Apay a Di Kayat ni Carlo ti Ag-I Love You Kadagiti Fans?

Bannawag - - Di Pay Naluto, Naibusen - Ni ANGELO ‘ELOY’ PADUA

ADDA serye ti konsierto da Carlo Aquino ken Matteo Guidicelli, ti “Matteo X Carlo.” Nakaay-ayat ta no adda agikkis iti “I love you” ken ni Matteo, sungbatan daytoy iti “I love you more” a kas iti sungbat no kua ni Sarah Geronimo kadagiti konsiertona.

Pagaammotayo met nga agayan-ayat da Matteo ken Sarah.

Kasta met a nakaay-ayat a no ni Carlo ti ikkisanda iti “I love you,” isungbat daytoy a madi mabalin a sumungbat iti “I love you too” wenno “I love you more” a kas ken ni Matteo. Apay? Masuron kano ni “dyowa.” Asino ni “dyowa”? Kunada met a ni Angelica Panganiban, ‘bagis. Nakaay-ayat met a kadua iti proyekto ni Dingdong Dantes, iti biang dagiti katrabahuanna.

Naparangarang daytoy a mangipasimudaag iti panangdayaw ken panangigigirna kadagiti katrabahuanna.

Kas pagarigan ken ni Eddie Gutierrez nga agakem nga amana iti “Cain at Abel,” dinayawna ti panangis-istoria daytoy kadagiti naaramidnan a pelikula ken iti panangtratarna kadagiti leksion iti biag.

Uray ni Dina Bonnevie nga agakem a madrastana (step mother) iti isu met laeng a teleserye, kuna ni Dingdong a nakallalagip ti programa ni Dina a “Ms. D” a nakaadalanna met laeng kadagiti leksion bayat ti kinaagtutubona.

Ni Dingdong, ‘bagis, isu ti makuna a bida iti pelikula ken pudno a biag. Ni gayam Judy Ann Santos ti yaramidan ni Erik Matti iti baro a pelikula.

Impagarup ngamin ti kaaduan a ni Sharon Cuneta ta idi imparparipirip pay laeng ni Direk Erik ti proyektona, inawaganna ni Judy Ann iti “mega icon.” Impagarup met dagiti fans a “megastar” ti “mega icon.”

Iti agsina a paskil da Direk Erik ken Judy Ann, mapan nga inton 2019 a maipabuya ti pelikula dagitoy a segun iti hashtag, napauluan daytoy iti “The Last Patient In San Francisco.” Kasla horror, aya?—O (Chairman ni Kabagis Eloy iti Hunta Direktiba ti FAMAS, HostProducer ti Celebrity Hour Media Forum, ken Trustee iti Aliw Awards Foundation, Inc.—AST)

CARLO

Newspapers in Tagalog

Newspapers from Philippines

© PressReader. All rights reserved.