Nabara a Kablaaw ken ni Catriona!
ITI pannakasursurat daytoy, kayal-alat ni Catriona Gray ti 2018 Miss Universe, ‘bagis.
Siempre, nagragsak ti sibubukel a Filipinas. Isu ti maika-4 a Filipina a nangyalat iti daytoy, sinarunona da Gloria Diaz, Margie Moran, ken Pia Wurtzbach.
Kablaaw ngarud daytoy ken ni Catriona, ti reyna ti uniberso!
* * * Sumangkaragsak met ni Clint Bondad, nobio ni Catriona iti innem a tawenen.
Malaksid, siempre, a nobiana ti Miss Universe, naimatanganna no kasano a nangrugi ni Catriona.
Modelo ken aktor, karaman ni Clint iti “ASAP” Cover Boys a pagkamengan pay da Tommy Esguerra, Albie Casino, Luis Hontiveros, ken Tanner Mata.
* * * Apagapaman met a kontrobersial daytoy a 2018 Miss Universe ta nairaman ni Miss Spain a maysa a transgender.
Adda agkunkuna a simmalip latta koman iti Miss Gay Universe.
Iti biangtayo, ‘bagis, no awan la ketdi ti nabalusingsing a pagalagadan ti Miss Universe, go! Ta sakbay a napalugodan ni Miss Spain, mamatitayo a naglasat iti naiget a deliberasion dagiti pagalagadan ti nasao a salisal.
* * * Malaksid iti balligi ni Catriona, maysa kadagiti rinambakan dagiti Filipino ti nagteng a balligi met ni Miss Vietnam. Immuna a nagsiwarak ti maipapan kenkuana iti video a tinagibassit da Miss America ken kakaduana da Miss Vietnam ken Miss Cambodia gapu ta nakapuyda kano nga ag-Ingles.
Naka-Top 5 ni Miss Vietnam, da Miss America ken kakaduana, nganga!
* * * Adu ti naguyugoy ni Miss Vietnam a Filipino, ‘bagis, ta idi gayam nagkolehio daytoy, maysa a babaonen.
Sa ti premiona iti pannakisalipna, intulongna iti scholarship. Pudno a makaparukbab, di kadi? Winner-ka met, Miss Vietnam!—O
(Chairman ni Kabagis Eloy iti Hunta Direktiba ti FAMAS, Host-Producer ti Celebrity Hour Media Forum, ken Trustee iti Aliw Awards Foundation, Inc.—AST)