SINAIT, ILOCOS SUR.

Impaayan ti GUMIL (Gunglo Dagiti Mannurat nga Ilokano) UNP Chapter iti sagut dagiti kameng ti NORFIL Foundation, Inc. bayat ti panangrambak ti gunglo iti Paskua iti Lugo Beach, Brgy. Dadalaquiten Norte, Sinait, Ilocos Sur idi Enero 5, 2019. Nagtinnulongan ti UNP Center for Ilokano Studies and Museum nga idauluan ti direktorna a ni Dr. Eleanor R. Belizar; Alma Campos-Somera, project coordinator; Pamela H. Marinas, project assistant; ken ti GUMIL UNP Chapter nga idauluan ni Rhussel Rafol ti nasao a gannuat. Ti NORFIL Foundation Inc. ket maysa a nonprofit, non-government social organization a tumultulong kadagiti ubbing nga addaan rangkap (disabled), nabaybayan (neglected) ken pinanawan ti pamiliada (abandoned) iti panangbayabay ni Mrs. Raqueline Ridao, Social Worker ti NORFIL Foundation, Inc. nga adda met laeng iti salinong ti Municipal Social Welfare &Development Office (MSWDO) iti nasao nga ili. Kas kuna ni Janine Villa, vice-president ti AKAPIN Ilocos Sur Chapter, sisasagana ti ti NORFIL Foundation, Inc. nga agawat kadagiti agkameng nga addaan rangkap. (ACS)