Siled ti Kararag
Basaentayo ti Aramid 2:41-47
Inaldaw a mapanda a sangsangkamaysa iti Templo. Siaayat ken siraragsakda a nagkakapangan kadagiti balbalayda.—Aramid 2:46 I TI kulturami, rambakanmi ti panaggibus ti agdama a tawen babaen ti maysa a ragragsak iti Bisperas ti Baro a Tawen a kaduami dagiti gagayyemmi. Adda latta maisagana a nagduduma a taraon. Naragsakkami bayat ti musika, panagsasala ken panagsasarita kas aggagayyem.
Agarup tallo a tawenen ti naglabas, nagbalinak a miembro iti maysa nga iglesia. Naiduma itan ti panangrambakmi iti panaggibus ti tawen. Agtataripnong iti balaymi ti maysa a bassit a grupo ti iglesiami. Adda latta naimas a makmakan. Ngem malaksid iti dayta, adda orasmi nga agdaydayaw ken agkanta kadagiti pagdaydayaw iti Dios. Ti kasayaatan a paset ket ti panagdengngegmi kadagiti istoria ti panangsalaknib ti Dios— dagiti nakaskasdaaw a bambanag nga inaramidna iti biagmi iti las-ud ti tawen. Kalpasanna, agyamankami iti Dios gapu kadagitoy. Ti Espiritu Santo isu ti manginspirar kadakami bayat ti panangibinglaymi iti no ania ti kaipapananna kadakami ti pammatimi. Agtultuloykami nga agadal ken dumakkel iti pannakaawatmi iti Dios. Ngem kumitakami iti masakbayan nga addaan pammati ken naan-anay a talged, ket determinadokami nga agsaksi tapno maammuan ken mapadasan dagiti sabali a tattao ti ayat ken panangsalaknib ti Dios.
Kararag: Dios ti namnama, kiddawenmi ti siaayat a panangidalan ken bendisionmo sadino man ti pagtitiponan dagiti tattao tapno agadal, agdaydayaw ken agkararag. Amen.
Ikararagan: Dagiti babassit a grupo ti panagkararag.
Kapanunotan: Ita nga aldaw Ibagak kadagiti sabali a tattao ti di agpatingga a namnamak nga adda iti Dios.