Saludsodem ken ni Apo Hues
SALUDSOD:
Iti panangisubli ti Amerika iti tallo a kampana iti simbaan ti Balangiga, Samar, kalpasan ti nasurok a sangagasut a tawen, napalagip kadakami ti kampanami nga inlibasda nga innala idi 1973 a panawen idi ti Martial Law. Dakkel daytoy kampanami ta crane pay ti pinangbagkatda manipud iti kampanario sa inkargada iti dakkel a trak. Kunada a bronse ti kampanami; agallangogan ti awengna agingga iti adayo. Sumagmamano a tawen kalpasanna, naammuanmi nga adda daytoy iti ikut ti maysa a mayor. Kasano a mapasublimi daytoy, Apo Hues? Daydi Apo Padi ti simbaan idi naala ti kampana, nabayagen a natay. Uray daydi kongresista a kunada a gayyem ti mayor a kakomplot iti pannakaala ti kampana, natay metten. Kasta met ti mayor a kunada a yan ti kampana. Naglumen daytoy a damag, Apo, ta mabutengkami met idi kaagitoy appo a kongresista ken mayor agingga iti naliplipatan nangruna ket nasuktan ti kampanami iti basbassit ken di unay naaweng.
Ania ti aramidenmi, Apo Hues, tapno mapasublimi ti dakkel a kampanami, no adda pay? Awan metten dagidi tattao a maatap nga adda pakainaigan daytoy pannakaala ti dakkel a kampana.—Mr. Catolico
SUNGBAT:
Kunayo nga innala wenno tinakawda ti dakkel a kampana a duduoganen. Nabalor unay daytoy wenno saan a mabaloran iti pirak ta maysa daytoy a pakalaglagipan. Kitaentayo laengen dagidiay naisubli a tallo a kampana idiay Visayas, kasta unay ti ragsak dagiti umili. Kasta met ngata no maipasubliyo dayta dakkel ken nabalor a simbolo ti Kristianismo iti lugaryo. Kastoy ti aramidenyo. Ti Parish Pastoral Council iti yanyo agaramidda ti resolusion iti pannakaisubli dayta kampanayo. Inagananyo koma dagiti mainaig iti pannakaala ti kampana— Apo Padi, Apo Mayor, ken Apo Congressman (innaganan ti nagsurat dagitoy ngem inikkatmi tapno masalakniban met ti nagan ti pamiliada nga awanan met basol). Ngem gapu ta pimmusay metten dagitoy a tattao, yadresyo ti resolusion ken buyoganyo iti maysa a petision a maisubli ti kampanayo. Papirmaanyo iti adu a tattao ket ti kunak, tulongannakayto ti Obispoyo iti pannakaisubli ti kampanayo a naawan aganay a limapulo a tawenen ti napalabas. Agkaykaysakayo tapno maisubli ti kampanayo tangay ammoyo met ti yanna. Saankayon nga agbutbuteng. Mabalinyo pay nga idarum iti panagtakaw ti mangig-iggem ita iti kampana ta apay nga adda iti taengna wenno iti poderna ti napukaw a kampana. Aggunaykayon ita ta di pay naipumpon iti lipat daytoy pannakapukaw ti kampana.—O
(Adda kadi problemayo a legal? Ipatulod iti: “Saludsodem ken ni Apo Hues,” c/o Judge Joven F. Costales (Ret.), 51 E. Rimando St., Brgy. Natividad, Naguilian, 2511 La Union. Wenno ipatulod babaen ti e-mail iti: jov_cos@yahoo.com wenno iti bannawagmagazine.mb@gmail.com. Ilanadyo koma ti kompleto nga impormasion wenno banag a mainaig iti problemayo.)