Siled ti Kararag
Basaentayo ti Mateo 8:23-27:
“Apay nga agbutengkayo?” kinuna ni Jesus. “Nagbassit ketdin ti pammatiyo!” Bimmangon ni Jesus. Pinagtalnana ti angin ken dagiti dalluyon ket nagkalma iti kasta unay.— Mateo 8:26
IDI agturposak iti primaria, naragsakan ti amin para kaniak. Babaen ti parabur ni Apo Dios, nagun- odko ti kangatuan a grado. Kanayon nga ibaga dagiti gagayyemko a naimbag kaniak ti Dios.
Ngem mariribukanak idi. Awan talna ti panunotko, ket saanak a makaturturog. Uray idi agturposakon iti elementaria ket mabalinkon ti sumrek iti sekundaria, madandananaganak ta amangan no didak kabaelan a pagadalen ti pamiliak. Gapu iti pammatik, adda talgedko a no kasano ti panangaywan kaniak ti Dios agingga a nadanonko ti agdama a kasasaadko, isu met laeng ti agtultuloy a mangkitkita kaniak. Nupay kasta, agparparikut iti kuarta ti pamiliak.
Napanunotko ti panawen a ni Jesus ken dagiti adalanna, bimmallasiwda iti dan-aw. Uray ammo dagiti adalan a kaduada ni Jesus, nagbutengda latta. Kasta met kadatayo. Kaduatayo ni Jesus iti bilog, ngem iti kanito nga umay ti riribuk, malipatantayo nga adda isuna a pagsanggirantayo, nga isu ket nabilbileg ngem ti riribuk a paglaslasatantayo. Kinapudnona, nakaturog ni Jesus kabayatan ti bagyo idiay dan-aw ta ammona nga awan ti rumbeng a pakadanagan dagiti adalan. Idi riniingda, kinuna ni Jesus, “Apay nga agbutengkayo? Nagbassit ketdin ti pammatiyo!” Kalpasanna, pinagulimekna ti angin.
Idi agangay, naikkanak iti maysa nga scholarship isu a nalpasko met laeng ti sekundaria. No lagipentayo a kaduatayo ni Jesus iti bilog, agtalektayo a pagtalnaenna ti bagyo.
Kararag: Nailangitan nga Ama, tulongannakami kadi a manglagip no asinoka, nga addaka kadakami, uray pay iti panawen ti riribuk. Amen. Kapanunotan: Ita nga aldaw, laglagipek a kaduak ni Jesus iti bilog. Ikararagan: Ti maysa a tao a marigrigatan a mangbayad kadagiti magasto iti panagadalna.