Ni Catriona ti Miss Universe

Bannawag - - News -

MALAKSID iti “lava walk” a pinaglatakna, ad-adda a ti kinasirib ni Catriona Gray ti nangitan- ok kenkuana tapno magun- od ti pagilian ti maikapat a korona ti Miss Universe.

Kuna ni Margie Moran-Floirendo, ti maikadua a Miss Universe (1973) ti pagilian, masiguradona idin ti balligi ni Catriona iti nalawag ken umisu a sungbatna iti maudi a saludsod. Nupay kasta, binigbigna a ti pannagnana ken makaguyugoy a lapsatna ti nangawis iti imatang ti kaaduan.

Ti nasao a “lava walk” ket naadaw iti Bulkan Mayon iti Albay a puon ti nanang ni Catriona, ni Normita Ragas Magnayon- Gray.

Bugbugtong nga anak ni Catriona. Inimatangan ti ina ken ti amana a ni Ian Gray, a maysa nga Australiano, sadiay Thailand ti panangatiw ni Catriona kadagiti 93 a sabsabali pay a nakisalip.

Ni Miss South Africa Tamaryn Green, 24, ti first runner-up, sa ni Miss Venezuela Sthefany Gutiérrez, 19.

Nagrukbab met ni Gloria Diaz, umuna a Miss Universe (1969) ti pagilian, ken ni Catriona. Kas ken ni Moran, binuya ni Diaz ti live telecast iti telebision. Ni Pia Wurtzbach, ti maikatlo a Miss Universe (2015) ti pagilian, ti nagbuya a personal.

Naawis ni Catriona ti yaanamong dagiti hurado iti sungbatna iti saludsod para kadagiti Top 3, “What is the most important lesson you have learned and how will you apply it to your time as Miss Universe?”

Simmungbat daytoy (iti panangipatarustayo): “Nagob- obraak kadagiti agdedekket a balbalay iti Tondo, Manila ket nakurapay ken naliday ti biag sadiay. Ken kankanayon nga impalpalagipko iti bagik a kitaen ti kinapintas iti daytoy a kasasaad, ken kitaen ti kinapintas kadagiti rupa dagiti ubbing, ket agyaman iti daytoy. Ket imetko daytoy nga aspekto a kas Miss Universe tapno kitaen dagiti kinaimbag kadagiti situasion ken arisiten no ania pay ti maipaayko, kas pannakabagi daytoy (a pasalip). Iti panagkunak, no magutigotko dagiti tattao nga agbalin a managyaman, mabalintayo a maaddaan iti naisangsangayan a lubong a saan nga agsampaga ti kinanegatibo, ket dagiti ubbing, mayurit ti isem kadagiti rupada.”

Sakbay a nakipartisipar kadagiti pasalip iti kinnapintasan, adbokasia ni Catriona ti panagur- or iti pondo tapno makaipatakder iti pasdek iti Tondo. Ti tallo-kadsaaran a pasdek, agbalin a pre-school.— O

Newspapers in Tagalog

Newspapers from Philippines

© PressReader. All rights reserved.