Ti Gasatmo Ita a Lawas
CAPRICORN (Disiembre 21- Enero 19). No estranghero dayta, kayatna a sawen a bolboladasennaka laeng kadagiti nasasam-it a balikasna. No kayatmo a mangngeg ti pudno, amadem iti tao a kaasitgan iti pusom. Nagasat a numero: 1, 5, 9.
AQUARIUS (Enero 20- Pebrero 19). Nasayaatka a kadkadua ita a lawas. Agbalinka a naimbag a mammagbaga. Ti adatna, adda met dagiti parikutmo a nasken a maidatag iti maysa a mammagbaga tapno matingitingna ken makaipaay iti balakad. Umasidegka iti tao a pagtamdam la unay. Nagasat a numero: 3, 4, 8.
PISCES (Pebrero 20- Marso 20). Maaddaanka iti tiempo tapno maamirismo a nasayaat dagiti pagpilian iti sanguanam. Pilien ti ania man kadagitoy a saan a makaipaay kenka iti pakaburiboran. Nagasat a numero: 2, 5, 7.
ARIES (Marso 21- Abril 20). Marikutanka iti biagmo gapu ta kitkitaem ti ania man a panagbalbaliw kas pannakigasanggasat. Padasen a baliwan ti perspektiba. Saan kadi a grasia no iti inaldaw, addaka iti sidong dagiti patpatgem? Nagasat a numero: 3, 4, 9.
TAURUS (Abril 21- Mayo 20). Sukimatem amin a posible a wagas tapno maduktalam ti umno a direksion ti biagmo. Sakbay a mangiwayat iti addang, penken ti adda a kabaelan ken dagiti potensial. Nagasat a numero: 1, 5, 7.
GEMINI (Mayo 21- Hunio 20). Manamnama nga amin a maiggamam ita, agbalinda a parabur. Maisupadi ketdi dagiti balikas ta mabalin a mangsugatda. Annadan ngarud ket arisiten a nalaing ti kapanunotan sakbay nga agsao. Nagasat a numero: 3, 4, 8.
CANCER (Hunio 21- Hulio 20). Tagtagiurayem ti kongkreto nga aramid; ngarud, madlawmo a masansan a dagiti nainsabongan a balikas laeng ti adda a maidiayada kenka. Nasayaat met daytoy tapno makaasideg kenka dagiti pudno a makatulong ken kasapulam. Nagasat a numero: 2, 6, 9.
LEO (Hulio 21- Agosto 20). Maklaatka ita iti bileg ken kabaelan a maaramidan ti panagtalek ken pannakikadua iti kinapudno. Agbalin laeng ketdi a namaris ti aglawlaw no ramenan met iti angaw ti pannakipulapol. Nagasat a numero: 1, 4, 8.
VIRGO (Agosto 21- Septiembre 22). Panagtalek iti kabaelan ti mangalut- ot kenka iti nakaigayunggayongam a parikut. Nagur-urayka iti mangisalakan kenka ket nalipatam nga addaanka kadagiti naisangsangsayan a talugading a kumpetam ken mangyaon kenka. Nagasat a numero: 3, 5, 7.
LIBRA (Septiembre 23- Oktubre 22). Mabalin a gapu iti bukodmo nga addang, adu ti mangibilang a naginadka ket umadayoda kenka. Suertem ketdi daytoy ta iti daytoy a wagas a masuotmo dagiti pudno a makaawat kenka ken maikari iti panagtalek ken pammategmo. Nagasat a numero: 2, 6, 8.
SCORPIO (Oktubre 23- Nobiembre 22). Dakkel ti maaramidan ti idiayam a tulong iti masakbayan ti maysa nga asideg a kabagian. Pagimbaganna ta saanka a mangnamnama iti kasukatna nupay kayatmo man wenno saan, masubadankanto. Nagasat a numero: 1, 4, 9.
SAGITTARIUS (Nobiembre 23- Disiembre 20). Napartak ti panagpauli ita iti pirak ti panguartaan ken pagsapulan. Ad-adda pay a pumartak no ad-adda nga ituon kadagitoy ti imatang ken idian dagiti aktibidad a makuna a “buong nga alkansia.” Nagasat a numero: 2, 5, 7.