Kudeta (41)

Bannawag - - Itoy A Bilang - Nobela ni NORBERTO D. BUMANGLAG, JR.

Norberto D. Bumanglag, Jr.

“Sir,countdownhasjust begun,” kinuna ni Agent Stewart sa imbabana met laeng ti selpon.

Ti Napalabas: Imbaga ni Gloria ti panangawis ti Presidente kadakuada a tumabuno iti panagtitipon ti LMP-Ilocos. Nasdaaw ni John. Iti sabali a bangir, agdiag-jogging ni Melanie idi sitaren ti maysa a lalaki nga armado. Naglabanda ket napatayna daytoy. Timmaray. Pinakamat ni Anwar. Natuntonanda ti balay a yanna. Inibus ni Melanie ida isu a ni Anwar a mismo ti nangidaulo kadagiti mapan mangsawar kadagiti kakaduada. Nagpaarayat met ni Melanie ken ni John. Naitarayanda ida. Impudno ni Melanie a ni Rommel ti akinaramid iti panagpukawna ket balsenna mayat man wenno saan ni John. Pinanggep dagiti tao ni Anwar a serken ti balay ni John ngem napatay ida da John. Inyawagda ken ni Anwar a mapanna alaen dagiti taona a naikarga iti dyip. Nagtungpal daytoy. Dina ammo a minulaanda iti bomba ti dyip. Ngem saan a natay ni Anwar. Pinatigmaanan manen ni Pat ti Presidente maipapan iti kudeta ken ti kaaddan dagiti CIA ken Abu Sayyaf iti Ilokos ngem saan a dimngeg. Nasdaaw ketdi idi ibaga ni Pat a nakidnap ni Gloria ket ni John ti nangsaka.

NAKAUL-ULIMEK ti rabii. Uray iti patingga ti makitana manipud iti balkon iti maikadua a kadsaaran ti balayda, kasla awan mangngeg ken mariparna a naidumduma. Uray dagiti silaw, masadutda nga agkiray ken rumayray a kasla ketdin dida kayat nga iparangarang ti kumkumotan ti sipnget. Nakataltalna ti rabii. Kasungani ti kinariribuk ti Ilocos Norte, nangruna ti ilina, kadagiti naglabas nga aldaw. Pinnatay. Panagpukaw. Panagbomba. Nangrugi laeng idi naipadamag ti panagturong ti Presidente ditoy.

Ania ti pakainaigan dagitoy iti kaadda ti Presidente iti probinsia?

Intangadna ti arak a nagyan ti baso nga iggemna. Inibusna. Simsimsimanna laeng itay. Ngem itay agangay, naimasanna metten.

Napakidem. Ad-addan a kimmaro ti sakit ti ulona. Managinum unayen. Kasla nagbalinen a kamangna ti arak. Kasla isu laeng ti umno a pangitaklinanna kadagiti parikutna. Tapno mapukaw ti ar-aria iti konsiensiana. Ta isu a mismo ti nangibilin iti pannakapapatay ni Melanie.

Immanges manen iti nauneg. Tinengngedna ti botelia ti Johnie Walker Black a nakapatugaw iti barandilias. Kinargaanna ti basona. “Isuna daytan!” nakabilbileg ti timek a naggapu iti likudanna. Timmaliaw. “Ala unan, siririingka pay laeng...” Adda dayengdeng iti timek ti lakay.

“P-Papang...” dina natuloy ti sawenna ta nagngadal gapu iti bartekna.

“Aglablabeskan iti panagin-inummo. Inaldawen a mabartekka.”

“Isu laeng ti mabalinko a pangikamangan kadagiti adu a parikutko, papang.”

“Dadaelem ‘ta bagim... Laglagipem, sika pay laeng ti mayor daytoy nga ili. Adu dagiti pagrebbengan a nasken nga akmem ken ipatungpal. Kasano a maakemmo dagita no kastoy a kanayon ti ar-aramidem?”

Nagkatawa ni Rommel. Namaga. “Agtalekka kaniak, papang. Okey-ak...”

“Adu ti sakripisiok tapno maalak ti panagtalek dagiti umili sa...”

“Adu a kuarta kunam, papang. Pinaglayustayo iti kuarta ti ili. Ginatangtayo ti amin a kooperasion ken panagtalek dagiti tao kadatayo.”

“Sumardengka! Inaramidko dayta gapu kenka... iti pamiliatayo. Tapno adda maibatitayo a pakalaglagipan dagiti umili kadatayo.”

