Kudeta (43)
Nangngeg ni John ti kanaktuol ti sapatos ni Gloria. Nagsapul iti paglemmenganna.
Ti Napalabas: Imbaga ni Gloria ti panangawis ti Presidente kadakuada a tumabuno iti panagtitipon ti LMPIlocos. Nasdaaw ni John. Iti sabali a bangir, agdiag-jogging ni Melanie idi sitaren ti maysa a lalaki nga armado. Naglabanda ket napatayna daytoy. Timmaray. Pinakamat ni Anwar. Natuntonanda ti balay a yanna. Inibus ni Melanie ida isu a ni Anwar a mismo ti nangidaulo kadagiti mapan mangsawar kadagiti kakaduada. Nagpaarayat met ni Melanie ken ni John. Naitarayanda ida. Impudno ni Melanie a ni Rommel ti akin-aramid iti panagpukawna ket balsenna mayat man wenno saan ni John. Pinanggep dagiti tao ni Anwar a serken ti balay ni John ngem napatay ida da John. Inyawagda ken ni Anwar a mapanna alaen dagiti taona a naikarga iti dyip. Nagtungpal daytoy. Dina ammo a minulaanda iti bomba ti dyip. Ngem saan a natay ni Anwar. Pinatigmaanan manen ni Pat ti Presidente maipapan iti kudeta ken ti kaaddan dagiti CIA ken Abu Sayyaf iti Ilokos ngem saan a dimngeg. Nasdaaw ketdi idi ibaga ni Pat a nakidnap ni Gloria ket ni John ti nangsaka. Iti alas dos iti malem iti kabigatanna, inyawag ni Agent Steward a nangrugin ti countdown.
(Maika-43 a Paset)
MINIRA da Daniel ken Jerky ti rupada iti sarming. Immatiddog ti buokda gapu iti inusarda a wig ken adda pay iming ken barbasda ket masiguradoda a saan idan a malasin dagiti pannakabagi ti linteg wenno ti uray asino man a makaamammo kadakuada.
Nagkinnita dagiti aggayyem, agpadada a nakaserserioso ta no agballigida a manglapped iti plano ni Gen. Miguel a mangagaw iti turay, adda pay namnamada nga agbalbaliw ti biagda. Daytay agbiagda a kas normal a tao. “Are you, guys, ready?” sinaludsod ni Ricky bayat ti yaasidegna kadagiti dua. Nakakasual laeng daytoy. Polo shirt ti aruatna, ngem adda inlemmengna a bulletproof vest. Nakasabikel iti dua a paltog ken sumagmamano a magasin. “We are ready,” insungbat da Daniel ken Jerky. Agpada nga adda met bulletproof vest nga inlemmeng ti polo shirt- da. Madamdama pay, ni met John ti immasideg kadagiti tallo. Naka- coat and tie ni John. Saan a mabalin nga agusar iti barong Tagalog ta masirayan ti isalikadna a paltog. “Ammoyon dagiti aramidenyo?”
kinuna ni John.
“Wen, manong,” dandani naggiddan a kinuna da Daniel ken Jerky. “Inkami iti roof top ti kapitolio ket wanawanan ken sapulenmi ti yan dagiti sniper kadagiti pasdek a nangatngato ngem ti kapitolio,” innayon ni Daniel. “And I stay around the capitol... always on your tail... except maybe when you’ll go inside the capitol...” kinuna met ni Ricky. “That’s 10-4, gentlemen... Remember, our mission is to protect the President. Whatever cost, of course...” “Nakasaganakami iti dayta.” “Okay, good luck!”
“Good luck met, Manong John,” kinuna ni Daniel. “Aganannadka...” Nagmuregreg ni John. Immasideg ni Daniel ken ni John sa inyarasaasna: “Diak ammo no kasano ti panangibagak, manong, ngem diak agtalek iti daydiay a Gloria Sarandi.” Nagkusipet dagiti mata ni John. “Dispensarennak, manong, ngem dayta ti mariknak. Adda makitak iti rupana a diak mailawlawag. Agannadka laeng...” Saan a nakasungbat ni John.
“Let’s go, guys,” indagdag ni Ricky. Timmallikuden dagiti tallo.
“Keep your radio open,” impakamakam ni John. “10-4, captain,” insungbat ni Ricky. Nabati ni John nga agpampanunot. Dina ammo ngem kasla adda banag a nadikar iti barukongna. Uray isu, kasla addan panagduaduana ken ni Gloria. Kasta ti mariknana, ngem dina laeng ikankano.
Nagwingiwing. Mararaem a tao ni Goria. Apay koma nga agduadua?
Kellaat a nalagipna ni Melanie. Dina pay naibaga iti daytoy nga adda babai a kaduana nga agparang iti Presidente.
