Dear Doc

Bannawag - - Itoy A Bilang - Da DR. GENERALDO D. MAYLEM ken DRA. LORNALYN C. COLOMA-MAYLEM

Dear Doc Gener ken Doc Lorna,

Agtawenak iti 45, naasawaan ken addaan iti 3 nga annak. Siak ti mangimatmaton iti negosio ti pamiliami. Iti 5 a tawen, maysaak a hypertensive ken agtomtomarak iti Amlodipine 5mg iti kada aldaw.

Ti problemak, masansan nga agisboak. Kasla sobra ti kinaaktibo ti basisawko. Awan ketdi ti mariknak a sakit. Isuna laeng ta adda ‘tay rikna a makaisisboak manen. Ania kadi daytoy? Tulongandak koma. Agyamanak.--Rolando P. ti Tuguegarao City, Cagayan Dear Rolando P.,

Agyamankami iti suratmo. Nadlawmi laeng a dimo nadakamat dagiti napateg a detalye a kas iti historia iti diabetes, panagpakonsultar iti urologist, ken dadduma pay a medikasion, no adda man, ken dadduma pay a bambanag maipapan iti salun-atmo. Nupay kasta, tratarentayo ti problemam maibatay iti suratmo.

Iti panagkunami, addaanka iti sobra ti kinaaktibona a basisaw (overactive bladder). Ti overactive bladder (OAB) ket maysa a kondision a mainaig iti nakaro a panagisbo. No addaanka iti OAB, mabalin a masansan nga umisboka (kadawyan nga ad-adu ngem mamin-8 iti maysa nga aldaw) ken mabalin a masapul nga umisboka iti sumagmamano a daras iti rabii. Malaksid iti daytoy, mabalin pay a makaternekka.

Ania ti aramidem?

No iti panagkunam ket addaanka iti overactive bladder, makisaritaka iti doktormo. Ti doktormo, nasaysayaat no maysa a urologist, siguraduenna a dagiti sintomam ket saan a maigapu iti sabali a kondision nga addaan iti kapadana a sintoma, kas iti urinary tract infection (UTI), sumagmamano a kita ti panagletteg ti mabagbagi (ti babai), multiple sclerosis, bato iti basisaw, wenno diabetes, wenno babaen ti medikasion wenno agas, kas iti diuretics (water pills).

Kabayatanna, tratarentayo ti normal nga akem ti basisaw. Asikasuen dagiti bekkel (kidney) ti isbo sa ikabilna iti basisaw. No umisboka, rummuar iti akimbaba a paset ti basisaw sa mapan iti tubo a maawagan iti Ingles iti urethra (u-REE-thruh).

Kadagiti babbai, ti ngiwat ti urethra ket adda iti ngatuen ti kanal ti mabagbagida. Kadagiti lallaki, ti ruangan ti urethra ket iti murdong ti mabagbagida.

Bayat ti pannakapunno ti basisawmo, maipaw-it iti utekmo dagiti senial a kayatmo ti umisbo isu a kuna met ti utekmo a nasken nga umisboka. Umirteng met ti masel ti basisaw tapno maiduron ti isbo a rummuar. (Adda tuloyna)

Newspapers in Tagalog

Newspapers from Philippines

© PressReader. All rights reserved.