Ket Pinapaskuaan ni Kagawad Mansing ti Nagcayangan

“MAKARKARGA pay ti traysikel dagitoy?” indayamudomko. Sarsarunuek ti asawak iti uneg ti groseria. Karga a karga iti bagkatko a grocery basket. Maikatlon daytoy. Dandani manen mapno iti noodles, delata, nadumaduma a sabon, kape, asukar ken no ania pay ditan a kasapulan iti inaldaw. Numona ti dagsenna ta nairamanen ditoy dagiti rekado ti dua a baboy a partienmi.

“Aganuska kadi, a, lakay, uray ta para met la kadata daytoy,” kinuna ti asawak idi madlawna ti panagasugko. “Para kadata wenno para kadagiti tattao?” kinunak. “Kunak man no nalpasen ti patanganta?” nakapsut ngem nadagsen ti panangibalikasna. “Di imbagam koma idin no nasakit ti nakemmo ta diak koman timmartaray a kagawad?”

No ammok la koma a kastoy, talaga a dika pinalubosan, kunak koma ngem nalapdak ti bagik. Kasano ngamin, napanunotna ketdin ti agpamakan kadagiti kabarangayanmi iti Nagcayangan inton Paskua.

“Kayatko la ti agyaman kadagiti tattao, lakay, ta saanak koma a kagawad no di gapu iti tulongda idi eleksion.” Isu ti maikapito a kagawad. No di invalid ti tallo a botos ni kasinsinna a Lukia, saan koma a konsehala ita ket ni koma Lukia ti maikapito. “Sa kayatko koma met a leppasen ti tallo a termino tapno di ibagbaga ni Kasinsin Lukia nga awan mangay-ayat kaniak.”

Ibagbaga ngamin ni Lukia a bunga ti pakpakaasi dagiti botos ti asawak ta idi agkampania, kanayon nga ibagana: “Uray maudiak iti balotayo basta inayonyo ti naganko.” Kasta nga agpayso ti napasamak ket tapno maipakitana ti kinapudnona nga agserbi, ipaspasnekna met unayen. Nakarkaro payen ngem kapitan ti anepna a mangpasiar kadagiti masakupan ti sektorna. Ket dimmanon sa kano payen ken ni mayor dayta a kinapasnekna.

Dandani di nalaon ti center car— motor a kasla bagi ti dyip ti bagina— dagiti ginatangmi. Lima karton a noodles, sangakaban nga asukar, tallo karton a delata, tallo karton nga empelayt ken adu pay. Mano a ribun dagitan!

“Bassit a talaga ti papanan ti kuarta itan, lakay,” kinuna ti asawak idi makapuesto iti abayko. “Dayta la a ginatangta, napanen ‘ta nasurok a beinte mil.” Diak nakauni ta dandani naangsanak iti dayta a nangngegko. “Wen gayam, lakay, dumagastanton a mangbayad iti uray duapulo kahon laeng a Coke idiay yan da Mang Arput,” pagamammuan la ta kinunana manen ti asawak. Dina la madlawen a pagsusuronak ti siliniador!

“Sika, a,” insungbatko. Ngem idi malagipko manen ti beinte mil a naglakuak iti irik a tedtedda ni Bagyo Ompong, imbagak a siakto lattan ti mapan gumatang iti Coke ken agsubli nga aggroseri.

SUPORTADOK ti asawak iti panagtarayna a konsehal idi inyumanna kaniak ti panangala ni Uliteg Marco a maysa kadagiti katiketna. Nagturpos ngaminen a konsehal ni uliteg isu a timmaray a kapitan. Nayatak met a timmaray ti asawak ta kas kunak, “Nasayaat met ta adda mangtawid iti daydi tatangmo.” Sigud ngamin a konsehal daydi katugangak a lalaki sa nakapagkapitan met iti maysa a termino sakbay a nahayblad a bulonnan a natay.

Uray pay met ketdi agingga ita, suportadok ti asawak nupay dandani dinakamin mataliaw ken Junjun, ti tin-edieren a kakaisuna a bungami. Masuronak la ngamin iti paggastuan a napanunotna. Ti ammok idi ibagana nga agpa- thanksgiving, umuragakami laeng iti uray lima kilo a karne, lima kilo a pansit, agpasumankami iti uray dua salup, agpartikami iti uray tallo agingga iti lima a pato a pangiparisan iti sangakarton nga empelayt, ken uray agingga iti lima kahon a sopdrink. Ayabanminto koma metten ni Uliteg Marco a nangabak a kapitan ken dagiti kakaduada iti konseho, dagiti asideg a gagayyemmi ken dagiti dadduma a pumurok iti sektor ti asawak. Ti dakesna, kayat metten ti asawak ti agparayag. Sibubukel metten a barangay ti kayatna a pakanen. Tallo nga aldaw ngata a kas kalamiis ti ice cream ti panagpatpatangmi. No di nakasango ni Junjun, dandani dikami aginnuni.

“Political strategy daytoy tapno ammom.” Dayta ti sangikabaga ti asawak no kasta nga aggabbo dagiti ngiwatmi. “Panagyaman ken nasapa metten a panagmula. Ania ti ammom no inton sumaruno a lumabanak, siakton ti number one a kagawad? Ket no ituloy latta ni Uliteg Marco ti panagbarbartekna, agrakayanto ti salun-atna. Awan papananna a dinto siak ti mangsukat kenkuana!”

BISPERAS ti Paskua. Kasla pagpiestaanen iti balay. Naipatakderen dagiti tanod ken dagiti timmulong a kaarrubami dagiti tallo a panakkelen a tent a binulodda idiay munisipio. Iti met likud, agbungbungonen iti patupat ken linapet dagiti babbaket. Sabali dagiti aglutluto iti bibingka ken sinuman. Adda met dagiti aguk-ukis iti rekado, ken isagsaganadan a ngurungoren dagiti baboy. Partien ken ikilnatda kanon ta daytanto la agluton inton parbangon. Amangan kano ngamin no awan makasango inton sardam aglalo ket urayenda kano met ti Noche Buena kadagiti balbalayda. Madama met ti panagbunag dagiti lallaki a kakaanakan ti asawak iti plastik a tugaw a binulodda idiay bangir a barangay ta kurang kano dagiti tugaw ti Nagcayangan. Dagiti met agtutubo, nga idauluan ni Dang, ti kaanakan ti asawak a maestra dita eskuela elementaria,