Padasem Daytoy, Kailian

Kunana a pagpakanna laeng iti baboy. Agingga iti nakatakuat iti sabali a pakaaramatanna.

Bannawag - - Itoy A Bilang - Ni ZAC B. SARIAN

MAYSA ni James “Bong” Reamon kadagiti daydayawenmi a propesional a simrek iti tayak ti agrikultura. Maysa a retirado a piloto, igubgubet ita ni Bong ti orasna iti organic farming iti agtallo nga ektaria a dagana idiay General Santos City. Apay a daydayawenmi? Ngamin, nakaad-adu dagiti takuatna a mabalin a makatulong kadagiti padana met laeng a naayat iti agrikultura. Maysa kadagiti kaudian a takuatna ti mula nga agtatapaw iti danum a managan iti Silvania.

Saan a patneng wenno natibo iti pagiliantayo ti Salvinia ngem alisto a paaduen kadagiti kadandanumantayo. Nakagatang iti

daytoy a mula iti maysa a Briton nga adda met organic farmna idiay Palawan. Kunana a gimmatang iti paaduanenna ta naammuanna a napintas a pagpakan iti baboy. Ket agpayso, kaayayo dagiti tarakenna a baboy.

Ngem idi amirisenna dagiti ramut ti mula, natakuatanna nga adda nagbubukel a pasetna. Kunana a nalagipna a dagiti mula nga adda bagas kadagiti ramutda, adda kabaelanda a mangagsep iti nitroheno manipud iti angin. Maibilang kadagitoy a mula ti ipil-ipil, balatong, mani ken dadduma pay a “legumes.”

Impadas ngarud ni Bong daytoy iti daga a mulaanna iti letsugas. Nagaramid iti ‘plot’ wenno kama a maysa a metro ti kaakabana ken 10 a metro ti kaatiddogna. Iti rabaw ti kama, nagaramid iti dua a paatiddog a kanal nga aguneg iti 8 a pulgada. Ditoy nga inkalina dagiti kaal-ala a 60 a kilo a Salvinia, sa iti rabaw dagitoy, inikkanna iti vermicast wenno takki ti alinta. Kalpasan ti sumagmamano a lawas, nagbalinen nga abono ti nagrupsa a Salvinia. Ditoy nga immulana dagiti semilia a letsugas. Nadlaw ni Bong a napardas a dimmakkel dagiti letsugas; nalalapsat ken saan a kinapet dagiti insekto. Iti uneg ti makabulan manipud nagmula, inapitnan dagiti letsugas a mapan a 30 a kilo amin. Inlakona dagitoy iti P100 ti sangakilo; di kad’ adda naglakuanna a P3,000.

Kalpasan ti sumagmamano nga aldaw, mabalin manen a mulaan iti letsugas ti kama. Saanen a nasken nga abonuan ta addan umdas nga abono iti daga a para kadagiti baro a mula.

Saan laengen a letsugas ti maab-abonuan iti Salvinia iti farm ni Bong. Pati dagiti mulana a pipino, kamatis, tarong, ken dadduma pay.

Awan parikut iti danum iti farm ni Bong. Addaan iti windmill a pagkunnotna iti danum malaksid nga adda pay irigasion a pangawawidanna iti danum a para iti pinagayanna.

Agus-usar met laeng iti Silvania a kas ganagan iti talonna. Kalpasan ti panaggagapas, maarado ti talon tapno magaburan dagiti Silvania. Kalpasanna, mawarisan ti talon iti takki ti alinta. Umanay kanon daytoy a ganagan dagiti sumaruno a raepna.

Kadua ni Bong ti asawana, ni Ligaya, nga akinkukua iti Felicidad Orchard & Garden Organics iti General Santos City. Ti farm-da ti kaunaan a binigbig ti Department of Tourism a kas destinasion dagiti agriturista iti Region 12. Akreditado pay a kas Learning Site ti Agricultural Training Institute ti Department of Agriculture. Ita, agpapaay payen ni Bong a presidente ti Farm Tourism Association iti Region 12.—O

Maipan dagiti mula a Silvania kadagiti kanal iti rabaw ti kama (plot).

Kalpasanna, maparabawan iti takki ti alinta sa magaburan.

Gapu kadagiti nakitana a kasla babassit a bagas kadagiti ramut ti mula a Silvania, impadas ni Bong nga inusar daytoy a ganagan a kas kadagiti mula a legumbre (legumes) a pakairamanan ti mani ken balatong.

Maysa a paset ti organic farm ni Bong Reamon. Kadagitoy a kadandanuman iti asideg ti pavilion ti farm a mapapaadu ti Salvinia.

Newspapers in Tagalog

Newspapers from Philippines

© PressReader. All rights reserved.