Kudeta (38)

Naganit-it ti lugan da John. Nagpuligos ket kasla nagwerret ti sibubukel a lubongda.

Bannawag - - Itoy A Bilang - Nobela ni NORBERTO D. BUMANGLAG, JR.

Norberto D. Bumanglag, Jr.

Ti Napalabas: Kinidnapda ni Gloria ket sinaka ni John iti tulong da Ricky, Daniel ken Jerky. Rinautda ti warehouse a napanan dagiti nangala iti ransom. Nagkita met da Gloria ken ti Presidente. Imbaga ti Presidente nga awisen ni Gloria ni John a tumabuno iti panagtitipon dagiti kameng ti LMP-Ilocos. Iti rabii, nagkutin da Anwar. Pinatayda dagiti guardia iti kapitolio ket sinukatan ida dagiti kakaduada a nakauniporme a kas polis. Kasangsangpet da John ken Gloria iti hotel idi dumteng ni Senior Inspector Salvador, ti mangim-imbestigar iti pannakakidnap ni Gloria. Agdiag-jogging ni Melanie idi sitaren ti maysa a lalaki nga armado. Naglabanda ket napatayna daytoy. Pinakamat ni Anwar ngem pinatay latta ni Melanie dagitoy. Nangibaon ni Anwar iti sabali. Nagtaray da Melanie ken ti baket a nangisalakan kenkuana idi. Naglalabanda iti kamaisan. Dimmawat ni Melanie iti tulong ken ni John. Inawagan met ni John da Ricky, Daniel ken Jerky. Agur-uray da Melanie iti kamaisan idi mapaturonganda iti flashlight. Sinirigna iti largabista ti M-16 ti nadlawna a naggapuan dagiti rippiis.

(Maika-38 a Paset)

SUMINAN da John iti highway idi adda mangngegda a kanalbuong. Nakaat-atiddog ti naparnuay nga anit-it ta immayas pay ti luganda iti kellaat panagprenoda. Nagkiriring ti selpon ni John. Ni Daniel. “Ni ngata Melanie daydiay, manong?” sinaludsod ni Daniel. “Nalabit,” insungbat ni John. Insimpana ti Bluetooth iti lapayagna. Imbagana ken ni Daniel nga aginayadda tapno mapihoda no sadino ti paggapuan dagiti kanalbuong. Ken pinagtalinaedda a konektado dagiti selponda.

Nainayaden ti panagtaray ti luganda. Pakpakadaanda ti sumaruno a kanalbuong. Ngem nagtalnan ti aglawlaw. Addadan iti kalsada nga inipit ti kataltalonan. Adu ti mula a mais. Idi kuan, nakita ni John dagiti aggilapgilap a silaw iti kamaisan. “Daniel, three o’clock... Makitam dagiti silaw?” “10-4, manong. Isuda siguro dagitan.” Indayal ni John ti numero ti selpon nga inusar ni Melanie a nangawag kenkuana. Naminsan laeng a kiriring, nasungbatanen ti awag. “John?” Ni Melanie. “Where are you?” “In a cornfield. Inlemmengko ti baket. Pinanawak ta di unay makapagna.” “Sika ti pakaiturturongan dagiti flashlight?” “Wen.” “Can you hold your position?” “I’m running.” Mangngeg itan ni John ti napigsa a panagang-anges ni Melanie ken ti karasakas dagiti maiwalin ngata a bulong ti mais.

Insardeng ni John ti luganda sa nagdardarasda a dimsaag ken Ricky. Insaganada dagiti paltogda. Kasta met ti inaramid da Daniel ken Jerky.

“Any idea how many people are chasing you?” dinamag ni John ken ni Melanie. “Maybe two... I already killed one.” Timmaray da John ken Ricky a nagturong iti yan dagiti agsasallupang a silaw. Agarup agarudokda ta napuskol ti bulong dagiti mais.

“We are right behind those guys. Can you stop, take your position and then shoot at those SOBs?” kinuna manen ni John ken ni Melanie.

“Yes...” nagsardeng dagiti karasakas a mangngeg ni John. “Nakasardengakon. Umas-asidegda kaniak. Ur-urayek laeng a makitak ida...”

“Good. Saanka a madanagan. We are right here. You are safe.”

