Padasem Daytoy, Kailian
Idi maramananmi ti sili a Point Man ti Taiwan, nalagipmi ti sili nga imulmula dagiti kakailianmi iti Siudad ti Batac.
IDI bimmisitakami iti experimentalfarm ti Known-You Seed iti Taiwan, nasaludsodmi ken ni Becky Wang, balasang pay a plant breeder a pangulo iti panagpataud kadagiti haybrid a sili, no nagasang kadi amin dagiti patpataudenda a haybrid a sili a para iti sinigang.
Wen kano malaksid iti maysa a saan a nagasang— daytoy aw-awaganda iti Point Man. Ngem gapu iti daytoy, di unay interesado dagiti mangidadaulo iti panaglako kadagiti bin-i. Kunada nga amangan no awan gumatang. Nupay kasta, inlawlawag ni Becky a no natangkenanen ti Point Man, agbalin metten a nagasang.
Pimmuros ni Becky iti naganus pay a bunga daytoy. Tinukkolna ti sili sa imparamanna kadakami. Naimas met! Nalagipmi la ket ngarud ti sili a para iti sinigang nga imulmula dagiti kakailianmi iti Siudad ti Batac. Saan met a nagasang ngem adu met ti mangayat. Mabalin met daytoy a para iti pinakbet wenno solo a lutuen a kasla adobo wenno lingtaen nga awan ti kaduana a sabali a nateng. Simple laeng ti pannakalutona. Ikkan iti sangkabassit a danum, suka ti Ilokos, bawang, sangkabassit nga asin wenno patis a pangtempla, sa sagpawan iti sumagmamano nga iwa a bagnet wenno karne ti baboy.
Sinaludsodmi ken ni Aubry Ancheta, maysa kadagiti nangato ti takemna iti Known-You Philippines nga agiwarwaras iti bin-i a pataud ti Taiwan iti Filipinas, no addan bin-i ti Point Man a mailaklako iti Filipinas. Awan kano pay. Amangan kano no awan ti malakoda.
Iti biangmi, adu la ketdi ti mangayat iti Point Man ta adu met dagiti dida kayat ti sili a nagasang. Kinapudnona, adu dagiti am-ammomi iti Kamanilaan a ‘tay saan a nagasang a sili nga aggapu iti Ilokos ti sapsapulenda. Insingasingmi ngarud ken ni Aubry a mangipa-Filipinas iti bin-i ti Point Man.
Dadduma Pay a Barayti
Adu pay dagiti sabsabali a barayti ti sili a para iti sinigang a nakitami iti farm ti Known-You. Maysa kadagitoy ti barayti a Zesy. Medio krema ti maris ti bunga daytoy, napuskol ti ukisna ken nalasag. Nabunga daytoy.
Adda pay maysa nga awan pay naganna malaksid iti codename daytoy a BF2121. Nakaberberde ti bungana, nagmarantiddog ken di unay nalukmeg. Ngem sobra kano ti kinagasangna, kas kuna ni Becky.
Adtoy dagiti dadduma pay a barayti ti sili a para iti sinigang a pataud ti KnownYou Seeds: Temptation, Group Zest, Passion., A-May, Kris, Gladius, Carmen, Boost, Jala Babe, ken BF-1962.
Urayentayo ti kaadda ditoy Filipinas ti bin-i ti Point Man ken dagiti dadduma pay a baro a haybrid ti sili a para iti sinigang a pataud ti Taiwan.—O