“Wow! Dress to kill, hon!” Naragsak ti timek a nangsinga kenkuana.
Timmaliaw ni John. Inkalina dagiti matana iti ad-adda manen a pimmintas a pammagi ni Melanie. Uray jeans laeng a kumepkep kadagiti luppona ken tisert a panglawaen ti aruatna, nabatad pay laeng ti nabaknang a barukongna. Bumagay la unay iti kimmampuso a rupana, natirad nga agong, asul a mata a kasla mabalin a pagsarmingan iti kinarimatna, olandes a buok...
Agragutok latta manen ti pusona. Daytoy ti babai a pangitaklinanna iti pusona. Ti babai nga agbalin nga ina ni Jayar.
Sinabat ni John ni Melanie. Siniketna daytoy. Nasagidna ti paltog iti likud ken dua a magasin iti bolsa daytoy.
“I love you, hon,” kinunana. Bisongenna koman ti bibig daytoy ngem inwalin ni Melanie.
“Da Jay-ar... rummuardan,” kinuna ni Melanie iti nakapsut a timek.
Immisem ni John. Ngem napunas ta nalagipna ti panangibagana a ni Gloria ti kaduana a sumarang iti Presidente. “This must be really an important date with the President.” Minatmatan manen ni Melanie ni John.
Nakasirip ni John iti gundaway. “Gapu iti napasamak iti Mindanao, hon,” kinunana.
“Ti Oplan: Maharlika? Kunak man no awan ti nakaammo a sabali?”
“Malaksid iti sumagmamano, hon... and that’s including the President and the mayor of the city that was also involved.” “Isu a dakayo ti kayat ti Presidente a makasango?” Nagtung-ed ni John. “Duakayo laeng?” Nagtung-ed manen ni John. “Kataebmo dayta mayor? Wenno laklakay ngem sika?” Nagmaga ti karabukob ni John. “Babai, hon...”
Immisem ni Melanie. “Babai?” inulitna. “Isu ti nangtulong kenka? Dati a military?”
Nagwingiwing ni John. “Sinursuruan kano laeng ti amana nga agiggem iti paltog...” “Malagipkon... Isu ti nagparang a kadua ti commander ti Philippine Army iti Basilan a nangpaksiat kadagiti ISIS ken Abu Sayyaf?” Nagtung-ed ni John. “Talaga a black ops...” “Tapno mailimed ti black ops iti press.” Nagtungtung-ed ni Melanie. “It was a good plan, hon... Will I be able to meet her?” Apagisu met a rummuar da Zeny Villa ken Jay-ar. “Dad, how come you’re so dressed up?” sinaludsod ni Jay-ar. “He is meeting the President, Jay-ar,” insungbat ni Melanie. “Not fair... How come I can’t meet him, too, dad?” Naklaat ni John iti kinuna ti anakna. Nagkarawa iti isungbatna. “Maybe, you will, son.” “I hope so, dad...” “Makitadakanto iti kapitolio, iho?” sinaludsod ni Zeny Villa. “Mabalin, mom.... Diak laeng masigurado dagiti aramiden ti Presidente. Ngem pakaammuankayto.” “Ala, intayo ngaruden, Melanie,” kinuna ni Zeny Villa. “I’ll be right behind you, Mrs. Villa,” insungbat ni Melanie. “Adda maysa a banag a nalipatanta, hon,” kinuna ni John apaman a nakapanaw da Jay-ar ken ti inana.
“Ania dayta?” “How to deal with Rommel and his family. Saan nga adayo nga agkikitatayo ita.” “What do you want me to do?” “Makigtot la ketdi ni Rommel no makitanaka a sibibiag.” “Dayta ti kayatko a mapasamak.” “Ket mabalin a padasennakanto manen a papapatay.” “Dayta ti kayatko nga aramidenna.” “You’re touting him, hon...” “Because I want to instill fear in him. Kayatko nga ipakita kenkuana a saan nga asi-asi ti Melanie nga am-ammona. A saanak a mabuteng ken kabaelak a labanan ida.”
Immanges iti nauneg ni John. “Ngem no mabalin, no kabaelam, adaywam pay laeng ida. Masapul a kasta... ta masapul a salaknibantayo ti Presidente ti Filipinas. Uray no ita laeng... Kalpasan daytoy, sanguenta ti kasinsinko.” “Pagustuanka.” “Mangnamnamaak?” “Kas iti panangnamnamak iti panangtungpalmo iti karim.” “Thanks, hon. Laglagipem koma nga ay-ayatenka.““I love you, too, hon. I’m yours for the rest of your life.” Minatamatan manen ni John ni Melanie. Naunegen a talaga ti riknana iti daytoy a babai. “You better go. Mom is waiting outside...” “Okay... Be careful out there...” Binisong ni Melanie ti pingping ni John sa timmallikuden. Ngem sakbay a nakaruar iti ridaw, nagsardeng. Timmaliaw. “What’s the name of that mayor again, hon?”
