Panangimaton iti Pagtaengan

Bannawag - - Itoy A Bilang - Ni JONALIZA P. CABISARES

ADU dagiti nagannak ti makisarsarita kadagiti annakda iti uneg ti bukodda a pagtaengan iti sabali wenno ganggannaet a pagsasao a saan ketdi a ti nakaisigudanda a lengguahe.

Adu ngamin ti mamati a no kasarita dagiti ubbing iti bukod a pagsasao, maarusdanto iti pagadalan ken maipapaigiddanto no kalangenda dagiti gagayyemda nga agar-aramat iti sabali a pagsasao.

Kinaagpaysona, adun ti mapukpukaw a pagsasao gapu iti panangapresiar dagiti nagannak iti kinapateg ti panangisuro kadagiti annakda iti lengguahe a dominante iti maysa a lugar. Saandan nga ikankano ti mismo a nariinganda a lengguahe.

Ngem apay a napateg ti pannakisarita dagiti nagannak kadagiti annakda iti bukodda a pagsasao?

Kangrunaan a rason ti kinalaka daytoy a maisuro. Daytoy met ti pagbasaran ti pannakaisuro ti sabali a pagsasao kalpasan a nainsiar dagiti ubbing ti umuna a lengguaheda.

Ti umuna a pagsasao ti umuna a pagbasaran ti panagadal dagiti ubbing iti sabali a lengguahe. Iti panangaramatda iti nakaisigudan a pagsasao, ad-adda nga epektibo ti panangarakupda iti sabali pay a pagsasao.

Ti natibo a lengguahe ti pagbasaran iti pannakaipatarus dagiti balikas a maadal iti sabali a lengguahe. Adda man dagiti balikas a maadal iti sabali a lengguahe, ad-adda a nabilbileg a pagbasaran ti lengguahe dagiti nagannak a pakaibilangan dagiti bokabulario, ortograpia ken kalaka ti wagas ti komunikasion.

Nasken nga isuro dagiti ubbing no addada iti pagtaengan iti pannakaaramat ti maitutop a bokabulario ken ortograpia.

Adda dagiti propesional a mangibalbalakad nga isardeng koman dagiti nagannak ti makisarita kadagiti annakda iti bukodda a pagsasao no addada iti pagtaengan. Nga agaramatda kadagiti lengguahe a maar-aramat iti uneg ti pagadalan wenno iti komunidad tapno naparpardas ti panagagsep dagiti ubbing iti adal, pannakaawatda kadagiti leksion ken tapno saanda a mayawawan iti panangaramatda iti husto a gramatika wenno ortograpia.

Ngem ipaneknek dagiti baro a panagadal a saan a pudno daytoy. Kas nakunan, ti nakaisigudan a pagsasao iti uneg ti pagtaengan ti pagsadagan ti panagadal dagiti ubbing iti sabali pay a lengguahe. Nalaklakanto a maawatan ti maysa nga ubing dagiti dadduma a pagsasao no mairugi a mayadal kenkuana ti nakaisigudan a pagsasao iti bukodna a pagtaengan.

No ipaidam iti ubing ti bukodna a pagsasao, maipaidam met ti irarang-ay ti kabaelanna iti komunikasion— kendinto maliklikan dagiti negatibo a resultana.—O

Newspapers in Tagalog

Newspapers from Philippines

© PressReader. All rights reserved.