Haytek

Bannawag - - Itoy A Bilang - Ni MIGHTY C. RASING

PERMI ti kinahaytek ti lubongtayo ita. Depende kadagiti pelikula a nabuybuyatayon, kasla Robocop wenno sinantao ti robot ken kadawyan a makiranget iti gubat.

Ngem dagiti robot iti panawentayo, agnaedda kadagiti kompiuter, server, ken networks. Masansan a nairanta a tumulong iti pabrika wenno iti produksion dagitoy a robot. Ngem segun iti damag, nangrugin ti baro a panawen dagiti robot— addan anchor wenno announcer iti TV a robot.

Itay napan a lawas, inyalnag ti China babaen ti Xinhua News Agency ti robot a TV anchor (kitaen ti langa ti robot iti ladawan iti ngato). Naibasar iti pudno a tao daytoy nga anchor. Makasao daytoy iti Ingles ken mabalinna ti agtrabaho iti inaldaw nga awan sardengna. No kayatyo a buyaen no kasano ti panagreport daytoy a robot anchor, mapan iti daytoy a link: https://youtube/ GAfiATTQufk.

Segun iti Xinhua, mabalin nga adalen daytoy a robot no kasano nga agbasa iti damag dagiti tao a reporter iti TV ken social media. Kuna pay ti Xinhua a kabaelan daytoy a robot ti ag-host iti news program a kasla natural a tao. Ngem idi nangngeg daytoy dagiti propesional a news anchors, nagkatawada.

Saan ngamin a natural ti panagbasana kadagiti damag. Maysa pay, kurang iti emosion ti panangiparangna kadagiti damag. Saan laeng a dayta, nalabit, saanna a kabaelan ti aginterbiu kadagiti tattao kas iti ar-aramiden dagiti field reporters.

No agbasa laeng iti damdamag a makita met laeng kadagiti websites dagiti news agencies iti lubong, awan pakaidumaan daytoy kadagiti text-to-speech apps ken digital assistants a kas iti Siri ti Apple, Cortana ti Microsoft, ken Google Assistant. Kasla inikkanda laeng iti rupa ken bagi dagitoy a digital assistant.

Ngem nalabit, awan pagdanagantayo nga Ilokano. Ingles met laeng ti kabaelan a sawen daytoy a robot TV anchor. Nupay kasta, ipakpakita daytoy a proyekto ti ilalagto ti teknolohia ket no ditay’ annadan, alaenda dagiti trabahotayo a kas tao.—O

Newspapers in Tagalog

Newspapers from Philippines

© PressReader. All rights reserved.