No Adda Sigsigloten, Adda Met Warwaren

Bannawag - - Itoy A Bilang - Ni ANNA LIZA MADAYAG GASPAR, CPA

(Maikadua iti Tallo a Paset)

SAKBAY a makagatang ken makalakoka kadagiti stocks dagiti kompania a kameng ti Philippine Stock Exchange (PSE), masapul nga adda account-mo iti maysa a brokerage firm. Kas met laeng iti maysa a banko, kaka. Sakbay a makai-deposit ken makai-withdraw-ka iti kuarta, masapul, a, nga adda account-mo.

Iti agdama, adda tallo a broker nga us-usarek iti panag-invest iti stock market. Ngem sakbay man a saggaysaek dagiti nadumaduma a bentahe ken disbentaheda, dagitoy man pay ti sumagmamano a termino a masapul a maammuantayo.

1. Stock Price. Daytoy ti gatad a pakailakuan ti stocks ti kompania ken isu met ti presio a bayadan ti mayat a gumatang— ta awan met magatang no awan aglako. No basaen ti stock market updates nga imalmaldit dagiti pagiwarnak iti inaldaw, maibaga dita dagiti opening ken closing prices, ken low ken high prices. Ti opening price, isu ti presio ti umuna a nailako/nagatang ken ti closing price, isu ti presio ti naudi a nailako/ nagatang iti dayta nga aldaw. Ti low price, isu ti kabababaan a presio a nakailakuan/ nagatang ti dayta nga stocks iti dayta nga aldaw. High price met ‘diay kangangatuan. No stock price kunatayo, closing price no kua ti kayattayo a sawen.

2. Board Lot. Isu daytoy ti kababaan a bilang ti stocks iti kada transaction. Agsasabali ti lot dagiti stocks. Depende daytoy iti stock price. Kas pagarigan ti Jollibee (PSE: JFC), 10 nga stocks ti adda iti maysa a board lot-na. Masapul ngarud a daytoy wenno ti multiples daytoy (20, 30, 40, ken agpangato) ti magatang/mailako a JFC. Ti met BPI, kasta met a 10 ti board lot daytoy. Ngem ti Globe a PhP2,090 idi Oktubre 31, 2018, 5 nga stocks ti board lot-na.

3. Odd Lot. Sagpaminsan, adda met dagiti aglako/gumatang iti makunkuna nga Odd Lot. Isu daytoy ti bilang ti stocks a nakurang iti board lot. Masansan nga agibunong dagiti kompania iti stock rights ket agresulta daytoy iti bilang ti stocks a kurang iti board lot. No ilako ti maysa nga stockholder daytoy, maawagan iti odd lot.

4. Trade. Daytoy ti awag iti panaggatang/panaglako iti stocks. No gumatang wenno aglakoka, kunada no kua, ag-trade-ka.

5. Transaction Amount. Gatad ti nagatang/nailako nga stocks. Kas pagarigan ti JFC. No maysa a board lot ti ginatangmo idi Oktubre 31 a PhP276.00 ti maysa a JF stock, PhP 2,760 ngarud ti transaction amount daytoy a trade.

6. Fees ken Charges. Gapu ta maysa a business transaction ti panag-invest iti stock market, adda met ngarud fees ken charges a bayadan ti gumatang ken aglako iti stocks. Kas kadagitoy:

Commission ti Broker. Gapu ngarud ta mausar ti serbisio ti broker no kasta a gumatang ken aglakoka iti stocks, agpabayad met, a. Iti kada trade, 1.5% ti balor ti nagatang/nalako nga stocks ti commission ti broker wenno PhP20, ania man ti nangatngato. Adda pay mainayon a value-added tax ti commission.

SCCP wenno Clearing Fee. Ti Securities Clearing Corporation of the Philippines (SCCP) ket isu ti pangipasigurado a dagiti magatang nga stocks, mapan met laeng iti gimmatang ket ti naigatang (kuarta) mapan met laeng iti naglako. Mapan a 0.01% ti transaction amount ti makuenta a clearing fee iti kada trade.

PSE Transaction Fee. Singiren met daytoy ti Philippine Stock Market nga agpapaay a merkado wenno tiendaan (paglakuan/paggatangan) kadagiti stocks. Mapan a 0.005% ti transaction amount no kua.

Sales Tax. Masingir laeng daytoy kadagiti aglako iti stocks. Mapan a 0.5% daytoy ti transaction amount. No adda kayatyo a damagen wenno adda komentoyo, ag-PM-kayo ken ni Anna Liza iti www.facebook.com/annalizamgaspar.--Editor

Newspapers in Tagalog

Newspapers from Philippines

© PressReader. All rights reserved.