Tips

Tarabay iti Pagtaengan, Salun-at ken Dadduma Pay

Bannawag - - Itoy A Bilang - Inurnong ni ELIZABETH M. RAQUEL

PANGIPANAN KADAGITI BABASSIT NGA APPLIANCES?

Nasaysayaat no saan nga iduldulin dagiti babassit nga appliances a maar-aramat iti kosina a kas iti toaster, mixer, ken kapadada ta no indulinmo ket kasapulam, makabusbos iti oras ti panangsapsapul wenno panangal-ala iti daytoy. Ti kapintasan nga aramiden kadagitoy babassit nga appliances, ipuesto dagitoy iti nalaka a makita ken nalaka laeng a gaw-atem, pangalaam, wenno pangusaram no kasapulam.

AGARAMIDKA MAN ITI FACEPAINT.

Agaramidka man iti face paint a mabalin nga aramaten dagiti ubbing— ken uray payen dagiti nataengan. Pagtiponen ti sangakutsarita a

cornstarch, kaguduat’ kutsarita a danum, kaguduat’ kutsarita a

cold cream, ken dua katedted a food coloring. Paglilimogen a nasayaat dagitoy.

UMNO A PANAGUSAR ITI BLEACH.

Liklikan ti mabayag a panangyuper iti kawes iti bleach (kas koma iti Clorox). Umdasen ti 15 a minuto wenno nakurkurang pay, depende iti kaingel ti pagyuperan. No mangikanaw iti ¼ tasa a bleach iti sangagalon a danum (gagangay a templa), umdas pay ketdin ti 5 agingga iti 10 a minuto a pannakayuper ti kawes iti solusion. No mabayag ngamin unay ti pannakayuper ti kawes iti bleach, mabalin met a pakadadaelan nga in-inut ti kawes.

DIMO BAYBAY-AN TI SEPILIOM A PAGAPONAN TI MIKROBIO.

Saan nga umdas ti panangbuggom iti sepiliom kalpasan ti pangaramatmo iti daytoy. Tapno manamnama ti kinadalusna, nasayaat la unay no sagpaminsan met nga ipaburekmo iti sumagmamano a minuto. Wenno saan, yupermo iti bleach ken napudot a danum. Suktam met iti tunggal tallo a bulan wenno no nagsakitka. Mabalin pay a yuper ti sepilio iti maysa a paset ti danum ken maysa a paset ti hydrogen peroxide. Bay-am a kastoy agingga iti usaremto manen.

Newspapers in Tagalog

Newspapers from Philippines

© PressReader. All rights reserved.