Ti Gasatmo Ita a Lawas
CAPRICORN (Disiembre 21- Enero 19). Maiwaras a nasayaat ti tiempom ita para iti trabaho, pamilia, ken linglingay. Posible a makaisingay pay para iti serbisio iti publiko ken/wenno iti simbaan wenno relihion. Nagasat a numero: 3, 4, 8.
AQUARIUS (Enero 20- Pebrero 19). No adda man dagiti sumangbay a grasia itoy a lawas, gapu iti agawa, gaget ken anus, saan ket a gapu iti datdatlag wenno tiamba. Maparaburanka ketdi iti naruay a tulong manipud kadagiti pagayam. Nagasat a numero: 1, 5, 7.
PISCES (Pebrero 20- Marso 20). Sika ti ad-adda a makaikeddeng no ania ti pudno a kabaelam ken kayatmo nga aramiden. Maburiboranka laeng no imdengan ti makuna ti sabali maipapan iti kabaelam. Nagasat a numero: 3, 4, 9.
ARIES (Marso 21- Abril 20). Maysa a proyekto ti mangitunda kenka kadagiti nadumaduma a lugar ken pakagun- odam kadagiti baro a gagayyem. Siguraduen ketdi a kanayon a nalawag ti komunikasionyo ken patpagen. Nagasat a numero: 1, 6, 7.
TAURUS (Abril 21- Mayo 20). Maikeddengmo iti apagtapog ti lawas ti kayatmo nga aramiden maibatay iti kinakomportable ken pagimbagan ti pamilia. Maaddaanka met iti tiempo tapno maipamaysa ti maysa a pagduyosan ti rikna. Nagasat a numero: 3, 4, 8.
GEMINI (Mayo 21- Hunio 20). Ipangruna ti panangaywan iti salun-at ta ad-adda a ti pisikal a kabaelan ti pagpannurayan ita kadagiti yamanen. Addada latta ketdi maawat a grasia manipud kadagiti naparnuay ti kabaelan ti utek. Nagasat a numero: 2, 5, 9.
CANCER (Hunio 21- Hulio 20). Naannayas ti lawas. Marikutanka laeng no ikagumaanan a problemaen ti parikut ti sabali, wenno ti sangalubongan. Dimo yimut ti isemmo ta daytoy ti mangisangbay kenka ita iti yamanem. Nagasat a numero: 1, 4, 7.
LEO (Hulio 21- Agosto 20). Adda kinaregular dagiti aramid ita. Posible a seknannaka ti dudukot ngem mabugaw daytoy babaen ti panangilatang iti tiempo ti liwliwa wenno panagrelaks. Adda dagiti naisalsalikad a pirak a manamnama a makaut iti yaay ti rigat. Nagasat a numero: 3, 5, 9.
VIRGO (Agosto 21- Septiembre 22). Panagrelaks ti kasapulam tapno agbalin a kasla nakalaklaka dagiti aramid, ken nakagangganas ti agbiag. Mangabaruanan, kas pagarigan, pabaruen ti urnos dagiti alikamen iti pagtaengan. Nagasat a numero: 2, 6, 8.
LIBRA (Septiembre 23- Oktubre 22). Addaka ita iti naimbag a situasion a kabaelam pay a risuten ti problema ti sabali, no di man mangipaay iti nasayaat a balakad kadagiti agkasapulan. Addaanka pay iti umdas a rekursos tapno makatulong iti sabali. Nagasat a numero: 1, 4, 9.
SCORPIO (Oktubre 23- Nobiembre 22). Mapunno ita ti ulom kadagiti presko wenno baro nga idea. In-inuten ketdi nga usaren tapno umdas para iti sibubukel a tawen. Umad-adu met ngaruden ti agtalek iti kabaelam. Nagasat a numero: 3, 5, 7.
SAGITTARIUS (Nobiembre 23- Disiembre 20). Kalpasan dagiti nagapuanam a yamanen, maikari met ti bagim a paramanam iti gin-awa. Ipaay ti tulong kadagiti umasideg kenka; adda ngamin dagiti mangtagidakes no inka idiaya ti kinaimbag. Nagasat a numero: 1, 4, 8.