Nasungbatan a Kararag

Bannawag - - Siled Ti Kararag - Ni EUNICE ARÃO KAKUEKA ti Luanda, Angola

Basaentayo ti 1 Juan 5:11-15

“No umay ti riribuk, awagannak; ispalenkanto ket idaydayawnakto.”—Salmo 50:15

SUMAGMAMANON a tawen ti napalabas, nagbiahekami ken Bongue nga anakko sadiay Luanda tapno agatendar iti seminar a para kadagiti pastor. Nasipnget pay laeng idi inrugimi ti panagbiahemi. Kalpasan ti sumagmamano a minuto, adda immasideg a tallo a mannanakaw ket inggay-atda nga alaen dagiti petakami. Idi nagkedkedkami, pinaturongandakami iti paltog ken kinabkabildakami. Sa innalada dagiti petaka, sanikua ken kuartami.

Mano a lawas a nakariknaak iti gura, pannakapukpukaw ken buteng. Ngem napasnek ti panangikarkararagko iti Dios nga aprosanna koma ti puso dagiti tattao a nangdangran kadakami, ket no mabalin, maisubli koma dagiti petakami. Kalpasan ti innem a bulan, adda tallo a tattao a nagparang iti simbaan a pagserserbian a kas pastor ti anakko a ni Abraham. Insublida kenkuana ti petakak ket dinawatda nga ikararaganna isuda ken maawatda koma a makipaset iti dayta a simbaan.

Nagtrabaho ti Dios! Denggen ken sungbatan ti Dios dagiti kararagtayo. Saantay koma a liplipatan ti kari ti Dios: “Addaakto nga agnanayon kadakayo agingga iti panungpalan ti lubong” (Matt.28:20).

Kararag: Agyamankami, Apo Dios, iti ayat ken panangsalaknibmo kadakami manipud kadagiti nariribuk a panawen. Suruannakami nga agkararag nga awan sardayna. Ikararagmi iti nagan ni Jesukristo, a nangisuro kadakami nga agkararag: Amami sadi langit; Madaydayaw koma ti nasantuan a naganmo; Umay koma ti Pagariam; Matungpal koma ti pagayatam ditoy daga a kas sadi langit. Itedmo kadakami ti taraonmi ita nga aldaw; Pakawanennakami kadagiti basbasolmi, A kas iti pammakawanmi kadagiti nakabasol kadakami; Dinakam’ iturong iti nakaro a pakasuotan; Ilisinakami ketdi iti Managdakdakes”(Mateo 6:9-13). Amen.

Kapanunotan: “Ayatenyo dagiti kabusoryo ket ikararaganyo dagiti mangidadanes kadakayo” (Mateo 5:44).

Ikararagan: Dagiti agur-uray iti sungbat dagiti kararagda.

(Naadaw iti Siled ti Kararag, Paguummongan ti Sangalubongan Tapno Agkararag, Nobiembre-Disiembre 2018 a bilang. Impablaak ti Discipleship Resources-Philippines. Sarungkaran ti http://discipleshipresourcesphilippines.com wenno ag-e-mail iti [email protected])

Newspapers in Tagalog

Newspapers from Philippines

© PressReader. All rights reserved.