Nagwingiwing ni Rommel. “Pakalaglagipan? Ti ania, papang? Ania dagiti proyekto a naaramid ti administrasionmo tapno adda mabati a pakalaglagipan dagiti tao kadatayo? Ti panangriendatayo kadakuada? Ti pananglimitartayo kadagiti nawaya koma a panangprotestada kadagiti adu a saan a

maikanatad nga inaramidtayo? Binutbutengtayo ida. Binayadantayo ida. Naipakni dagiti dadduma. Dagita ti malaglagipto dagiti umili, papang.” “Agtalnaka. Paset dayta ti politika.” “Narugit a politika nga impasagepsepmo iti kapanunotak, papang...”

“Pinagbalinka a mayor, saan kadi? Kunam kadi a diak makita ti kinaragsak ken kinalastogmo itan ta nagbalinka a mayor?”

“Gapu ta kasta ti kayatmo a mapasamak, papang. Simple laeng idi ti arapaapko. Kas iti nanumo a naggapuantayo. Makapagadalak iti kolehio, makapagtrabahoak... Maaddaan iti pamilia a kas kadakayo. Uray no apagapaman laeng, saanko a tinarigagayan ti biag a kastoy. Aglaplapusanan... gapu laeng kadagiti kuarta nga impatulod daydi Uncle Roger kenka.” Naklaat ti lakay ket saan a nakauni. “Kuarta a saan pay koma nga agpaay kadatayo...”

“Ania ti sasawem?” ngimmato ti timek ti lakay. “Insagut ti ulitegmo dagita!”

“Nabasak dagiti dadduma a surat ni Uncle Roger, papang. Imbagana nga idulinmo ta inton agawid ditoyton ti pagnaedanna.” Ngem natay....”

“Ngem pimmusay. Saanen a nakasubli. Asino koma pay ti pagpaayan dagita a kuarta?” “Da Anti Zeny... ni John...” “Saanda nga ammo...” “Saan kadi a rumbeng koma a pinakaammuam ida?”

“Blood money daydiay. Kuarta a naggapu kadagiti drug cartel.”

“Nga isu met laeng ti nagpaayanna. Nagbalintayo a drug lord. Saan la ketdi a kayat ni John dayta. Ken saan nga agsardeng daydiay a mangkutkot iti napasamak ken ni Melanie.” “Gapu iti kinanengnengmo.” “Gapu iti tarigagaymo a masalakniban ti naganmo, papang.”

“Ngem nagdarasudoska. Saanka a naganannad. Ken sumardengka man iti ipakpakitam. Saanka a sinursuruan nga agbalin a nalupoy.”

Nagwingiwing ni Rommel. “Ammom nga ammo ni John dagiti palimedtayo. Atapenna latta nga adda pannakainaigtayo iti panagpukaw ni Melanie. Siak a siak latta ti atapenna. Ken mariknak a kasla addan pammaneknekna... nga agur-uray laengen iti umno a gundaway.”

“Natayen dagiti makaammo iti napasamak malaksid iti head ti security-m... Ania pay ti pagbutngam? Sardengamon dayta a panaginum. Awan ti nalimpio a desisionmo no kasta a kanayon ti ar-aramidem...”

“No ngay mapaneknekanna a siak ti nangpapatay ken ni Melanie, ania ti aramidentayo? Papatayek kadi met?”

ALAS dos iti malem. Tumanayutoyen dagiti tao iti aglawlaw ti kapitolio. Addada dagiti demonstrador a mangkontra kadagiti ar-aramiden ti Presidente ngem ad-adu ken naringringgor dagiti mangsupsuportar iti

Presidente. Malaksid iti kinaadu ti tao, nakallalasin pay ti kinaadu dagiti kameng ti PNP, Philippine Army, ken nakauniporme ken nakasibilian a kameng ti Presidential Security Group. Uray dagiti kameng ti prensa a pakairamananen dagiti naggapu iti sabsabali a pagilian, naidumduma ti kinaaduda. Saan ketdi a nakakaskasdaaw ta sadino man a papanan ti Presidente, agbalin latta nga international ti coverage- na gapu kadagiti pagtaktakderanna. Kenkuana, napatpateg ti panangsaluadna iti kalintegan dagiti nalinteg nga umili ngem ti mangited iti kalintegan kadagiti kriminal. Kenkuana, awan ti kalintegan dagiti kakasta a tao. Nasken a matayda. Banag a saan a kanunongan dagiti human

rights activist a karaman ita kadagiti agprotprotesta. Naiget ti seguridad. Awan ti makaasideg iti rostrum a nairanta a pagsaritaan ti Presidente iti sango ti kapitolio. Nagpaay ti bakud iti sango ti kapitolio a beddeng ti pagpatinggaan dagiti tao a mangbuya ken mangdengngeg iti panagsaona. Nairanta laeng dayta a sango para kadagiti espesial a sangaili ti Presidente.