Uray la a naglamiis ti rusok ni John. Nakarikna iti danag. Dina ammo no apay.
“Mayor Gloria Sarandi,” insungbatna.
SIMREK da Agent Peters ken Agent Nicholas iti Central HyperMart. Adu ti tao nga agsi- shoping. Napataliaw dagitoy iti pannakakitada kadakuada ngem dida nasdaaw ta ipapanda a kamengda ti seguridad ti Presidente ti pagilian. Uray dagiti klerk ti pagtagilakuan, napataliawda ngem kas
kadagiti aggatang, awan ti un-unida. Nagderetso dagiti dua nga ahente iti elevator. Impis-itda ti maikatlo a kadsaaran.
Nakaul-ulimekda a dua ngem siertodan ti aramidenda. Tallo dagiti kameng ti PSG a naka- detail iti rooftop daytoy a pasdek: dua nga sniper ken maysa a lookout. Isuda dagiti nasken nga ipaknida tapno mabukodanda ti rooftop.
Apaman a nakagtengda iti maikatlo a kadsaaran, kinamangda ti ridaw a nakaisuratan ti “ACCESS TO ROOFTOP.” Linukatanda sa tinangadda ti agdan. Awan ti tao. Immulida. Nainayad ken naulimekda. Agingga iti nakagtengda iti ridaw a kumamang iti
rooftop.
Simmirip ni Agent Peters iti bassit a kuadrado a sarming iti ridaw. Nakitana dagiti tallo a nakauniporme a kameng ti PSG nga agtutungtong. Pinadasna a lukatan ti ridaw, ngem nakatulbek.
Inruar ni Agent Nicholas ti kankanayon nga itugtugotna a pagkurikor iti seradura. Nangiselsel iti dua a napipino a dippig a barut sa pinulpuligosna. Kalpasan ti sumagmamano a kanito, naltat ti lock ti ridaw.
“Are you ready?” inyarasaas ni Agent Peters ken ni Agent Nicholas. “I am,” insungbat ni Agent Nicholas. Inruarna ti paltogna a nakaptan iti silencer sa impatallikudna. Linukatan ni Agent Peters ti ridaw ngem nagranitrit ket napataliaw dagiti tallo a kameng ti PSG. Naggigiddan dagitoy a nangasut kadagiti paltogda.
“Good afternoon, gentlemen,” inkablaaw ni Agent Peters kadagiti tallo a saan a nangipakita iti pannakakellaatda. “Aguraykayo... saankami a kabusor.”
“Asinoka? Apay nga addaka ditoy? Restricted area ditoy. Dagiti laeng PSG ti mabalin nga umay ditoy. Ania kadi a branch ti naggapuam?”
“PNP SAF, paset ti Special Reaction Force. Imbaondakami ditoy a mangtulong kadakayo.” “Asino ti akimbilin?” “Dir. Gen. Manzano...” Nagrasaw ti PSG. “Saan a nasayaat daytoy... Saanda nga impakaammo kadakami daytoy...” “Apay a dimo awagan ni Gen. Manzano?” “Mapan a kasta!” natangsit ti sungbat ti pannakalider ti grupo. “Dakami a PSG ti akin-akem iti pannakasalaknib ti Presidente. Awan sabali a mangbaliw iti dayta a bilin no di ti Presidente met laeng...” Rinugianna ti nagradio.
Sineniasan ni Agent Peters ni Agent Nicholas. Naawatan ti naud-udi ti senias ket sakbay a makapag- transmit iti mensahe ti PSG, pinaltogannan daytoy. Napaspas met ni Agent Peters a nangasut iti paltogna ket pinagsarunona a pinaltogan dagiti dua pay a PSG. Agpapada a naudatal dagitoy. Impaknida dagiti bangkay iti linged ti air conditioning unit iti pantok ti pasdek.
ALISTO ti pagna da Agent Crawford ken Agent Tierney nga agturong iti tuktok ti pasdek ti kadakkelan a banko iti siudad. Adu a pannakabagi ti linteg ken tattao ti agpagnapagna nga agturong iti kapitolio ngem awan ti mangbibiang kadakuada. Uray dagiti dadduma a pannakabagi ti linteg no agsasabat dagiti matada, umisem laeng dagitoy a kasla awan aniamanna.
Dua a PSG ti nakapuesto iti ridaw ti banko. Ammo dagiti dua nga ahente nga adda pay dua a PSG iti ngato ti banko. Ngem nasken a maipaknida dagitoy a dua iti ridaw, sakbay a makaulida.
