Sika ken ti Tarakenmo
SAKBAY nga ikkan ti ubing iti taraknenna nga ayup a paglinglingayan ken kadkaduana iti pagtaengan, nasken a panunoten ti kabaelanna a mangtaraken iti daytoy.
Kas nagannak, nasken a siguraduen a maitutop ti ayup kadagiti aramid iti pagtaengan, dagiti aramid dagiti kameng ti kaamaan, ken dadduma pay.
Nasken pay a masursuruan dagiti ubbing no kasano a tratarenda ti ayup ken dagiti kasapulan a maipaay iti taraknenda.
Malaksid iti daytoy, nasken pay nga akuen dagiti nagannak ti responsibilidad iti panangtaraken iti ayup no saan a kabaelan ti anakda a taraknen wenno ipaay dagiti kasapulan ti ayup tapno agtalinaed a nasalun-at ken naragsak.
Kas nataengan, pagrebbengan met ti pannakamantener ti salun-at ti ayup ta saan a naan-anay a maaramid ti ubing daytoy a pagrebbengan.
Maibalbalakad pay nga ibilin dagiti nagannak dagiti nasken nga aramiden ti ubing iti pannakataraken ti ayup iti naurnos ken nagduduma a wagas.
Ibilin iti ubing dagiti kasapulan ti ayup, no kaano nga ipasiar, no kasano nga ikabil iti pagpupokan ken pannakadalus ti pagnanaedan ti ayup.
Saan ketdi a paggigiddanen dagiti isuro nga aramiden ti ubing tapno maurnosna dagiti aramid nga ipaayna iti ayup.
Tapno kanayon a malagip ti ubing dagiti rumbeng nga ipaayna iti tarakenna nga ayup, mabalin nga isurat dagitoy iti kuaderno wenno iti pisarra a kankanayon a mabasana.
No met ikalikagum ti ubing ti exotic wenno naisalsalumina nga ayup a saan a kadawyan a matartaraken, ipalawag kenkuana no apay a saan a mabalin a taraknen iti pagtaengan daytoy.
Ipalawag pay a mapukpukawen ti puli dagiti kakastoy nga ayup gapu iti pannakadadael ti natural a pagtaenganda, polusion, saan a maisarsardeng a pannakaanup, ken dadduma pay a rason.
Ipalawag pay iti ubing nga addaan met iti rikna ti ayup, ken ammona ti masaktan ken marigatan.
Daytoy ti rason a siguraduen a saan a rumbeng a masaktan ti ayup no kaayayamda wenno saan pay a rumbeng kankanayon a masinga.
Ipaganetget kadagiti ubbing ti positibo ken nainraeman a pannakatratar ti ayup.
Saan pay a naan-anay ti pannakaawat dagiti ubbing a nababbaba ngem 12 ti edadda kadagiti aramid iti umno a panagtaraken iti ayup.
Gapu iti daytoy, maipatpatigmaan nga adda koma latta nataengan a kadkadua ti ubing no makiay-ayam iti ayup agingga iti masigurado a maitutop ti panangtratarna iti tarakenna ken masigurado ti positibo a panaglangenda iti ayup.
Saan pay ketdi a masigurado a nasayaat ti panaglangen ti ubing ken ti ayup uray no adda nataengan iti asideg.
Kasapulan pay laeng a sursuruan ken kankanayon a bilinen ti ubing kadagiti aramidenna iti nainraeman a panagtaraken iti ayup.
Ipalagip pay iti ubing no kasano nga inaigna ti panagtarakenna iti ayup kadagiti tattao iti aglawlawna.
Maibalbalakad pay ketdi nga ad-adda nga epektibo ti panangtaraken ti ubing iti ayup no makitkitana no kasano ti panangtaraken dagiti dadakkelna ken dadduma a nataengan iti pagtaengan iti ayup.
No makita ti ubing no kasano ti panangtratar dagiti nataengan a kabbalayna kadagiti ayup, aramidenna met daytoy. -- O (Adda kadi met tarakenyo nga ayup a kadkaduayo wenno paglinglingayanyo iti pagtaenganyo? Ibinglay iti daytoy a kolum ti padasyo iti daytoy a tarakenyo. Ipatulod ti padasyo ken ladawan a kaduayo ti tarakenyo iti: bannawagmagazine.mb@gmail. com.— Editor)