Idi Un-unana a Panawen

Bannawag - - Itoy A Bilang - Ni SOLOMON V. GERNACIO

IDI un-unana a panawen, ni hippopotamus ti kapintasan kadagiti amin nga ayup nga agnaed iti kapanagan. Addaan iti nalamuyot a dutdot, atiddog a lapayag, ken atiddog a burboran nga ipus.

Inaldaw, adda ni hippopotamus iti igid ti karayan a mangdaydayaw iti ladawanna iti danum. “Talaga a siak ti kapintasan!” sangkakunana iti bagina.

Iti maysa nga aldaw, linamut ti apuy ti kapanagan. Nagtataray dagiti elepante tapno di ida gam-udan ti apuy. “Ay, umay ditoy dagiti elepante tapno dayawendak!” kinunkuna ti hippopotamus a di nangisina kadagiti matana iti danum. Simmaruno a dumalagudog a limmabas dagiti zebra. Sa dagiti leon, sa dagiti ugsa. Agingga a ti uram, dimmanon iti yan ti hippopotamus. Immuna a linamut ti apuy ti burboran nga ipusna. “Tulongandak!” inyikkis ti hippopotamus. “Amangan no mauram ti napintas a dutdotko!”

Kasta nga agpayso ti simmaruno a napasamak. Isu a dagus a tinurong ti hippopotamus ti danum ket nagtaneb dita agingga a naiddep ti uram.

Idi sumang-at ti hippopotamus manipud iti danum, nakitana ti bagina nga awanen ti napintas a dutdotna, awanen dagiti atiddog a lapayagna, ken kangrunaanna, awanen ti ipusna.

Iti babainna, dagus a nagsubli ti hippopotamus iti danum tapno ilemmenganna dagiti padana nga ayup. Agingga kadagitoy nga aldaw, agnanaed iti danum ket dagiti laeng matana ken ti agongna ti iruruarna. Iti laeng met rabii a tumakdang, no daytay awanen ti sabali nga ayup a makakitkita kenkuana.—O

Newspapers in Tagalog

Newspapers from Philippines

© PressReader. All rights reserved.