Idi Un-unana a Panawen

Bannawag - - Itoy A Bilang - Ni SOLOMON V. GERNACIO

IDI un-unana a panawen, adda ubing a pastor a mangay-aywan iti sangaarban a karnero. Bayat ti panangbambantayna kadagiti karnero, pagam-ammuan ta adda napasungadanna a lalaki a nakakabalio. Langa daytoy ti mangnganup.

“Ubing,” kinuna ti lalaki, “kasano ti kaadayo ti kaasitgan a kabalbalayan manipud ditoy?”

“Mapan ngata nga innem a milia, apo,” kinuna ti ubing. “Ngem para laeng kadagiti karnero ti desdes. Agsasanga. Baka mayaw-awankayo laeng.”

“No kasta, mabalin a kuyogennak? Ikkankanto iti kuartam,” kinuna ti lalaki. “’ Tay sueldom a para iti makatawen, madika pay?”

“Diak mapanawan dagitoy tarakenko, apo,” kinuna ti ubing. “Inyunay-unay ti amok a diak pampanawan dagitoy aywanko. Baka agturongda dita kabakiran ket sida ida ti lobo.”

“No maysa wenno dua laeng ti sida ti lobo, iramankonton a bayadan,” kinuna ti lalaki.

“Talaga a saan a mabalin, apo,” kinuna ti ubing. “Intalek kaniak ti amok dagitoy a karnero ket diak mabalin a baybay-an dagitoy.”

“No dinak mabalin a kuyogen, di la mabalin a mangsapulka iti mangkuyog kaniak? Bantayak dagitoy karnerom,” kinuna ti lalaki.

“Diak mabalin a panawan dagitoy aywanko, apo,” impapilit ti ubing. “Ken dida malasin ti bosesmo. Maysa pay—“nagsarimadeng ti ubing. “Dinak pagtalkan?” inyallawat ti lalaki. “Wen, apo, diak agtalek kadakayo,” kinuna ti ubing. “Ngamin, kayatyo a diak tungpalen ti bilin ti amok. Kasano ngarud a mamatiak a tungpalenyonto met ti kariyo?” Anian a katawa ti lalaki. Pagam-ammuan, manipud iti kabakiran, rimmuar ti adu a nakakabalio a lallaki.

“Patgenmi a Prinsipe!” kinuna ti adda iti una dagitoy. “Impagarupmi no napnapananyon!”

Nakigtot ti ubing iti nangngegna. No kasta, ti prinsipe ti pagarian ti adda iti sangona? In-inut a kinarayaman ti buteng ta amangan no dusaen ketdi daytoy. Ngem iti ipapanaw ti prinsipe, immisem ken nagsaludo pay kenkuana.

Iti kabigatanna, dimteng ti amo ti ubing, kaduana ti maysa a babaonen manipud iti palasio. Kinuna ti babaonen a kayat kano a kasarita ti prinsipe daytoy.

“Ubing,” kinuna ti prinsipe idi agkitada manen, “kayatko a panawamon dagiti aywanmo a karnero ket agpaaykan kaniak. Ammok a mapagtalkanka.”

Napalalo ti ragsak ti ubing iti nangngegna. Ngem kinunana, “Inton makasaraken ti amok iti sukatko a mangaywan kadagiti karnero, isunto ti yuumayko, apo.”

Isu a nagsubli ti ubing tapno aywanananna dagiti karnero. Ket idi makasaraken ti amona iti sukatna, napanen nagpaay iti prinsipe.—O

Newspapers in Tagalog

Newspapers from Philippines

© PressReader. All rights reserved.