Padasem Daytoy, Kailian
Simple met la gayam, kas naammuanmi kadagiti teknisian ti Known-You Seed…
IDI Disiembre 5-9, 2018, naawiskami a dumar-ay iti maika-50 nga anibersario ti Known-You Seed, maysa kadagiti kangrunaan nga agpatpataud kadagiti kabaruan a barayti dagiti nateng ken dadduma pay a makuna a high-value crops. Iti panagpaspasiarmi iti research
station ti kompania iti Pingtung County, nakitami dagiti mula a tarong a nakaadadu ti bungada. Adda dagitay atitiddog, adda dagiti nagtimbukel, adda met dagiti nadumaduma ti maris dagiti bungada. Adda dagiti atitiddog a berde, adda dagiti
variegated. Adda pay ‘tay variegated a medio derosas ti garitna a paatiddog.
Makaay-ayo a buybuyaen dagitoy nakabungbunga a tarong. Isu a sinaludsodmi kadagiti teknisian no ania ti sekretoda.
Simple met gayam. Tapno umadu dagiti sanga ti maysa a pinuon a pagtaudan dagiti bunga, putdendan ti ungto ti mula no addan innem a bulongna. Babaen daytoy, dakkel ti posibilidadna nga agpataud daytoy iti uppat a sanga. Bayat ti idadakkel dagiti sanga, guyodenda a yadayo dagitoy iti tunggal maysa tapno lumawa ti masakupanda ket saanda nga agiinnagaw iti espasio. Babaen met itoy, ad-adu ti maibunga ti tunggal sanga.
Maysa pay nga ar-aramidenda ti panagikkatda kadagiti akimbaba a bulong— dagitay asideg iti daga— tangay awan met usar dagitoy malaksid a mabalin pay a pagumokan dagiti insekto nga agdadael kadagiti mula.
Siempre, nasken met ti umno a pannakaisagana ti pagmulaan. Sakbay a maaplagan iti alep-ep a plastik ( plastic
mulch), magameranen ti daga iti napagtipon nga organiko ken kemikal nga abono tapno daras dumakkel dagiti mula ken ad-adu ti maibungada.
Nasken met ti umdas a padanum tapno maagsep a nasayaat dagiti mula dagiti sustansia nga adda iti daga.
Nasken pay nga ikonsiderar ti panagpili kadagiti barayti nga imula a mayannatup iti lugar a pagmulaan, ken no ania ti kayat dagiti aggatang.
Nadumaduma ngamin ti paborito dagiti tattao. Adda dagiti kayatna ‘tay para pinakbet, adda met dagiti agar-aramid iti torta. Adda met dagitay kayatna ti tinuno.
Padasenyo man met ‘toy ar-aramiden dagiti teknisian ti Known-You Seed.—O