Tips

Tarabay iti Pagtaengan, Salun-at ken Dadduma Pay

Bannawag - - Itoy A Bilang - Inurnong ni ELIZABETH M. RAQUEL

PANANGIDULIN ITI SANGKABASSIT A PINTURA.

No nalpasen a napintaam ti kuarto wenno ania man a nasken a mapintaan ket adda pay nabati a sangkabassit a pintura, mabalin a kagudua pay ti lata, kasano ti kapintasan a panangidulinmo iti daytoy tapno mabalinmonto nga aramaten manen iti masakbayan? Ikargam iti ziplock plastic food bag, sa rikpam daytoy bayat nga ik-ikkatem ti angin a nagyan iti ziplock bag, sa kalpasanna, ikarga met laeng daytoy iti lata ti pintura (namagaanen ti unegna). Mabalin met nga isurat iti bakrang ti ziplock ti brand ti pintura, maris, ken no kaano a nagatang daytoy. Isurat pay daytoy iti bakrang ti lata a pangikargaan iti daytoy. Adda dagiti gundaway a tumangken ti pintura iti uneg ti lata kalpasan a naluktan daytoy (saanen nga airtight) ngem dakdakkel ti posibilidadna a saan a mapasamak daytoy babaen ti panangikarga iti pintura iti ziplock bag sa ikarga met laeng iti lata ti pintura. Adu ti magatang a ziplock bag kadagiti supermarket.

PINTURA A PARA UBBING.

Saan a nasken a gumatangka iti pintura a mabalin nga ay-ayamen dagiti ubbing. Mabalinmo met ti agaramid. Ti kasapulam: ½ tasa nga arina, ½ tasa nga asin, ken ½ tasa a danum. Paglalaokem dagitoy iti malukong sa kiwarem a nalaing agingga a lumamuyot. Ikarga dagitoy iti tallo a selopin. Nayonan iti sangkabassit a likido a watercolor wenno food coloring, agsasabali a maris a para iti tunggal selopin. Pislen dagiti selopin agingga iti mailaok a nasayaat ti maris. Kalpasanna, mabalin a yalison dagitoy iti plastik a botelia wenno squeeze bottle. Gapu ta saan a makadangran daytoy a klase ti pintura, mabalin nga usaren ti ima a pagpinta, wenno saan, agusar iti brush wenno no squeeze bottle ti nangikargaan, mabalin nga ipatedted dagitoy iti papel a pangaramidan iti disenio.

3 A TIPS ITI PANAGPINTURA ITI KUARTO.

1. No agaramat iti roller brush ket di maliklikan a padalanam ti immun-unan a nagdalanan ti brush, aramidem laeng daytoy no nabasa pay laeng ti immuna a nagdalanan ti brush; iti kasta, saan a madlaw ti indibidual a nagdalanan ti brush. 2. Nasayaat unay no ammomon no kasano ti kaadu ti pintura a masapulmo iti proyektom tapno masiguradom nga agpapada ti maris ti usarem a pintura. Ti ngamin sangagalon nga amarilio uray ti isu met laeng a brand, mabalin a dina kapada ti kinaamarilio ti sangagalon a namarkaan iti amarilio iti kapadana met laeng a brand. No ammomon a dua a galon ti aramatem para iti nasao a kuarto, mabalinmon a paglimogen dagitoy dua a galon iti dakkel a container tapno mamentener ti isu met laeng a maris iti kuarto. 3. Saan a maliklikan ti kaadda ti tedted wenno parsiak ti pintura iti datar bayat ti panangpintura iti diding. Nasaysayaat nga agusar iti daan a lupot a pagtinnagan ti tedted ta sagepsepenna daytoy, saan a kas iti plastik nga agtalinaed a nabasa ti pintura ket no madalapusmo, mabalin a maiwarsi pay ti tedted ti pintura iti datar.

Newspapers in Tagalog

Newspapers from Philippines

© PressReader. All rights reserved.