Okeyka, Apong
Staff?”
“Politika, John... Itedko kenka ti numero ti teleponona. Adda ita iti maysa nga ospital iti Laoag— Laoag General Hospital. Natalged pay laeng ita ta bambantayan dagiti mapagtalkanda a PSG, ngem masapul nga iruarmo sakbay a maammuan dagiti kabusorda ti yanna. Kasaritam ta mabalin a maikkannaka kadagiti mapagtalkanna a soldado a kaduam a mapan iti Camp Lego... ta pudno a masapulmo ti adu a soldado tapno makastrekka iti kampo.” “Thank you, sir. And please keep me posted.” Imbolsa ni John ti selponna kalpaaan ti panagsaritada iti Deputy. Sinangona ni Daniel. “Intayo idiay Laoag General Hospital. Adda sadiay ni Pat Coloma a chief of staff ti Presidente ket masapul a yakartayo.”
KUMARIBUSO dagiti tao a mangisagsagana kadagiti kamera, mikropono, silaw ken amin a kasapulanda iti panangalada iti panagsarita ti Presidente. Inikkanda iti dakkel a puraw a tarpaulin iti background ti pagtugawan ti Presidente. Inkarigatanda nga inlinged dagiti amin a pagilasinan iti kaaddada iti dayta a lugar.
Classified ti yanda. Agtalinaed a kasta agingga a dida maala ti tartarigagayanda— ti peaceful transition of power manipud kada Presidente Acosta ken Gen. Miguel. Saanda a kayat nga adu pay a dara ti maiparukpok.
“Ready?” sinaludsod ni Gloria Sarandi iti teknisian a mangtingtingiting kadagiti video equipment. “All ready, ma’am,” insungbat ti lalaki. Madamdama pay, rimmuar ni Anwar a nangukukod iti Presidente. Nakaposas dagiti takiag ti Presidente ken ul-ulodenna ti kawar dagiti sakana.
Apagapaman a nagsabat ti panagkita ti Presidente ken ni Gloria. Saan a nagun-uni ti Presidente a nangibaw-ing iti imatangna. Napaisem laeng ni Gloria.
Nakatultulok ti Presidente a nagtugaw iti maysa nga stool. Inikkat ni Anwar ti posas ti Presidente a nangipayong a dagus iti dakulapna kadagiti matana ta napurar iti lawag dagiti spotlight a naipaturong iti rupana.
“Panagkunak, ammomon no apay nga addaka iti sango ti kamera, Acosta,” kinuna ni Anwar.
Saan a nagtimek ti Presidente. Pinagsinnublatna a kinita ti mayora, sa ti terorista, sa insublina ti panagkitana ken ni Gloria. “Kasano a nagkadua ti maysa a terorista ken maysa a mayora?” manglalais a kinunana.
“Tapno sumardengen ti kinamauyongmo ket maisalakan ti pagilian kadagiti adu pay a saan a nainkalintegan nga ar-aramidem kadagiti umili,” insungbat ni Gloria.
“Rinaraemka ta impagarupko no maysaka kadagiti babbai a narimat ti masakbayanna iti politika. Diak ammo a kastoy ti kinababam. Usarem ti bagim ken makikomplotka kadagiti terorista tapno laeng magun- odmo ti kayatmo? Sayang laeng ta saankayo nga agballigi. Ammoyo dayta,