Numero Uno!
Kablaawan ti Bannawag ti maysa kadagiti kolumnistana, ni Anna Liza Madayag Gaspar, a nakagun- od iti Umuna Puesto iti Maikadua a Tukad ti Local Treasury Exam.
Nagun- od ni Anna Liza (birngasna), akinkolum iti “No Adda Sigsigloten, Adda Met Warwaren” (panid 6) ken Revenue Collector II ti Munisipio ti Piddig, Ilocos Norte, ti kangangatuan a grado (88.89%) iti Intermediate Competency on Local Treasury Examination (ICLTE) nga inangay ti Civil Service Commission idi Oktubre 14, 2018.
Iti 555 a nageksamen, 159 laeng ti nakaruar. Ti ICLTE ti maikadua nga exam iti agtallo-a-tukad nga Standardized Examination and Assessment for Local Treasury Service (SEAL) ti Department of Finance- Bureau of Local Government Finance.
Maysa a Certified Public Accountant, nagturpos ni Anna Liza iti BS Business Administration and Accountancy iti University of the Philippines, Diliman. Mangal-ala ita iti Master of ASEAN Studies iti UP Open University.
Anak da Anita Madayag ti Tangaoan, Piddig, Ilocos Norte ken daydi Dios-ti-aluadna a Warlito V. Gaspar, Sr. ti Carasi, Ilocos Norte ni ALMG.