Apay nga Immay ni Jesus Ditoy Lubong a kas Maladaga?

Bannawag - - Itoy A Bilang - Ni FERNANDO B. SANCHEZ

APAY, aya, a rambakantayo a tinawen ti kasangay ni Apo Jesus a kas maysa nga ubing a maladaga? Apay nga immay ditoy lubong a kas maladaga a saan ket a kas agtutubo wenno nataengan.

Iti libro a Why the Nativity? a sinurat ni David Jeremiah, maysa a senior pastor iti Shadow Mountain Community Church iti El Cajon, California, USA, ken nangipasdek iti Turning Point Radio and Television Ministries iti Amerika, kinunana nga immay ni Apo Jesus ditoy lubong a kas ubing a maladaga tapno ipaduyakyakna ti kinapudno nga iti panagbalin ni Apo Jesus a kas tao a mortal, maamiris a mabalin met a suroten ti ordinario a tao dagiti addang ni Apo Jesus ken suroten ti wagas ti panagbiagna ditoy daga. Dayta ti akem ti panagtaona. Nalabit narigat nga aramiden dayta. Naisiding iti tao ti kinamanagbasolna. Ngem awan ti imposible iti mamati ken mangisadag iti biagna ken ni Apo Jesus. Kuna a mismo ni Apo Jesus: “Pudno, pudno, kunak kadakayo, ti mamati kaniak, dagiti aramid nga aramidek, aramidennanto met, ket dakdakkelto pay ngem dagitoy ti aramidenna, ta innak ken Ama” (Juan 14: 12).

Imbuntok pay ni David Jeremiah: “Immay a kas ubing tapno sanguen ken parmekenna ti tunggal karit ken sulisog nga umapay iti sangkatawan. Agtalektayo kenkuana gapu ta isu ti Dios. Ayatentayo iti amin a pusotayo gapu ta ammotayo nga iti naminsan, nagbalin a maysa a bassit nga ubing a nabungon iti nalayak a pagan-anay, siiidda iti kulluong….”

Nasuroken a dua ribu a tawen ti napalabas manipud naipasngay ni ubing a Jesus iti nasulinek a lugar ti Betlehem ngem dinto pulos agawaaw ti pateg ken kaipapanan ti panagtao ken panagbalinna a bassit nga ubing iti lubong a pagbibiagantayo tapno agbalin nga ulidantayo iti panangtaluntontayo iti dana nga agturong iti pagarian ti langit.—O

Newspapers in Tagalog

Newspapers from Philippines

© PressReader. All rights reserved.