Nagimaskan, Pansi Cabagan!
NALATAKEN ti pansit Cabagan, ad-adda nga am-ammo a pansi (Ibanag ti pansit), a kas maysa kadagiti kaiimasan a pansi a maidasdasar saan laengen nga iti Cabagan, Isabela a nagtaudanna no di pay ket iti sibubukel a Tanap ti Cagayan.
Malaksid iti miki a naaramid manipud iti lokal a pagaramidan iti Cabagan, manaynayonan pay daytoy iti letson karahay, itlog pugo, nateng a sagpaw ken dadduma pay a pangpaimas iti luto. Gapu ta bassit laeng ti digona ken apagisu laeng ti kaadu ti laokna a toyo, kaykayat daytoy dagiti residente a kangrunaan a mamerienda ken uray pay kas masida a bulonanda iti innapuy.
Idi Enero 23 itoy a tawen, naibus iti las-ud laeng ti dandani lima a minuto ti “higante” a pansi Cabagan a naisagana iti dakkel a bigao nga agarup 10 a metro ti kaakabana ken naidasar iti Cabagan Square Park iti sentro ti Cabagan, Isabela. Agarup sangaribu ti nangan iti sangabigao a pansi.
Linuto dagiti kosinero manipud iti 26 a barangay ti pansi ken insaganada iti bigao. Nakausarda iti 78 a kilo a miki, 80 a kilo nga igado ken karahay, 200 nga itlog ti pugo, 30 a kilo a natnateng ken nayon a ramen, malaksid pay iti toyo (soy) ken dadduma a laokna.
Kinuna ni Cabagan Mayor Christopher Mamauag a naimulan iti panunot, kababalin, kultura ken historia dagiti taga-Cabagan ti pansi Cabagan a kas maysa kadagiti produktoda a makan. Gapu itoy, kinunana a tinawen a marambakan ti industria ti panagluto iti pansi Cabagan a kas pammigbig kadagiti aglutluto iti nasao a pansi ta nainayonen ti nasao a makan iti kultura ti ili.
Agpayso a naimas ti pansi Cabagan ta kas kinuna ni Municipal Civil Registrar ti Cabagan Roselily Baquiran: “Natonsat, nofu, nakkaranavu ta sak ku! (Naibus amin pati ipus. Nabsogkami amin!”—O