubre 23- Nobiembre 22). Mangilatang iti tiempo tapno maamiris a nasayaat dagiti aramiden. Nakiro unay ti biagmo ta no saan a puro trabaho, puro lang-ay met ti obram. Masapulmo ti umno a templa. Nagasat a numero: 3, 6, 8.

Newspapers in Tagalog

Newspapers from Philippines

© PressReader. All rights reserved.