“YOU are safe,” nagallangogan iti panunot ni Melanie ti naudi a kinuna ni John. Kasano a natalged no uray ditoy Filipinas, umar-arubayan latta ti peggad kenkuana? Naimbag pay idi napukawna ti panunotna, nakataltalna ti biagna. Awan ti parikutna. Awan ti mariknana a peggad. Naragsak iti denna ti baket nga agbibiag a siuulimek iti putputong a disso. Agsidada iti nateng a mula ti baket iti arubayanna. Pasaray mapanda agkalap iti karayan. Babassit nga ikan ti maalada ngem imasenna. Pasaray met agparti ti baket iti manok. Ken binigat nga aglingta iti itlog. Awanen sapulenna pay iti biag. Ita, agpeggad manen. Nasinga ti lagipna iti pannakaibuang ti napigsa a putok ti paltog. Siniripna a dagus ti night vision a naikapet iti paltogna. Inkawitna ti tammudona iti gatilio daytoy.

“One down!” naipukkaw manipud iti saan unay nga adayo. Timek ni John.

Nabang-aran. Adda pay maysa a kalabanda. Ngem naiddepen dagiti silaw dagiti flashlight. Nakasipsipngeten.

Nagpaliiw laeng ni Melanie. Nakataltalna, dina inyadayo dagiti matana iti night vission. Adda makitana nga aggargaraw. Umas-asideg ngem saanna a malasin. Nasken a siguraduenna ta amangan no ni John. Naguray. Nataltalna itan ti riknana ta addan ni John. Umas-asideg ti rippiis dagiti mais a mapayat. Malasinnan ti umas-asideg. Barbasan. Aglanglanga a Muslim. Sinirigna. Tinengngelna ti angesna. Kinalbitna ti gatilio ti paltogna. Simbuag ti napigsa a kanalbuong ti M-16.

NAKAPARPARDAS ti panagtaray ti bunggoy ni Anwar. Sangapuloda amin. Agpapadada a nagtagipaltog. Nakangngegda ti uni ti paltog. Ammona lattan a dagiti taona dagiti makilablaban. No apay a kasla masirmatana a dagiti taona ti mapursing a saan ketdi a dagiti kabusorda tunggal makangngeg iti putok.

Agrasrasaw iti panunotna. Babai laeng sa agmaymaysa pay sa ibusenna ida? Naglaing ketdin ti sinal-it a babai. Makapungtot lattan. Kayatna a derderen iti bala dayta a babai! “Alpha to Hassan... Alpha to Hassan... can you hear me?” inradiona. Awan ti simmungbat. Ket nauunegen ti panagangesna. “Alpha to Hasssan, Alpha to Hassan,” inulitna. Ngem kaskasdi nga awan ti simmungbat.

Nayesngawnan ti rasawna. Nakapigpigsa. Uray la a tinaliaw dagiti kakaduana. Uppaten dagiti taona a natay. Ket dagiti tallo nga imbaonna a mangsapul iti daydiay a babai, natayda ngata metten? Bumasbassiten ti bilangda. Numona ta kasapulanna ida inton bigat. Kasapulanna ti adu a tao. Saan a mabalin a mapaayda iti misionda.

Maysa pay nga uni ti paltog ti immaweng iti saan unay nga adayo kadakuada.

“Sa maisan! Nandoon sila,” inriaw ni Anwar ket nagwaras dagiti taona iti minaisan.

TIMMAKDER ni Melanie a nakapaturong pay laeng ti paltogna iti nakitana a nakaudatalan ti lalaki a pinaltoganna. Nakaan-annad nga immasideg iti daytoy. Saanen nga aggunggunay ti lalaki. Agdigdigos iti bukodna a dara.

Pinidut ni Melanie ti igiggaman ti lalaki a flashlight. Pinasgedna sa impaturongna iti aglawlawna. “John!” inyikkisna.

“Melanie!” nangngegna nga insungbat ni John.

Impaturongna ti lawag ti flashlight iti rupa ti nakitana nga umas-asideg iti yanna. Nagdalugudog ti barukongna. Imbabana ti flashlight-na. Nagtaray a nangsabat ken ni John nga agtartaray metten. Naginnarakupda. Nairut. Immudumod ni Melanie ti rupana iti nabisked a barukong ni John. Agingga a nagsarak dagiti bibigda. Nagdinningpil dagiti bibigda nga agpada a nawawan. Agpadada nga umanangsab idi agsina dagiti bibigda. Ni John ti immuna a rimmuk-at. Kimmita iti aglawlaw. “Naibusdan,” kinuna ni Melanie. Inarakup manen ni John ni Melanie. “I missed you, hon,” kinuna ni Melanie. “I missed you too so much, hon,” insungbat ni John. Piniselna dagiti dakulap ti balasang. “How are you? What happened to you? Kunak no nataykan. Nabayag a sinapsapulka.”

