Saludsodem ken ni Apo Hues

Bannawag - - Itoy A Bilang - Ni RTC Judge JOVEN F. COSTALES (Ret.)

SALUDSOD:

Dua a tawen itan ti napalabas idi gatangenmi ti ag-200 a metro kuadrado a daga nga as-asikasuen ti maysa a dati a kaeskuelak iti hayskul ken nasinged a gayyem ken adda pay bassit a panagkabagianmi. Kuna kano ti akindaga (nga adda idiay Manila) nga ilaklakona ti dagana isu nga ibirbirok met ‘toy gayyemko iti gumatang. Gapu ta kayatmi met ti maaddaan iti bukod a daga a pangipatakderanminto iti balaymi, ginatangmi ti nasao a daga babaen daytoy nasinged a gayyemko. Agpateg iti P300,000 ti lote ket nangtedkami iti pauna a P120,000. Nangted ti gayyemko iti resibo. Iti maikadua, inikkanmi manen ti gayyemko iti P60,000 ket insuratna met dayta a kantidad. Kinunana pay nga itednanto ti dokumento ti gatang a pinirmaan ti akindaga. Awan ti impakitana a deklarasion ti daga ngem saanmin nga inkaso daytoy ta dakkel ti panagtalekmi kenkuana.

Sumagmamano a bulanen ti napalabas, napankami iti gayyemko tapno alaenmi ti inkarina a dokumento ti gatang. Ngem kunana a di pay nalpas ta santo la kano pirmaan ‘diay akindaga inton mabayadanmin amin. Sinurnadanmi ngarud itay nabiit ket kinunami nga inkamin ited ti balansemi iti akinkukua iti daga ngem nakigtotkami iti kinunana a natay kanon ti akinkukua iti daga.

Gapu ta kasta ti imbagana, kinunami nga isublina la ngaruden daydi intedmi a P180,000.00. Insungbatna met nga intedna kano iti akindaga. Ngem kasano a singirenmi ti natay ken dimi met ammo no yanna idiay Manila? Isu a pinilitko ‘toy gayyemko nga isu ti mangparuar iti kuarta agingga iti kinunana nga isublinanto kano. Ngem mano a darasen a kasta ti kunkunana isu nga inkeddengmi nga idarum isuna. Ania ti addang nga aramidenmi tapno mapasublimi ‘diay nagdakkel a kantidad nga inted pay met diay anakmi a babai a mannursuro? Agsangsangit idi naammuanna a kasta. Kakaasi kano a nangurnong tapno adda laeng koma pagbalayanmi. Tulonganakami man, Apo Hues, iti daytoy dakkel a problemami. Dios unay ti agngina.—Pamilia Abenojar ti La Union

SUNGBAT:

Ti koma naaramid idi nagsaokayo iti gayyemmo, dinawatmo koma ti kopia ti deklarasion ti daga a gatgatangenyo. Makitam ditoy a deklarasion no asino ti akinnagan ken pagyananna. Saan laeng a dayta, sinaludsodmo koma no adda Special Power of Attorney-na kas pammaneknek nga adda bileg wenno karbenganna a mangilako iti daga. Ngem inyawatmo met lattan ta nagdakkelan a pirak.

Ngem nalpasen ti amin. Isu a ti remediona, suratam ta ibagam (demand letter) nga isublina kenka ti inawatna a kantidad tangay adda met resibo wenno pakakitaan iti inawatna. Pa-photocopy-m sa mangyulika iti darum iti estapa ken panangisubli iti innalana a kuarta sadiay barangay a pagnaedannna. Ikkam iti kopia ti resibo wenno pakakitaan nga inawatna ti kuarta. Imbestigaren ti Lupon daytoy ket no saanna a maisubli ti kuarta, mangalaka iti Certificate to File Action wenno Sertipiko ti Panangyuli iti Darum. Mapanka ti Opisina ti Piskal (Prosecutor) dita lugaryo wenno probinsia ket mangyulika iti pormal a darum. Mangidatagka iti photocopy ti resibo a pinirmaan ti gayyemmo ken ti Sertipiko ti Panangyuli iti Darum a pinirmaan ti Lupon. Agurayka bassit iti tiempo ta pasungbatenda ‘diay indarummo. Kalpasanna, yulim ti darum a kriminal ken sibil iti Regional Trial Court iti lugaryo. Maarestar ti gayyemmo (wenno saanmon a gayyem) ket no saan a makapagpiansa, iti pagbaludan ti papananna. Saanka a madanagan nga aggasto ta ni Apo Piskal ti agparangton nga abogadom.

Palagip: Dakayo a gumatgatang ti daga, kitaenyo ti deklarasion ti daga tapno makitayo no asino ti akinnagan. No agbayadkayo, iti mismo nga akindaga ti pagbayadanyo, malaksid no adda intedna nga Special Power of Attorney iti asino man a dinutokanna a mangilako iti daga ket isu ti pangtedanyo iti pagbayadyo. Saan a ti la asino a pagbaybayadanyo. Uray pay kabagian wenno gayyemyo, saanyo a basta ited ti kuartayo.—O

Newspapers in Tagalog

Newspapers from Philippines

© PressReader. All rights reserved.