Kadagiti natatayag a pasdek a mangtantannawag iti kapitolio, nakapueston dagiti kameng ti PNP Special Action Forces a mangsisiim iti baba. Addaanda kadagiti nabibileg nga igam, nakasaganada a mangpadso iti asino man nga agpanggep a mangdangran iti Presidente.

Nupay inggunamgunam ti Presidente a saanda nga iparangarang ti puersada a mangsalaknib iti Presidente, sinalungasing dayta ti PNP ken ti PSG babaen ti bilin ni Pat Coloma. Maamak. Amangan no agpayso ti kunkunada a kudeta.

Iti uneg ti kapitolio, ad-adda manen ti kinaiget ti seguridad. Adda nailatang a metal detector a lasaten dagiti amin a sumrek agraman dagiti mayor a tumabuno. Ken adu a PNP ken PSG ti nakatakder iti sango dagiti ridaw. Adu met ti agpagnapagna kadagiti pasilio. Nasken a siguraduenda nga awan ti makalusot iti seguridad ti Presidente.

Ti saanda nga ammo, addan ditoy dagiti agpampamarang a PNP, nakaptanen kadagiti bomba ti uneg ti conference room. Dagiti naibaon itay a nangulit a nangkita iti kaadda ti bomba iti uneg, naimulada met a kameng ti oposision. Nakaan-annad a plano!

Kadagiti miembro ti Philippine Army ken PNP, saandan nga ammo no asino ti kontra wenno pabor. Ti laeng nalawag, adda makaanay a tao ni Heneral Miguel a mangipakni iti Presidente. Adda pay ti Abu Sayyaf ken ti CIA. Iti maysa a nailet nga eskinita, a nagbedngan ti pasdek ti Central HyperMart ken ti Bell Tower, nakaparada ti maysa a puraw a van a nasuratan iti Central HyperMart. Ngem iti uneg, lima nga operatiba ti CIA ti adda dita: ni Agent Stewart ken uppat a taona. Agpapada a nakauniporme iti PNP Special Action Force dagiti uppat idinto a kasla gagangay a sibilian ni Agent Stewart. Ngem naka- bulletproof vest ken nakasab-it iti sinturonna ti nakabalay a .45-na, sumagmamamano a granada, natadem a

jungle knife ken radio. Adda pay iggemda a high powered rifle. Nakaad-adu ti monitor a nakasab-it iti diding ti van. Monmonitorenda ti mapaspasamak iti aglawlaw ti kapitolio agraman iti uneg. Makitkitada pay dagiti taoda iti rooftop ti Central HyperMart ken maysa a dakkel a banko. Nakalawlawag a matannawagan dagiti sniper- da sadiay ti disso a pagsaritaan ti Presidente iti ruar a sango ti kapitolio. Awan sawsawirda, sigurado a saanda nga agmintis.

“Nakasaganakayon?” sinaludsod ni Agent Stewart kadagiti taona nga uppat kabayatan ti panangkitkitana kadagiti uniporme dagitoy. Kayatna a siguraduen nga awan ti pakaidumaanda kadagiti pudpudno a PNP-SAF.

Nagtung-ed dagiti uppat.

“Agent Crawford and Agent Tierne, you two are going to the rooftop of the bank. And Agent Peters and Agent Nicholas are assigned to the Central Hypermart... Is that clear?”

Nagtung-ed dagiti uppat. “You guys are also carrying a body camera. Transmit directly to me tapno ammok no ania ti mapaspasamak. And those cameras are always on, is that clear?” “Yes, Agent Stewart,” agarup naggigiddan a simmungbat dagiti uppat.

“There are two PNP SAF detailed at the rooftop of Central HyperMart... the same thing at the Bank... I need those killed as

clean as you can do it... nga awan ti makadkadlaw.” Nagtung-ed latta dagiti uppat. “Nasken nga agballigitayo iti daytoy nakalaklaka a target. Nalaklaka nga amang ngem dagiti panagpapataytayo kadagiti terorista idiay Syria. Isu nga awan ti makitak a rason tapno saantayo nga agballigi.” “Agtalekka kadakami, Agent Stewart... we won’t fail you...” “Good, ket no agballigitayo iti daytoy, panunotenyo dagiti adu a pribilehio ken gunggona nga agur-uray kadatayo.” Idi kuan, natoktok ti van. Agpapadada a nakigtot. Kinitada ti

monitor. Polis, talloda. Dandani naggigiddanda a nangisagana kadagiti paltogda. “F__ck,” naidayamudom ni Agent Stewart. Saan pay a nairugi ti misionda ngem masukalandan? Natogtog manen ti sikig ti van. “Adda tao iti uneg?” Naminsan pay a kinatok ti polis ti sikig ti van ngem saanda a nagkuti.