Idinto nga umas-asidegda kadagiti dua, sililimed nga inasutda dagiti jungle knife- da. Sinitar a dagus dagiti dua a PSG ida idi makaasidegda. Ngem saan a pulos a naguni dagiti dua nga ahente. Pinagsaggaysaanda a ginammatan dagiti dua a PSG a saan a pulos a nakalaban gapu iti pannakakellaatda, inlunodda dagitoy nga inyuneg sa ginetgetanda ti tengngedda. Pulos a dida nakapag-areng-eng.
Ngem naladawen idi makitada ti maysa pay a PSG a nakapaturongen ti paltogna kadakuada.
Nagkinnita da Agent Crawford ken Agent Tierney. Awan ti nakaibaga kadakuada a lima ti PSG nga adda iti banko.
NAKAUL-ULIMEK ni John nga agmanmaneho ngem agal-allangogan pay leng iti panunotna ti imbaga kenkuana ni Daniel. “Diak ammo no kasano ti panangibagak, manong, ngem diak agtalek iti daydiay a Gloria Sarandi.”
Padpadasenna a pagsasaipen dagiti pasamak. Kellaat a nagparang ni Gloria ditoy Ilokos. Sa nagparang dagiti Abu Sayyaf. Nairanrana ngata laeng? Ngem kinidnapda ni Gloria. Isu ti kinontakda. Apay nga isuna? Apay a saan a dagiti nagannak ni Gloria? Ngem isu ti nagbayad iti ransom. Adda idi nadlawna, ti litem ti rupa ni Gloria. Kasla saan a pudno. Kasla make-up. Dina inikkan idi iti kaipapanan.
Set-up ngata? Nakikomplot ken ni Anwar Kalifa? Ti la adda a mapampanunotna. Nabaknang ti pamilia ni Gloria. Ngem ania a gapu nga agatap ni Daniel ken ni Gloria? Napuotanna laengen a nakagtengen iti hotel a pagdagusan ni Gloria. Nagparada sa simrek. Addan nga agur-uray ni Gloria Sarandi iti lobby ti hotel. Nasulek dagiti matana iti terno daytoy a kimmepkep iti kasla nasuksukog a pammagina. Adda riang ti ternona manipud iti katengngaan ti luppona agingga iti mukodna ket naiparammag ti napudaw a luppona.
Simmabat ni Gloria kenkuana. Immarakup ken nangimaldit iti apagdeppel nga agek iti pingpingna. Nangibati ti nalabaga a bibig ni Gloria iti sangkabassit a marka ti lipstick iti pingpingna ngem impunas ti balasang ti dakulapna iti marka. “Nagguapokan,” inyarasaas ni Gloria. “Nagpintaska met,” insubadna. “Bolero,” immisem ni Gloria. “Ngem thanks...”
“Shall we go?” kinuna ni John. “I’m just gonna be driving my car...” “Saan... Adda staff car ti Presidente nga agur-uray kadata.” Nagpanunot ni John. Kasta ti panagsagana nga inaramid ti Presidente iti daytoy a panagsasarangda?
Madamdama pay, adda nagkiriring a selpon. Inarikap ni John ti bolsana tapno mapennekna no selponna. Ngem saan. Ni Gloria ti napardas a nanglukat iti purse- na. Kinitana ti selponna. “Adda awag manipud iti maysa kadagiti staff- ko iti munisipio. I have to take this phone call,” kinuna ni Gloria sa immadayo. Nagbati ni John iti lobby. Ipalpalawlaw ni John ti panagkitana iti uneg ti lobby. Adda dua a naka- coat and tie met a nakataltalna a nakatakder iti di unay adayo iti yanna. Malasin a nadusol iti uneg ti coat- da. Badigard ngata ti Presidente dagitoy?
Apay a napateg unay ni Gloria iti Presidente? VIP ti trato ti Presidente iti balasang. Immanges ni John iti nauneg. Nagpagnapagna a pangiliwliwagna kadagiti agsisimparat itan a saludsod iti panunotna mainaig ken ni Gloria. Agingga a napanunotna ti napan iti restroom. Napasardeng idi mangngegna ti timek ni Gloria.
“Hindi puwede. Ano ba ang pinagsasabi mo?” natangken ti timek ni Gloria. “Kaya ko yan... hindi maging sagabal sa plano. Nasken a talkennak. Kasano nga ikkak ti... Ania? No painumennak, di pati siak makaturog met? Mano kadi a klase ti arak ti adda iti limousine? Apay ngamin a nasken pay laeng a paturogen? Kayatko a makitana ti mapasamak. I have my own
reasons. Maawatannak? Okey, okey... Painumek. Bye.” Nangngeg ni John ti kanaktuol ti sapatos ni Gloria. Nagsapul iti paglemmenganna. (Maituloyto)