Adut’ Pagimbagan nga Itden ti Okra

Padasenyo man met ti agsinglag iti bukel ti okra.

Bannawag - - Itoy A Bilang - Reynaldo E. Andres

TI okra ti maysa kadagiti kaganaran a nateng ta adu a potahe ti pakalutuan ken pakailaokanna a kas iti pinakbet, inabraw, ken sinigang nga ikan wenno karne.

Saan a bastabasta ti sustansia a maagsaw manipud iti okra. Iti kada 100 a gramo a bunga ti okra, addaan kadagitoy sumaganad a sustansia: calories, 25 a gramo (g); dietary fiber, 2 g; protina, 1.5 g; carbohydrates, 5.8 g; Bitamina A, 460 IU; Bitamina C, 13 mg; folic acid, 36.5 micrograms; calcium, 50 mg;

iron, 0.4 mg; potassium, 256 mg; ken magnesium, 46 mg. Kadagiti dadduma a pagilian iti Europa, ad-adda nga agmulada iti okra gapu kadagiti bukelna. Ditoy ti paggapuan ti naisangsangayan a lana nga umarngi iti lana ti oliba ( olive oil). Ti amarilio-a-berde a lana a mapespes manipud kadagiti bukel ti okra, addaan iti naisangsangayan a raman ken ayamuom. Nabaknang pay iti oleic acid, maysa nga elemento a nabaknang iti antioxidants ken makatulong a mangikabassit iti dakes a kolesterol iti bagi nga isu ti makaigapu iti alta presion. Ti oleic

acid ti maysa kadagiti kangrunaan a lana a maala iti bukel ti mani, macadamia nuts, lengnga, abokado, kasoy, ken almond.

Agarup 40 a porsiento ti lana ti maala iti bukel ti okra. TI sangaektaria nga okra, makapataud iti 795 a kilo a bukel a pakaalaan iti di nakurkurang ngem 300 a kilo a lana. Ad-adu nga amang daytoy no idilig iti lana manipud iti bukel a maala iti sangaektaria a sunflower.

Kas iti soybean, nabaknang pay ti bukel ti okra iti protina, arina, lecithin, ken nutraceuticals (wenno dagiti ramen dagiti taraon a mangpapintas iti salun-at). Naimas pay nga aramiden a kape ti bukelna.

Alternatibo nga Agas ti Diabetes

Kuna dagiti nakapadasen a nasamay nga agas iti diabetes ti bunga ti okra ta nabaknang daytoy iti fiber, Bitamina B6 ken folic

acid. Agdiabetes ti maysa a tao no nangato ti ramen nga sukar ti darana ket dagiti nadakamat a sustansia ti mangibaba iti dagup ti asukar iti dara. Mangtadtad iti pito a naganus a bunga ti okra sa yuper iti sangabaso a danum iti agpatnag. Inumen ti nagupran iti agsapa sakbay ti panamigat. Inaldaw a kastoy ket kunada a makita ti napintas nga epekto ti okra juice iti salun-at kalpasan ti dua a lawas.

Panagpaadu iti Apit nga Okra

Dua ti barayti ti okra a napintas nga imula iti Kailokuan ken iti Tanap ti Cagayan— ti Smooth Green ken Native White. Adu ti maibunga dagitoy ken mabalinen nga apiten dagiti pakpakauna a bungada manipud 45 nga aldaw kalpasan ti panagmula.

Mabalin ti agmula iti okra iti ania man a panawen. Ngem kuna dagiti agsuksukisok iti Mariano Marcos State University (MMSU) iti Siudad ti Batac nga ad-adu met laeng ti maapit no agmula kadagiti nababa a lugar manipud iti bulan ti Oktubre agingga iti Disiembre.

Mabalinen a burasen dagiti bunga ti okra manipud 5 agingga’t 10 nga aldaw kalpasan ti panagsabongda. Agburas no naregregen ti linnaaw tapno maliklikan ti panagbubudo. Isupot dagiti bunga kadagiti plastik a selopin nga aglaon iti 10 a kilo tapno mapagtalinaed ti kinapreskoda bayat ti pannakaibiaheda nga agpatiendaan.—O

Ad-adu ti maapit a bunga ti okra no agmula manipud iti Oktubre agingga iti Disiembre.

Newspapers in Tagalog

Newspapers from Philippines

© PressReader. All rights reserved.