Panangimaton iti Pagtaengan
NO trataren dagiti nagannak dagiti tin-edier nga annakda a kasla ubbing pay laeng dagitoy, kasla maiduma ti galad dagitoy nga annak no maidilig kadagiti kapatadanda a nawaya iti nainget a pannalaknib wenno pannakibiang dagiti nagannak kadakuada kadagiti maiparbeng nga aramidda.
Adda dagiti nawaya nga ubbing a mangtaktakuat iti kinangayed ken kadagiti karit ti biag ti kinaagtutubo, adda met dagiti makonkonsintidor nga agtutubo iti nailet a panaggargaraw gapu iti kinainget dagiti dadakkelda. Kasla mabekbekkel dagiti kakastoy nga agtutubo gapu iti pannakatratarda a kasla ubbing imbes a kas iti tumantanor koma a nataengan.
Masansan a nasapsapa a mapagawid dagiti nalabes ti pannakasalsalaknibna nga ubbing. Mapalpalubosan met a naladaw nga agawid dagiti nawaywaya nga ubbing no la ketdi gapu iti napateg a rason. Kaaduanna nga aklonen lattan dagiti sobra ti pannakasalaknibda nga ubbing ti bilin dagiti nainget a dadakkelda a kas paset ti pannakaigigir ti pagsayaatanda.
Kadawyan pay nga ibilbilang dagiti masalsalakniban nga ubbing a normal laeng daytoy. Aklonen dagiti kakastoy nga agtutubo nga awan ti maaramidda no ibilbilang pay laeng dagiti dadakkelda a kasla maladaga wenno babbassitda pay laeng nga ubbing iti laksid ti panagbaro wenno panagbalasangdan.
No adda dagiti maigiggigir unay nga ubbing iti elementaria wenno iti hayskul, mapalpaliiw a kasla maiputputong wenno maisinsinada.
Saanda pay ketdi a makilangenlangen kadagiti dadduma nga estudiante ken sumagmamano laeng dagiti gagayyemda. Mapaliiw pay ketdi dagiti mannursuro a makasinga ti galadda ken kasla saan pay a simmangbay ti maitutop a tigtignayda no maidilig iti agdama nga edada.
Dagiti nalabes ti pannakasalsalaknibda nga agtutubo ti masansan a mangnamnama a matulongan. Saanda a mapagtalkan a mangrisut kadagiti pakaipasungalngalanda a parikut.
Agsipud ta kaaduan kadagitoy a tin-edier ti awanan iti wayawaya ken kanayon a sarsaripatpatan dagiti dadakkelda, kaaduanna met kadakuada ti saan a siaannugot a makipaset kadagiti nawaya nga aramid. Agbalinda ketdi a nagaraw ken kasla agtigtignay a rebelde no addada iti ruar ti pagtaengan. Iti sabali a pannao, kasla kankanayon a nailet ti paggargarawan dagitoy no idilig kadagiti dadduma a kapatadanda.—O