Teleserye a Pagbidaan ni Angel ti Mangsukat iti “Ang Probinsyano”?
NAKAAY-AYAT dagitoy fans ni Angel Locsin. Saludsodda a saludsod no kaano a marugian a maipabuya ti teleserye a “The General’s Daughter” a pagbidaan ti aktres, ken no ania a teleserye ti sukatan daytoy.
Awan met ketdi dakesna ti kinadagullit dagiti fans ni Angel. Naammuanmi ketdi a naruayda latta nga agrukbab iti aktres.
Maibatay iti trailer, aksion daytoy a teleserye ni Angel. Ket gapu ta maipapan iti militar ken politika, adu ti mangipato a mabalin a ti “Ang Probinsyano” a pagbidaan ni Coco Martin ti sukatanna.
Kakadua ni Angel iti daytoy a teleserye da Albert Martinez, Tirso Cruz III, Janice de Belen, JC de Vera, Paulo Avelino, Eula Valdez, Arjo Atayde, Ryza Cenon ken Maricel Soriano.
* * * Maragsakan ni Sam Milby iti panagballigi ni Toni Gonzaga iti
career daytoy iti showbiz ken iti personal a biag. Maipalagip a ni Toni ti umuna a nakaloveteam ni Sam babaen ti pelikula a “You Are The One” ti Star Cinema.
Iti daytoy 2018, karaman iti Metro Manila Film Festival ti pelikula a pagbidaanda manen, kaduada ni Alex Gonzaga, ti “Mary, Marry Me.”
Kuna ni Sam a saan a nagpangngadua a mangawat iti nasao a proyekto ta nabayag metten a kayatna manen a makadua iti trabaho ni Toni. Sa maysa, akuen ni Sam nga addaanda ken Toni iti naidumduma a chemistry.— O