Managsukisok Koma Met Dagiti Mannursuro

Bannawag - - Itoy A Bilang - Ni MARIO S. ASCUETA

TI maysa a saguday a rumbeng koma a paaddaen dagiti mannursuro, malaksid ti adda kadakuada a kinasirib kadagiti nadumaduma a paglaingan wenno asignatura, ket isu ti kinamanagsukisok.

Dakkel ngamin ti akem daytoy a saguday iti panangpasayaat iti kasasaad, saan laeng dagiti ubbing, no di pay ket iti sibubukel a sistema ti panangisuro ken panangidaulo kangrunaanna iti panangbalabala kadagiti desision. Daytoy ti ipagpaganetget ti agdama a sistema ti edukasion nga iti amin koma nga addang ken panggep, masapul a nakabasar iti pudno a kasasaad a maragpat laeng babaen ti panagsukisok.

Daytoy ti gapuna a naipaulog ti Bilin ti Departamento Bilang 16, Serye 2017 a mangbukbukel iti maysa a Research Management Team a mangipaay iti direksion ken mangilungalong kadagiti inisiatibo a mangpasayaat, mangyammo ken mangparegta iti kultura ti panagsukisok iti sibubukel a pagilian. Nabukel daytoy a pagalagadan gapu iti makita a nasayaat nga itden ti makunkuna a naibasar-iti-ebidensia a panagdesision kadagiti isu amin a sektor ti edukasion kangrunaanna iti klasrum.

Mamati ngamin ti Departamento a dagiti mannursuro met laeng ti makaited iti umisu a sungbat kadagiti agsasamusam a problema iti uneg ti pagadalan a pakairamanan ti kanayon a panaglangan dagiti ubbing, nababa a performance iti nadumaduma nga asignatura, kinaalikuteg, nakaro a kinamanagbabain, ken dadduma pay.

Babaen ti panangsurot kadagiti addang iti nainsiriban a panagsukisok, maitudo dagiti rason no apay ken kasano a ti maysa nga ubing ket kastoy ti galadna. Babaen dagiti mapaliiw a kababalin iti uneg ken ruar ti pagadalan, inayon pay ditan ti naammuan a kasasaad ti ubing iti uneg ti balayda, dita a makita no apay a kasta ti panagpampanunot, panaggaraw ken panagsasaona. Ket manipud met iti daytoy a duktal, maaddaan iti nalawag a direksion ti mannursuro no kasano a maagasan dayta a problema babaen dagiti adu nga istratehiana nga agisuro.

Ngarud, tapno ad-adda pay a maguyugoy ni mannursuro a mangirusat met iti bukodna a panagsukisok iti uneg ti klasrum, ken tapno ad-adda pay a sumayaat ti sistema ti panagisuro, insayangkat ti Departamento ti pannakapaadda ti pondo a tumulong kadagiti mannursuro a mangisayangkat kadagiti panagsukisok babaen ti makunkuna a Basic Education Research Fund.

Gapu itoy, saanen a marigatan ni mannursuro a mangisayangkat iti panagsukisokna. Saannan a problema dagiti papel, tinta, wenno ania pay dita a kasapulanna nga agsukisok.

Kas sagudayen ti bilin, mabalin a makadawat ni mannursuro iti agingga iti P30,000.00 a para kadagiti sukisok nga adda pakainaganna iti sistema ti panagisuro ken panagsursuro. Kadagiti met dadaulo dagiti pagadalan, mabalinda met ti dumawat agingga iti 150,000.00. Adda met latta nailatang a para kadagiti dadaulo iti dibision ken rehion kasta metten kadagiti adda iti babaenda.

Malaksid kadagitoy nga oportunidad, mainayon pay a puntos iti maysa a mannursuro no adda maiparangna a resulta ti panagsukisokna. Daytoy ket saan laeng nga iti Pagrukodan ti Naaramidanna no di pay ketdi iti puntosna iti assessment no kas pagarigan kayatna ti maital-o iti nangatngato a posision.

Adu dagiti tema a mabalin a pagpilian iti panagsukisok, kas koma: panagisuro ken panagsursuro, Disaster Risk Reduction, Child Protection, Human Resource Development, Governance, Gender and Development, ken Inclusive Education. Ti napintas ketdi, saan laeng a ti Departamento ti Edukasion ti mabalin a mangted iti pondo para iti pannakaipatungpal ti maysa a sukisok; mabalin a papondoan iti sabali pay nga ahensia nga addaan iti hurisdiksion wenno direkta nga adda pakainaganna iti agdama a masuksukisok. Kas pagarigan, kayat ni mannursuro ti agsukisok iti benneg ti Kultura ken Arte a lalo pay a mangparambak iti agdama a kasasaad ti kultura ti ili. Mabalinna nga idatag daytoy iti gobierno lokal ti ili wenno iti mismo a National Commission for Culture and the Arts (NCCA) ta adda nailatang a pondo a para iti panagsukisok para iti daytoy a tema.

Tapno ad-adda pay a mapilit dagiti mannursuro nga agsukisok, paset ti Objective ni Prinsipal iti Individual Performance and Review Form-na tapno iti kasta, isu ti manglitilit kadagiti mannursuro tapno igannuatda koma ti agsukisok kadagiti nadumaduma a tema tapno babaen daytoy, mapasayaatna, saan laeng a ti kasasaad dagiti adalanna no di pay ket ti kasasaadna a kas mannursuro.

Ar-aramiden met ti DepEd ti amin a wagas tapno masursuruan ti mannursuro no kasano nga agsukisok. Adda maar-aramid a Training-Seminar tapno mapabileg dagiti kabaelan dagiti mannursuro kangrunaanna iti panagaramid iti kabukbukodan a research.

Babaen dagitoy nga addang, manamnama nga ad-adda pay a sumayaat ti kalidad ti edukasion ket ad-adayo ti magteng dagiti agad-adal saan laeng nga iti benneg ti akademiko no di payen iti makunkuna a functional literacy wenno iti kabaelan a mangusar iti ammo wenno abilidad tapno masolbar dagiti problema a gagangay a mapaspasamak iti aglawlaw a mabalin a pagakupanda iti pirak kalpasan nga agturposda iti K-12 Program. Ket mapasamak laeng daytoy no managsukisok dagiti mannursuro.—O

Newspapers in Tagalog

Newspapers from Philippines

© PressReader. All rights reserved.