Dagiti Kronika iti Lasag Dagiti Bagwes

Bannawag - - Itoy A Bilang - Derick A. Tong-alan

Dinamagko kadagiti gangsa, apay a dikay agtoktokar?

Nabannogkay kadin a mapatpatit? Dinamag dagiti gangsa iti apuy, apay a dikan agsalsala?

Nabannogka kadin a masungsungrodan? Dinamag ti apuy iti wanes, apay a dikan agpaypayapay?

Nabannogka kadin a maipulpulipol? Ngem di nagkir-in ti wanes ket nagsaludsod iti gaman,

di nagkir-in ti gaman ket kinissimanna ti pika. Ti pika, nagdamag ken ni kasay, ngem ti kasay,

naulimek a mangmatmatmat iti aglumlumot a papatayan. Dinamag kaniak ti papatayan, apay a dikan agdaydayyeng?

Nabannogka kadin nga agsapo? Ngarud dinamagko iti bagik, ngem nagtokar dagiti gangsa,

saan a tokar a nakaisigudan ngem tokar ti panagalsa Nasungrodan ti temtem, saan laeng a tapno agsala ti apuy

ngem tapno agipugso iti dara. Naipulipol ti wanes, saan nga iti nakaisigudan a wagas,

ngem tapno mabayadan ti panagalsa ken mapuoran dagiti dara! Kinarit ti wanes ti gaman ket nagririda ken pika. Inuyotan ti pika ti kasay, ngem napasag ketdi dagitoy

nga agpapada iti marmarba a papatayan. Saanakon nga agsapo ken agdayyeng, awanen ti mamaayna. --DERICK A. TONG-ALAN Kaipapanan dagiti balikas a Maeng-Kankanaey iti Ilokano: Wanes - baag nga addan iti nadumaduma a simbolo Gaman - kampilan wenno buneng Kasay - pagsangga Papatayan - altar a batbato a pakaaramidan dagiti ritual sakbay iti dap-ay Sapo - ritual iti panagkararag

Newspapers in Tagalog

Newspapers from Philippines

© PressReader. All rights reserved.