Asino Kadi ti Agar-arem Ita ken ni Angelica?

Bannawag - - Di Pay Naluto, Naibusen - Ni ANGELO ‘ELOY’ PADUA

UMISU a girlfriend ni Angelica Panganiban.

Dayta man ti makuna ni Zanjoe, ‘bagis.

Agkapareha dagitoy iti “Playhouse” ket mabalin a matmatnag ti rikna ni Zanjoe.

Kunana ketdi a dina arogen ni Angelica agingga nga agkaduada iti trabaho. Naadalan kanon. Ne! Maipalagip a maatap a naaddaanda iti relasion ken Bela Padilla idi nagkaduada iti maysa a teleserye, ket agingga ita, adda dagiti pasagid a paskil ni Bela.

Ayna! Ngem agurayka… Mabalin nga agpangadua ni Zanjoe a basta mangarem ken ni Angelica ta maisaysayangguseng met a posible ti panagsinnubliananda ken Carlo Aquino. Sa maysa, sumreken iti programa a “Playhouse” ni Carlo. ‘Tay kunada iti probinsia a ‘nabuhaw’ ni Zanjoe.

* * *

Adda met sayangguseng, ‘bagis, a pinadas ni Diego Loyzaga a kettelen ti bukodna a biag. Iti pannakasursurat daytoy, saanna pay a pinaglibakan. No pudno, nakaledleddaang ti kastoy a damag. Sapay koma ta malawlawagan ti panunot ni Diego.

* * *

Napintas ti 2018 para ken ni JM De Guzman, ‘bagis. Kampeon iti Himig Handog 2018 ti inyinterpretna a kanta a “Sa Mga Bituin Na Lamang Ibubulong.”

Kalkalpas ti teleserye nga “Araw Gabi” a nagbidaanda ken Barbie Imperial.

Ita, madama a maipabpabuya ti pelikula a “Kung Paano Siya Nawala” a nagbidaanda ken Rhian Ramos. Masiut-shooting met ti pelikula a pagbidaanda ken Arci Muñoz. Kuna ngarud dagiti kakadua iti showbiz, maikari unay a maikkan iti maikadua a gundaway ni JM.

Maipalagip a naaddaan iti parikut ni JM kadagiti napalabas a tawen gapu iti pannakailuodna iti maiparit nga agas.—O (Chairman ni Kabagis Eloy iti Hunta Direktiba ti FAMAS, HostProducer ti Celebrity Hour Media Forum, ken Trustee iti Aliw Awards Foundation, Inc.—AST)

ANGELICA

Newspapers in Tagalog

Newspapers from Philippines

© PressReader. All rights reserved.