Okeyka, Apong
ADTOY man ti lima a pilosopia ti praktikal a panagbiag: 1. Bigbigen ken ipakita ti panagyaman kadagiti tattao a ti
kinaimbagda, nakatulongda iti kinaasinom iti agdama. Padasen nga ilista ti sangapulo a tattao a nakapatpateg kenka, dagitay saan a kameng ti pamilia wenno personal a pagayam, a nakaimpluensia iti panagpanunot, kababalin ken nasayaat a kasasaadmo ita. Saan a nasken a kameng ti henerasionmo dagitoy a tattao; mabalin a nagbiagda iti sabali a panawen wenno pagilian. Mabalin a saanmo ida amin a naam-ammo. Nupay kasta, agnanayon ti impluensiada kenka.
2. Tunggal maysa kadatayo, anak ti Nakaparsuaan. Amirisentayo no ania ti kaipapanan ti panangsurot kadagiti linteg ti nakaparsuaan. Ania dagiti natural a siklo a nakaimpluensia iti panagbiagtayo? Apay nga agnanayon ti kaipapanan ti nagtimbukel?
3. Saan a ti kapaut ti biag ti nasken unay iti biag no di ket ti
kaipapanan ti panagbiagmo wenno ti kalidad ti biagmo. Padasen nga ilista dagiti sangapulo a kapatgan a balligi wenno nagun- odmo iti biagmo. Nasken kadi dagitoy? Masungbatanda kadi ti saludsod nga “Apay nga addaka ditoy?” 4. Ti holistiko nga ammo (knowledge) ket adda iti panangusar iti Ulo, Ima, Puso ken Humanidad. Kaano a ti ammo ket agbalin a kabaelan, agingga nga agbalin a pilosopia? 5. Ti rasionalidad ti tao ket adda iti walo a tay-ak ti intelihensia— lohika, spatial, lengguahe, kinesthetics, musika, interpersonal, intrapersonal, ken naturalismo. Arisiten ti bukod a bagi segun iti daytoy a walo a tay-ak Arisiten ti pagpigsaan ken pagkapsutan.
Adtoy met ti 12 a tips iti nabalballigi a Tawen 2019:
1. Agplano a nasayaat tapno sumayaat ti aramid. 2. Kitaen a nasayaat dagiti detalye; palinisen a nasayaat ti aramid. 3. Saan a balligi ti balligi a maisakripisio ti pamilia wenno pammati. 4. Ammuen ti nagdumaan ti prioridad ken madagdagus. 5. Planuen ti aramid, ken aramiden wenno isayangkat ti plano. 6. Saan nga ikabil amin nga itlog iti maymaysa a basket; wenno saan nga
i- all in ti amin a sanikua iti maysa a negosio, kas pagarigan. 7. Pudno ti makuna ti kustomer, isu a kunatayo, “pudno a kanayon ti kustomer.”
8. Maaddaan iti kalendario ti iskediul nga inaldaw a mapabaro. Siguraduen a suroten a naimbag ti iskediul. 9. Kadagiti miting, masapul nga alertoka iti panunot ken aramid. 10. Makapatay ti kinamanagpannakkel, amangan no sika ti umuna a biktimana.
11. Agbalin a nalalaing wenno nasaysayaat iti inaldaw, saan ketdi a kumapkapuy.
12. Agbalin a paset ti kinalaing, saan ket a para dillaw iti nalaing.—O