“Almost, hon. Almost...” rimmuk-at ni Melanie ta nalagipna ti baket. Saan a nagun-uni, nagtaray a napan iti nangilemmenganna iti baket. Simmurot ni John a masmasdaaw. Nagsardeng ni Melanie iti nangato a tambak a naraber ti ruotna. Impaturong ni Melanie ti flashlight iti kadadakkelan ti ruotna. Adda dita ti baket a nagkalunikon. “Umaykayon, nana, awandan,” kinuna ni Melanie. Inyangad ti baket ti ulona. Kimmita ken ni Melanie sa nagbawing ken ni John. “Gayyemko, nana. Isu inawagak itay. Immaynata tinulongan.” Tinulongan ni Melanie a timmakder ti baket. Agkakapsut daytoy nga immarakup ken ni Melanie.

“Kayatkon ti agawid idiay balay, anakko,” kinuna ti baket nga aglulua.

“Saan, nana... Napeggad. Papatayendaka la ketdi. Sumurotka kaniak. Sanka a baybay-an...” Inarakup ni Melanie ti baket. Nagkiriring ti selpon ni John. Aw-awagan ni Daniel. Sinungbatan a dagus ni John. “Intayon, manong. Adda nasaripatpatanmi nga adu a nagtagiarmas a sumungsungad,” kinuna a dagus ni Daniel.

“Hon, let’s go. More enemies approaching,” kinuna ni John ken ni Melanie.

Inatibay ni Melanie ti baket. Nagaabayda a timmarayda. Ngem

naarus a dagus da Malanie ken ti baket. Sinubli ni John ida.

“Saan a makapagna a naimbag. Nabannogen,” kinuna ni Melanie.

Immasideg ni John iti baket. “Nana, bagkatenka,” kinuna ni John.

Saanen nga inuray ni John ti sungbat ti baket. Binagkatna a dagus daytoy. Nagtarayda a nagturong iti yan da Daniel.

“Manong, asidegdan,” timek manen ni Daniel manipud iti bluetooth. “Darsenyo.”

“Umaykamin,” kinuna ni John ket imparpardasna pay ti timmaray. Sumarsaruno latta met ni Melanie.

PIMMIDEG ni Daniel iti van. Nakaparabaw ti M-4-na iti hood ti lugan. Kaab-abayna ni Ricky a nakaiggem met iti kalibre .45. Adda ni Jerky iti likud. Nakasagana metten ti paltogna nga M-4. Nupay pangadaywenda pay laeng, makitkitadan dagiti adu a nagtagiarmas nga umas-asideg iti yanda. Ur-urayenda a makaasideg bassit dagitoy sakbay a rugianda a paltogan ida. “Status, Ricky?” timek ni John manipud iti bluetooth. “Unknown number of enemies approaching, John... It could be ten or more. But we are ready,” insungbat ni Ricky. “We are close. Open the SUV. I’m carrying a frail old woman.” “It’s open, John.” Pagammuan la ta nagparakapak dagiti paltog. Nagkanaltiing ti diding ti van a sarubsoben dagiti bala. Nagkul-ob da Ricky ken Daniel. Naglemmeng met ni Jerky. Saanda a makasublat a pumaltog ta di agsarday ti panangpaltogda kadakuada. “We are getting fired at, John... How far are you?” “Close. I can see the van now.” Saan nga agsarday ti panangpaltog dagiti kabusor kadakuada. Pasaray bumales ni Ricky ngem saanna man laeng a maitungraraw ti ulona. Kasta met ni Daniel. Pumaltog a dina makita dagiti palpaltoganna. Sumanengseng dagiti aglabas a bala iti ngatuenda. No maaddaanda iti tiempo, aggigiddanda a pumaltog. Ngem nasipnget. Narigat a mapuntiria dagiti kabusorda.

Saan a nagbayag, addan da John. Inluganna ti baket iti nakalukat a Lexus. Naimbag laengen ta nalingdan ti van ti Lexus isu a nawayada.

