Sika ken ti Tarakenmo
ADU dagiti mayat nga agtaraken kadagiti ayup a pagliwliwaanda iti uneg ti pagtaengan. Mairaman dagitoy dagiti ubbing. Laglagipen laeng a ti panagtaraken kadagiti ayup, adda met katukad daytoy a responsibilidad.
No aginteres dagiti ubbing nga agtaraken iti ayup a kas paglinglingayan, nasken a masursuruanda iti nasayaat a pannakiay-ayamda iti ayup a taraknenda, no kasano nga aywananda ti ayup; iti kasta, maipasagepsep kadakuada dagiti tagipatgen iti panangipateg kadagiti ayup.
Makatulong ngamin ti panagtaraken kadagiti ayup a kas paglinglingayan iti emosional a panagdur-as dagiti ubbing.
No ngarud ikalikagum ti maysa nga ubing kadagiti dadakkelna a kayatna ti agtaraken iti ayup, rumbeng laeng met nga amirisen no kabaelanna ti agtaraken iti ayup a kayatna. Ammuen pay no ania nga ayup ti maitutop a taraknenna. Nagduduma ngamin ti atension a kasapulan dagiti ayup. Adda nalaka a tamingen, adda met narigat ta kasapulan daytoy ti adu a tiempo, bannog ken magastos.
Makaay-ayo a taraknen ti maysa nga aso. Sursuruanna pay ti maysa nga ubing a mangibaklay ken mangted iti kaipapanan ti responsibilidad.
Mapaliiw a no agduyos ti maysa nga ubing nga agtaraken iti aso, masursurona nga ipateg dagiti ayup, saan laeng a ti tarakenna nga aso.
Nasken pay nga ipalawag iti ubing no ania ti maitutop a klase ti aso ti taraknenna.
No pusa met ti taraknen, ammuem a pagaayat ti pusa ti agmaymaysa. Nupay kasata, manangipateg met daytoy nga ayup.
Kinapudnona, saan laeng a maymaysa nga ubing ti makuna nga akintaraken iti pusa no adda iti uneg ti pagtaengan. Agbalin a taraken a pagliwliwaaan dagiti amin a kameng ti kaamaan.
No billit met ti taraknen, nanamnam-ay laeng ti panagtaraken iti daytoy ta bassit laeng nga atension ti kasapulanna. Kasta met ti koneho ken pag- ong.
Adu latta a tagipatgen ti masursuro ti maysa nga ubing kadagitoy nga ayup. Mabalin pay a sagidsagiden ti ubing dagitoy a taraken a manglinglingay saan laeng nga iti ubing no di pay ket kadagitoy a taraken a mismo.
Nalaka met a taraknen dagiti nagduduma ti klasena nga ikan. Makaay-ayo ti langada a mangawis iti interes dagiti babassit pay nga ubbing.—O
(Adda kadi met tarakenyo nga ayup a kadkaduayo wenno paglinglingayanyo iti pagtaenganyo? Ibinglay iti daytoy a kolum ti padasyo iti daytoy a tarakenyo. Ipatulod ti padasyo ken ladawan a kaduayo ti tarakenyo iti: bannawagmagazine.mb@gmail.com.— Editor)