Nasarakanna ti Ragsakna iti Bonsai
“Naayatak iti mula ken iti nakaparsuaan,” inlatak ‘toy bumo-bonsai a taga-Binalonan. “Naragsakak iti panag-bonsai-ko; ikkatenna ti stress…”
SANGAPULO ket lima nga aldaw a sinerbianna ni Sultan Haji Hassanal Bolkiah ti Brunei iti Princess Cruise maysa a US luxury ship a nagpaayanna a kas stateroom steward iti 16 a tawen. Naggapu ti bunggoy ni Bolkiah idiay Florida, USA. Napanda nagpallailang iti Mediterranean. Ti met laeng Princess ti nagluganan da Bolkiah a nagsubli iti Florida. Ni Richard Cipe Sison wenno Bogs ti napusgan a mangurnos iti kuarto ti sultan. Idi aggibus ti bakasion da Sultan Bolkiah iti Mediterranean ken makasublida iti Florida, sinagutan daytoy maysa kadagiti kabaknangan a tao iti lubong ni Bogs iti nangina a relo a kas pagsupapakna iti nasayaat a panagserbina.
Taga-Siudad ti Urdaneta, Pangasinan ti ama ni Bogs, ni Ricardo Sison, Sr. a nagtrabaho idi iti Bureau of Customs, Siudad ti Cebu idinto a taga-Toledo City, Cebu, ti inana, ni dati a Belinda Cipe. Pito nga agkakabsat da Bogs, isu ti inaunaan. Dina naturpos ti BSC major in Management a kursona. Nakastrek a waiter iti restauran ti Shangri-La Hotel iti Metro Manila sa iti Mandarin ken Oakwood Hotel. Nagsanay a seaman kalpasanna ket tinulongan dagiti kakasinsinna a seaman a nakastrek nga
stateroom steward iti Princess. Dakkel ti naitulong ti padasna a waiter iti otel iti innem a tawen. Naawat a dagus kalpasan ti interbiuna.
Awis ti Bonsai
Tawen 2011 idi mangrugi nga agduyos iti bonsai ni Bogs. Iti naminsan a nagbakasion ket nairana nga adda bonsai show a nakitana, naay-ayo kadagiti naidispley a bonsai ket iti panunotna, patienna a kabaelanna met ti ag- bonsai. Inkakaubinganna ngamin ti panagayatna iti mulmula.
Iti maysa nga aldaw a naka- duty iti barko, naikaglis iti agdan ti barko ket nasaktan ti kanawan a tumengna. Gapu itoy, saan a nakapagtrabaho. Impa- theraphy- na ti tumengna. Idi agangay, inkeddengna nga agsardengen a kas seaman. Tawen 2014 idi. Nagpatakder iti bunggalo iti lugar da baketna iti Sitio Casargwelasan, Brgy. Cili, Binalonan, Pangasinan. Bugbugtong ni Gwen, adda iti Grado 4 nga anakda ken dati nga Evangeline Casero a kaingungotna.
Rinugianna ti nag- bonsai. Nagat-atendar kadagiti seminar nga insayangkat ti Pangasinan Bonsai Society. No agpasiarka iti balayda, maipasabat iti imatangmo ti solarda a napno iti agduduma a bonsai. Makadandanon pay idiay Isla Camiguin (Cagayan) a pagalaanna iti kayo ti bantigue a patanorenna a bonsai.
Ni Bogs ti agdama a presidente ti Binalonan Ang Galing Bonsai Club ti Binalonan, Pangasinan. Adda duapulo a kameng ti grupo.
Idi damagek ken ni Bogs no kaano nga agsubli a seaman, inyisemna a kinunana a kaykayatnan ti agpatanor, agpaadu ken aglako iti bonsai. “Naayatak iti mula ken iti nakaparsuaan,” innayonna. “Naragsakak iti panag- bonsai- ko; ikkatenna ti stress…”
Addan 24 a bonsai club iti entero a Pangasinan sipud pay idi 2013 a pannakabuangay ti Bonsai and Suiseki Club of Pangasinan (BASCOP) nga idauluan ni Jose Antonio.
Dagitoy nga ili ti Pangasinan ti addaan iti bonsai club: Villasis, Lingayen, Sta. Barbara, Calasiao, Siudad ti Urdaneta, Binalonan, Alcala, San Nicolas, Tayug, San Quintin, Sison, Laoac, Natividad, ken Mangatarem.
Idi Nobiembre 18, 2017 agingga iti umuna a lawas ti Disiembre 2017, naangay ti Bonsai Liga 2017 iti plasa ti Binalonan, Pangasinan a nakipartisiparan dagiti dadduma nga ili ti Pangasinan, probinsia ti Nueva Ecija ken Pampanga. Sa idi laeng Nobiembre 24-Disiembre 2, 2018, naangay ti 2018 Bonsai and Suiseki Alliance of the Philippines, Inc. (BSAPI). Ti BSAPI ti
national bonsai club ti pagilian. Ad-adu ita a bonsai club ti nakipartisipar. Addada pay naggapu iti Mindanao ken Visayas. Ginasut dagiti indispleyda a nagpipintas a
bonsai iti plasa ti ili.—O