Ni Sylvia a Kas Kosinera
SYLVIAHERA” ti paulo ti travel cooking show ni Sylvia Sanchez a mabuya iti CasaNieves TV manipud pay itay Disiembre 25, iti alas singko iti malem.
Nagtipon a nagan ti aktres ken “biahera” ta likawen daytoy dagiti kangrunaan a probinsia a pangipakitaanna ti laingna iti panagluto, nga usar dagiti rekado wenno maluto iti lugar a pasiarenna.
Kuna ni Sylvia, maleta laeng a yan dagiti usarenna nga agluto ti imetna. Ti kuna daytoy a ‘maleta’ ket collapsible cooking stove nga us-usaren met dagiti mabigbig a chef iti sabali a pagilian kadagiti travel show dagitoy.
Maipalagip a nagadal iti culinary ni Sylvia para iti pamiliana a naayat iti makan. Pinadasna met ti nangipatakder iti restauran ngem saan a nagbayag ta inturongna met ti imatangna iti careerna a kas aktres nga isu ti kangrunaan a pagaayatna. Ti imasna, dina latta maibbatan ti ayatna iti panaglutoluto. No dina balonan, awisenna iti balayna dagiti padana nga artista tapno maramananda ti lutona. Dinaydayawda met ti imas ti lutona a sumagmamano kadagitoy babaen ti social media.
Nabukel la ket ngarud ti production team daytoy karaman ti direktor a ni Dante Nico Garcia ti “Sylviahera.”
Apagisu met ta naaddaan iti bakante nga aldaw ti aktres kalpasan a naggibus ti teleserye a “Hanggang Saan.” Gapu iti napigsa a tudo, saan nga ania a nagballigi ti parada dagiti karosa ti 2018 Metro Manila Film Festival Parade of the Stars idi Disiembre 13 iti kalsada ti Paranaque City a nagturong iti SM MOA.
Dagiti laeng karosa ti “Fantastica” (Star Cinema/Viva Films), “The Girl in the Orange Dress” (Quantum Films/Star Cinema/MJM Productions), ken “One Great Love” (Regal Films) ti natuloy. Gapu iti pitak, saan a nakapanaw ti karosa ti “Rainbow’s Sunset,” “Otlum,” “Jack em Popoy: The Puliscredibles,” “Mary, Marry Me” ken “Aurora.”
Iti biang dagiti adda iti likudan ti 2018 Metro Manila Film Festival, kuna ni Noel Ferrer a nupay dakkel a problema ti tudo, naikagumaananda a naisayangkat ti nasao a parada.—O