Imbes a lumugan ni Melanie, nagturong iti nagpidegan da Ricky. “No, hon... We have to go,” inlapped ni John. “We have to fight them,” insungbat ni Melanie. “We will do that some other day. And this is not the time, hon.” “We are not rereating, hon...” “We are not... we are not afraid. But there are times we are not in a better position to face the enemy. And it’s not worth dying if it’s a losing battle. We’ll fight them another day. Come on, let’s go!”

Nagsay-a ni Melanie, ngem nagtungpal met laeng. Limmugan iti SUV. Limmugan met ni John. “Ricky, let’s go!” “Go ahead. Drive away and we’ll cover you. We will be right behind you.”

Pinagandar ni John ti Lexus. Pinagkul-obda ti baket iti datar ti lugan idinto nga insagana ni Melanie ti M-16-na. “Are you ready, hon?” sinaludsod ni John. Nagtung-ed ni Melanie. Binaddekan ni John ti siliniador. Nagatibuor pay ti ligay a nangikur-ay kadagiti darat ken bato a gabur ti kalsada a di pay nasemento. Nagalibungabong ti nakabengbengbeng a tapok, a nangkumot iti van. Kellaat, kasla naibiat daytoy a rimmuar iti kapuskolan ti tapok ket nakapaspaspasen nga immadayo.

Ginundawayan met dayta da Ricky, Daniel ken Jerky a limmugan iti van. Impalnek a dagus ni Daniel ti silinidor ket nakapaspasda metten a pimmanaw.

Kasta unay a pungtot ni Anwar a nagradio iti base-da. “Sabatenyo ida!” imbilinna.

KALTAANG ti rabii. Nakasipsipnget ti kuarto. Ken nakaululimek. Singsingaen laeng ti kiriring ti selpon. Agsardeng iti apagbiit sa manen agkiriring. Sublaten ti apagasngaw nga urok, sa sippayoten manen ti kiriring ti selpon. Madamdama pay, naggunay ti babai iti katre. Nagareng-eng.

Masadsadut a nagkarawa iti lampshade nga adda iti abayna. Saanna a makita ta adda tapar dagiti matana. Aramidna dayta tapno nair-irut ti turogna.

Naganaraar ti lawag iti uneg ti kuarto. Nagkarawa iti night stand ta ammona a dita ti nangidissuanna iti selponna. Nagammatanna ti selpon.

“Puta! Aniaka, kasla matmaturog a beklat?” nakapigpigsa a bugkaw ti immawag.

Nalasin a dagus ni Gloria no asino daytoy. “Anong nangyari sa iyo?” nakakapkapuy ti timek ni Gloria. Kasla dina kayat nga adda makangngeg kenkuana. “Huwag ka nang magmaang-maangan pa!” Nagsao ni Gloria iti dakes. “Ania, aya, dayta nga ibagbagam?” kinunana a makasuron ngem nakakapkapsut latta ti timekna. “Ket apay nga agar-arasaaska?” “Adda ditoy ni John...” Nagrasaw ti immawag. “Talaga a nadadaelen ti utekmo! Puta...” “Dika man agsasao iti kasta!” makaungeten ni Gloria. “Yan ni John?” “Adda ditoy. Matmaturog.” “Kitaem man!” Ad-addan ti pungtot ni Gloria. “Talagang walang hiya ka. Diak ammo no apay a tultulonganka!” “Saannak a tultulongan. Sika ti tultulongak.” “Shut up!” Inikkat ni Gloria ti maskarana. Napurar iti lawag. Ngem dimmakkel dagiti matana idi kitaenna ti abay ti katrena. Awan ni John. “Shit,” nayesngawna. “Kaab-abaymo ni John?” ibugkaw manen ti immawag. “Saan...” nakakapkapuy ti timek ni Gloria. “Dayta laeng mangrienda iti dayta a lalaki ti naited a trabahom dimo pay maaramid.”

“Shut up!” inyikkis ni Gloria ngem sabalin ti adda iti panunotna. Makapungtot payen. Yan ni John? Inwalinna ti ulesna ket iti itatakderna, natinnag ti maysa a papel. Pinidutna. Surat ni John.

