Idi Un-unana a Panawen

Bannawag - - Itoy A Bilang - Ni SOLOMON V. GERNACIO

IDI un-unana a panawen, adda maysa nga ubing a nagsaludsod, “Agbalinakto ngata nga ari ken maaddaanakto iti korona?” “Maaddaankanto iti korona,” kinuna met ti Anghel, “ket addanto koronam.” “Ngem kasano a mapasamak dayta?” sinaludsod ti ubing. “Ay, dayta ti diak ammo,” kinuna ti Anghel, “ngem dar’sem! Agkutikan, ta atiddog ti dalan ket bassit ti oras!”

Isu a sinakayan ti ubing ti kabaliona ket dagus a pinatarayna. Iti dalanna, adu ti nasabatna; sinaludsodna no yan ti pagarian nga agur-uray iti mangituray iti daytoy nga ari.

Ngem madukotan ti amin ket awan ti makaibaga kenkuana no yan dayta a pagarian. Adda met agkuna nga uray isu, agdardaras, ta sapsapulenna met dayta a pagarian.

Naglabas ti panawen, ket ti ubing, dakkelen, ket kadagiti disso a napnapananna, tinultulonganna dagiti makasapul iti tulongna. No dadduma met, isu ti tultulongan dagiti tattao a masalsalaponna. Makaipapaay iti ragsak; maipapaayan met iti ragsak. Ken adu met ti bingayna a ladingit.

Agingga iti naliplipatannan ti panangsapsapulna iti pagarian ken ti arapaapna a maaddaan iti korona. Ngem ammona a ti turongenna, adayo pay, idinto a bumasbassiten ti orasna. Isu nga intuloyna ti nagdaliasat.

Ket daydi ubing, a nagbalin nga agkabannuag, nagbalinen a lakay; ti bagina, narukopen. Ket iti daydi nga aldaw a marigatanen nga umaddang, isu met ti pannakakitana iti maysa a ruangan, ket iti asideg ti ruangan, adda sadiay daydi Anghel a nakitana idi ubing pay.

“Dumanonka!” kinuna ti Anghel, “apagpagisu la unay ti isasangpetmo.”

Agtigtigerger, ngem nakarikna ketdi iti ragsak, inkarigatan ti lakay ti immasideg iti Anghel. “Inkarigatak ti nagal-alisto. Ngem adu ti nakatubeng kaniak iti dalan. Ita, nabannogakon, ket saanakon a makapagna pay iti adayo,” kinuna ti lakay. “Ket komusta ti panagdaliasatmo?” sinaludsod ti Anghel. “Ay,” kinuna ti lakay, “nasarakak ni ragsak, nasarakak met ni liday, ngem diak nasarakan ti pagarian ken ti korona a kunkunam.”

“Ngem kitaem!” kinuna ti anghel. “Adda kenkan ti koronam! Naaramid daytoy iti puro a pirak, sumilsileng, awanan milat! Ket ti bukodmo a pagarian, ti naganna ket Langit ket daytoy ti ruanganna!”—O

Newspapers in Tagalog

Newspapers from Philippines

© PressReader. All rights reserved.