Ngem kellaat a dimmadakkel dagiti matada idi asuten dagiti polis dagiti paltogda.

Nagwingiwing ni Agent Stewart, kas pasimudaagna kadagiti taona a saanda nga agkuti agingga a saanna nga ibilin.

Tinoktok manen ti polis ti sikigan ti van. Ngem ita, pinadasen daytoy a guyoden ti ridaw ti van. Nangasut dagiti tao ni Agent Stewart. Agur-urayda ti bilin. Ginammatan ni Agent Stewart ti mouse, in focus- na ti agsumbangir a kalsada no adda sabali a pannakabagi ti linteg a makitana. Awan. Inasutna ti paltogna, kinitana sa insublina met laeng iti holster daytoy iti siketna apaman a mapennekna a sipupunno iti bala.

“Stay here... do not do anything unless I tell you, is that clear,” imbilinna kadagiti taona. Nagtung-ed dagiti uppat. Inruar ni Agent Stewart ti badge- na a kas PNP SAF sa inininayadna nga inlukat ti sliding door ti van. “Good afternoon, sir,” inkablaaw ni Agent Stewart. “What can we do for you?”

Saan a naguni ti polis. Kinitana ketdi dagiti uppat a nakauniporme iti PNP-SAF nga adda iti uneg. “Ania ti araramidenyo ditoy?” sinaludsodna.

“Classified, PO3 Castillo,” insungbat ni Agent Stewart kabayatan ti panangbasana iti nagan ti polis.

“Awan ti naawatmi a memorandum ti kaaddayo ditoy. Ti order, awan ti maipalubos nga agparada ditoy,” adda panagduadua ti polis.

“Gapu ta classified daytoy a kaaddami, PO3 Castillo,” impakita ni Agent Stewart ti palsipikado nga ID ken tsapana kas PNP-SAF.”

Minatmatan a naimbag ti polis ti ID ken tsapa sa kinitana ti rupa ni Agent Stewart.

“We are here on a classified mission, PO3 Castillo. We are members of a Quick Reaction Force in case the President need us. Rumbeng nga awan ti makaammo iti daytoy. Saanmo nga ibaga iti uray no asino. Just place a sticker in this van that this

vehicle is authorized to park here, is that clear.?”

Saanen a nakatimek ti polis. Imbilinna iti maysa a kaduana nga ikkanna iti sticker nga “Authorized to Park.” Nagyaman ni Agent Stewart, sa kinunana: “Thanks, PO3

Castillo... Asino ti supervisor- mo?” “Lieautenant Makkil, captain...” “Idanonkonto kenkuana ti napintas a panangannongmo iti pagrebbengam. Ngem laglagipem, awan a pulos ti pangibagaam iti daytoy a kaadda ti Quick Reaction Force... nalawag?”

Immisem ti polis. “Namnamaem dayta, sir!” Ket nagpakadan dagiti tallo.

Simrek a dagus ni Agent Stewart iti uneg ti van sa inrikepda. Agpapadada a nakaanges iti nalukay. Kinita ni Agent Stewart ti relona. Masapul nga aggunaydan. “Okay, time to go, gentlemen... Remember, we are acting alone. We don’t have any support... Kas naipaganetget kadagiti adun a nagsanayanyo, kadagiti kanito a maibaonkayo iti mission, act just like you are alone... and you die and survive based on that assumption... Kayatna a sawen, saanyo a namnamaen ti tulong no kas pangarigan. This is a life and death mission... but we are here to succeed... and we have to kill... regardless of whether they are direct combatants or just innocent onlookers if they jeopardize our mission...” Nagtung-ed dagiti uppat. Tsinekda dagiti kasapulanda. High powered rifle a nakakahon. Side arms a nakabitin iti siketda. Jungle knife. Hand grenades. Kalpasanna, pinennekda no adda met laeng iti bolsada dagiti palsipikado nga ID-da a kas miembro ti PNP SAF. Madamdama pay, nagsasarunon dagiti uppat a rimmuar iti van. Sinango met ni Agent Stewart dagiti monitor. Pinidutda ti maysa a throw-away a selpon. Indayalna. “Sir, countdown has just begun,” kinunana sa imbabana met laeng ti selpon.

Newspapers in Tagalog

Newspapers from Philippines

© PressReader. All rights reserved.