Idi Un-unana a Panawen

Bannawag - - Itoy A Bilang - Ni SOLOMON V. GERNACIO

IDI un-unana a panawen, ni pangamaen nga Abraham, nakatugaw iti sango ti toldana iti dayta a paset ti desierto. Kas iti nakairuamanna, sakbay a mapan maturog, agtugtugaw ditoy ta amangan laeng no adda ganggannaet a mayaw-awan nga agkasapulan iti pagdagusan.

Iti di mabayag, adda nasaripatpatanna nga umas-asideg a lakay. Atiddog ti imingna ket nakasarukod; kasla kakaasi a magna iti bannogna. Saan a nakakaskasdaaw ta agtawenen iti nasurok a 100.

Timmakder ni Abraham idi makaasideg ti lakay ket inawisna daytoy a sumrek iti toldana. Binnugguan ni Abraham dagiti saka ti lakay, sa intedna kenkuana ti kapintasan a pagtugawan, sa kalpasanna, indasaranna ti lakay iti pangrabiina. Siuulimek ti lakay a nangan a di man laeng nagkararag sakbay a sinangona ti pangrabii.

“Awan kadi ti pammatim iti Ama nga adda iti sadi langit?” sinaludsod ni Abraham iti lakay.

“Ti laeng apuy ti pagdaydawayak; awan ti ammok a sabali a Dios,” kinuna ti lakay.

Gapu iti daytoy, nakapungtot ni Abraham ket pinaruarna ti lakay tapno palabsen daytoy ti rabii iti nasipnget a desierto. Isu met a nangngeg ni Abraham ti timek ti Dios: “Yannan daytay lakay a sangailim?”

“Pinapanawko,” kinuna ni Abraham, “gapu dina ammo ti agdaydayaw Kenka!”

Insungbat ti Dios: “Inan-anusak iti daytoy napalabas a nasuroken a sangagasut a tawen iti laksid a dinak daydayawen. Ket di la mabalin nga an-anusam uray iti daytoy laeng a rabii uray dinaka met singsingaen?”

Nagpakawan ni Abraham ta naamirisna ti biddutna, isu a napanna sinurot ti lakay ken insublina iti toldana tapno ituloyna ti mangan ken aginana. Ket iti kabigatanna, pinalubosanna ti lakay nga ituloy daytoy ti panagdaliasatna.

Ta ti kayat a sawen ti panagdaydayaw iti Dios isu ti panangngaasi kadagiti agkasapulan a masabat iti dalan, uray pay saan a kapammatian.—O

Maatap a sinurat daytoy ni Jeremy Taylor (1613-1667), nagpaay a maysa kadagiti pangulo ti Simbaan ti Inglaterra idi panawenna.

Newspapers in Tagalog

Newspapers from Philippines

© PressReader. All rights reserved.