Intayon Ulien ti Mt. Ulap ti Itogon

Bannawag - - Itoy A Bilang - Estela A. Bisquera- Guerrero

ITI laksid ti panangbasnot da Bagyo Ompong ken Bagyo Rosita iti Amianan a Luzon a pakairamananen ti Cordillera itay di pay unay nabayag, di kinabaelan dagitoy a bagyo nga inlupek ti kinapusaksak ti nakaparsuaan iti Itogon. Makunak daytoy ta iti yuulimi iti Mt. Ulap, ti bantay nga ipampannakkel ti Brgy. Ampucao (iti ili ti Itogon), iti laksid dagiti makita pay laeng a kayo a sinip-ak dagiti dimmalan a bagyo, bimmusnag met ti kaaduan agraman dagiti atap a mula kada ruot iti aglawlaw. Nabunga dagiti berries kasta metten a kasla nayaplag a “carpet” ti ruot. Makaay-ayo ken makapabang-ar ti langa ti naberde nga aglawlaw.

Wen, adda iti Barangay Ampucao iti ili ti Itogon ti Mt. Ulap. No awan bukodmo a lugan nga umay ditoy, mabalinmo ti aglugan iti jeepney; adda ti terminal dagiti jeepney nga agpa-Ampucao iti sango ti Baguio Center Mall, kaabay laeng ti Orion Drugstore iti Lakandula St., Baguio City. Sapulen ti jeepney nga adda karatulana nga Ampucao wenno Samoyao. Alas sais iti bigat ti umuna a biahe ket alas siete met iti rabii ti maudi a biahe. Ketdi, no aggapukan iti Ampucao, alas singko iti malem ti maudi a biahe.

No addakan iti Ampucao, mapankayo nga umuna iti Barangay Hall ta agrehistrokayo pay. Sangagasut ti pagparehistro; P600 met ti bayadam a para iti “tour guide.” Masapul nga adda latta “tour guide” ti mapan idiay Mt. Ulap ta adu dagiti desdes ket no sabali ti maturongyo a desdes, nalabit saan a ti tuktok (summit) ti Mt. Ulap ti maturongyo no

di ketdi agsublikayo iti Baguio City a diyo mapupuotan. No saan met, maturongyo ti Camp 4 iti Kennon Road.

Kadagitay naridam, iti alas singko iti agsapa, silulukaten ti Ampucao Barangay Hall para kadagiti agrehistro. Iti alas singko media, mabalinen ti umuli.

Iti ipapanmi iti Ampucao, sinapsapami ti napan ta napintas ti buya ti ileleggak ti init ditoy. Mayarngi daytoy iti buya ti ileleggak ti init a ranrantaen dagiti mapan ag-camping idiay Mt. Pulag. Kasano ngamin ket masaripatpatan met ti ulo ti Mt. Pulag no addakan iti tuktok ti Mt. Ulap.

Iti yuulimi iti Mt. Ulap, wen, adda rigrigatna, ta sumang-atka ngarud, ngem awan kaimudingan daytoy iti ragsak ken ray-awmi a nakakita iti kinadaeg ti nakaparsuaan ken iti pannakalang-abmo iti banglo ti ayamuom ti saleng. Daytoy a banglo ti saleng ti kanayon a sumabet idi kadagiti turista no umayda bumisita iti Baguio City. Ngem, daksanggasat, ta awan met unayen saleng iti Kennon Rd. Ngem no umulikayo iti Mt. Ulap, mapadasanyo ti kanayon nga ibagbaga dagiti immuna a simmang-at iti Siudad ti Saleng nga ayamuom ti saleng.

Kadagiti naayat nga ag-selfie, maragsakanda la ketdi a makakita iti Gungal Rock. Ipakita ti Gungal Rock nga awan makaartap iti Namarsua no maipapan iti “landscaping.” Nakakakasdaaw ti pannakasalansan dagiti nagdadakkel a bato iti derraas iti bantay. Ketdi, saan a nakabutbuteng ta kasla met nairanta a naintar dagiti kayo a saleng iti sakanan ti derraas.

Ngem ti dakkel a nakakayawan ti riknak ket ti idadanonmi iti “summit” wenno ti tuktok ti Mt. Ulap. Naragsakanak saan a gapu ta napaneknekak a natibker pay met laeng gayam dagiti tumengko a kumalay-at iti bantay no di ketdi nasaripatpatak ti di maaramid ti tao a nakapinpintas a “landscape” ti nakaparsuaan. Kasla gawgaw-atemon ti langit no addaka iti tuktok ti Mt. Ulap. Asidegen ti langit, umasideg met ti rikna ken pammati nga adda Namarsua ta naisangsangayan ti matmatmatan a buya.—O

Ti autor (kanawan) bayat ti panagin-inana sakbay nga ituloyna ti mapan iti tuktok ti Mt. Ulap (1,846 a metro ti kangatona manipud iti rabaw ti baybay).

Iti sungadan ti sang-atan a mapan iti tuktok Mt. Ulap (mapan a 8 a kilometro ti kaadayona) sarabuennaka dagitoy aruaten dagiti Igorot. Mabalinmo ti mangisuot iti ania man kadagitoy sa agpapiktiurka. Mangibatika laeng iti sangkabassit a donasion.

Gangganasen ti autor ti agpurpuros iti wild berries. Ngem saan a maibalakad a daytoy laeng ti kanen ti umuli iti Mt. Ulap. Maibalakad ti panagbalon iti danum ken makan ta awan ti paggatangan iti uray ania kadagiti camp site wenno paginanaan a paset ti “Mt. Ulap Eco-Trail.”

Buya iti asideg ti tuktok ti Mt. Ulap.

Newspapers in Tagalog

Newspapers from Philippines

© PressReader. All rights reserved.