“Sorry, Glory, but I have to do something. I’m going to mom’s home... I will be back in the morning... John. “Addaka kadi ni John dita?” “A-awan,” nakapuy latta ti timek ni Gloria ngem saannan a masbaalan ti suronna. “Okey lang... isu met ti ar-arapaapem a lalaki,” nagkatawa ti immawag. “Shut up!” Dadakkelen ti anges ni Gloria. Mangemkemkem. Nagalintatao iti panunotna ti rupa ni John. Kayatna a karurod daytoy. Ngem kasla saanna a kabaelan a guraen. Iti panagdekket laeng dagiti bagida, mapukawnan ti amin a gurana iti daytoy. No dadduma, marimen pay ketdin iti bagina ta kasla insubona lattan ti bagina iti lalaki nga agdadata a saannanto a pulos a matagikua.

Napaanges iti nauneg. Nagmalanga iti apagapaman, sa nakunana iti bagina: Saan met a nasken nga adda makatagikua kenkuana?

“Napananna?” natiag iti saludsod ti lalaki iti bangir a linia. “Iti balay ti inana,” kinunana ket leppay dagiti abagana a nagtugaw iti kama.

NAKAPARPARDAS ti panagpataray ni John. Makitana iti rearview mirror a sumarsaruno kadakuada ti lugan da Daniel. Naadaywandan dagiti mangpalpaltog kadakuada. Nakaul-ulimeken ti kalsada a pampanurnorenda. “Mapantayo iti hotel, hon,” kinuna ni Melanie. “I’m taking you home,” kinuna ni John. Nagwingiwing ni Melanie. “Saan. Napeggad unay saan laeng kaniak no di pay ket kadakayo– ni mamangmo ken ni Jay-ar.” “Saan. Siak ti makaammo.” “Saanmo nga ammo ti napasamak, hon... Dimo ammo no ania a peggad ti sangsanguek.”

“Saan a siksika, hon... Data. Bay-annak nga agdesision. Panagkunak, ammokon ti napasamak. Sanguenta a dua daytoy. Ta ania man nga inaramidda kenka, kasla inaramidda metten kaniak...”

Saan a nakauni ni Melanie. Kinagatna ketdi dagiti bibigna.

“I thought I was gonna die, hon... That I won’t see you again. I can’t believe, he could do that to me.”

“He...” inulit ni John dayta a balikas ngem iti nakemna laeng. Kasla ammona dayta a ‘he.’ “Please don’t say anything anymore...”

“Naimbag laeng ta adda ni nana a nangisalakan kaniak. No awan, bangkayak koman a dimo nakita.” Tinaliaw ni Melanie ti baket nga adda iti likud.

Liningay met ni John ti rearview mirror. Nakitana ti rupa ti baket a kasla nakaun-uneg ti pampanunotenna. Blangko dagiti matana. Nalabit a mabutbuteng ken masmasdaaw no ania ti mapaspasamak. “Okeyka met laeng, nana?” sinaludsod ni John. Saan a simmungbat ti baket. Kasla awan nangngegna.

“Nana...” ni Melanie ti nangpaguni iti baket. Timmaliaw ti baket kenkuana. “Okeyka kano met laeng, nana?”

Immisem ti baket. “Wen, nakkong,” insungbatna. “Papanantayo, anakko?” sinaludsod ti baket ken ni Melanie. “’Diay balayda, nana,” insungbat ni Melanie. “Mabiitak laeng... isublidakto met laeng iti balayko,” kinuna ti baket.

“W-wen, nana... wen,” inyanumong lattan ni Melanie ngem iti panunotna, saanna nga isubli ti baket agingga a dina masigurado nga awanen ti mangdangran kenkuana. Impategnan ti baket ket saanna nga ipalubos nga adda mangdangran kenkuana.

Insubli ni John ti imatangna iti kalsada. Apagisu a masungadda ti maysa a kursada. Kellaat, nagparang ti maysa a lugan. Nakapaspaspas a nangipig kadakuada.

Napakiet ni John! Binaddekanna ti siliniador sa inawidna ti manibela tapno maliklikanna ti lugan. Ngem napaspas met ti lugan. Ket dinungparen daytoy ti sikig a kutit ti Lexus. Naganit-it ti luganda. Nagpuligos ket kasla nagwerret ti sibubukel a lubongda. (Maituloyto)

Newspapers in Tagalog

Newspapers from Philippines

© PressReader. All rights reserved.