Siled ti Kararag

Bannawag - - Itoy A Bilang - Ni CASSIUS RHUE ti South Carolina

Basaentayo ti Exodo 15:1-6

Inlayat ni Moses ti imana iti baybay. Imbulos ni Yahweh ti napigsa nga angin manipud iti daya. Nagpatpatnag a nagangangin agingga a nagmaga ti baybay. Nabisngay ti danum. — Exodo 14:21

ITI naminsan a bigat, naperdi ti paglukat iti ruangan ti garahemi. Binagaak ti lima ti tawenna nga anakko a ni Ava nga umunan iti lugan ta itulodko ti pagadalanda. Mapilpilitan a napan iti lugan ngem nagsubli met laeng a dagus gapu ta idi luktanna koma ti garahemi, saan a naglukat daytoy.

Agsangsangit daytoy a kasla awanen ti namnamana ket kinunana, “No mapanta idiay garahe, saantanton a makaruar ket makulongta idiay.” Idi napanko inlukat ti garahe, nagsardengen a nagsangit ti anakko ket naglugan met laeng. Bayat ti panangpumpunas ni Ava iti luana, impatalgedko kenkuana a saanko a pulos nga ibaon isuna iti maysa a lugar a mapupok, mapukaw wenno madangran.

Ti panangpatalgedko ken ni Ava, impalagipna kaniak dagiti Israelita. Ania ngata ti nariknada idi addada iti igid ti Nalabaga a Baybay sakbay a bisngayen ti Dios daytoy? Kas ken ni Ava a nangpadas a manglukat iti garahemi, naamirisko a no maminsan, kasapulak met a mangngeg dagiti balikas a mangpatalged kaniak, nangruna no kasla saan nga umdas ken awan serserbina ti ar-aramidek. Kasapulak a mangngeg ti kinapudno a ti Dios dinakto pulos panawan wenno baybayan. Uray addaak iti igid ti Nalabaga a Baybay ket saankon nga ammo ti papanak, kabaelan ti Dios nga ipakita kaniak ti saanko a makita a dalan.

Kararag: O Dios, no saanmi a makita ti dalan iti sanguananmi, tulongannakami nga agtalek kenka a waknitam ti dalan. Amen. Kapanunotan: Inkari ti Dios a saannatayo a pulos a panawan ken baybayan. (Kitaen ti Deut. 31:6, Heb. 13:5) Ikararagan: Dagiti marigatan nga agtalek iti Dios. (Naadaw iti Siled ti Kararag, Paguummongan ti Sangalubongan Tapno Agkararag, Nobiembre-Disiembre 2018 a bilang. Impablaak ti Discipleship Resources-Philippines. Sarungkaran ti http://discipleshipresourcesphilippines.com wenno ag-e-mail iti [email protected])

Newspapers in Tagalog

Newspapers from Philippines

© PressReader. All rights reserved.