Okeyka, Apong
MAYSA kadagiti panangabaruanan iti daytoy a baro a tawen ket ti panamagbalin iti wagas ti panagbiag a makaay-ayo. Ket ti tulbek daytoy, isu ti panangpasimple iti wagas ti panagbiag ( lifestyle).
Adtoy dagiti sumagmamano a singasing no kasano a mapasimple ti wagas ti panagbiag:
• Yad-adu ti gumanar ken ibasbassit met ti aggastos. Agbalin a simple iti amin a banag. Apay a pagbalinen a komplikado dagiti bambanag? • Iti amin a banag, liklikan ti agbalin a nagarbo. • Adalen ti arte ti panag- recycle kadagiti amin a bambanag. • Liklikan ti ag- panic buying. Awan met laeng serbina ken sika met laeng ti maatiwan. Kasta met a liklikan ti impulse
buying wenno panaggatang iti magustuan no addan iti tiendaan. Masapul nga adalentayo a naimbag no talaga a kasapulan wenno saan ti pangpanggepentayo a gatangen.
• Tagiragsaken dagiti naimbag nga ipaay ti panagbisikleta ken panagpagnapagna. Yad-adu ti oras a kaadda iti sidong ti Nakaparsuaan.
• Idian dagiti nangingina a panaglang-ay ken parambak a kas iti piesta, kasangay, panagbuniag ken anibersario, kdp.
• Sanayen a disiplinaen ti bukod a bagi nangruna iti panaggastos. Napateg daytoy a panangimaton iti bukod a bagi.
• Saan unay nga agpannuray iti baro a teknolohia. Usaren ti kinamanagparnuay ken dagiti nakatalimeng nga abilidad iti panagparnuay kadagiti simple nga imbension ken inobasion, kas iti panangaramid iti lipnok iti hardin tapno adda pakaurnongan ti tudo ken pagipupokan iti paltat ken tilapia.
• Usaren dagiti talentom a kas iti panangsursuro kadagiti ubbing nga agpinta, ken/wenno agtokar kadagiti instrumento ti musika. Maysa a wagas daytoy a makaganar babaen ti sangkabassit a subad ti talento, bannog ken panawenmo ken maaddaanka pay kadagiti baro a gagayyem.
• Idian dagiti nangina a bisio, kas iti panagsugal ken panagsigarilio; ken dadduma pay a paggastuan.
• ‘Agpaigid.’ Wenno lipaten ti naala a titulo wenno propesion ket padasen ti agtalon. Mayasidegka kadagiti tattao ken “makapagtaengka” manen iti bukodmo a komunidad wenno lugar.
• Liklikan ti umapal nangruna ‘tay apal a dakes. Apay koma a gumatangka iti baro ti modelona a telebision no awan met ti igatang? Apay koma nga ipadpadam ti bagbagim iti kaarrubam? • Lipaten ti ugali a “one day millionaire.” • Mulaan amin a bakante a lote. Iti biang dagiti agnanaed iti siudad, awan ti imposible iti panagaramid iti bukod a pagnatengan.
• Para kadagiti awan trabahona, padasen a taliawen ti alternatibo a wagas ti panagbiag. Sursuruen ti agsakripisio.
• Kamaudiananna, suroten ti panagplano iti pamilia, ken kadagitoy a tiempo, saan nga agas-asawa a nasapa.—O